Read turkana Isaya 23 Bible Online

Isaya 23 - turkana bible

Isaya 23

¹ Ngakiro nugu kesi adwario kotere Tiro. Kikaloutu, esi ngikadokak nganamea! Enyasun Tiro lo erai ere kus, emam ngakais ka ni ewaatar ngatubwae, arata daang asakatan pas. Iirarete esi ngakiro nugu akolongit na ebongunioto ngatubwae kus alo Kupuro.

²Kiuteto, esi ngimuchurus a Sidon! Imearete esi ngitunga kus

³toloto ekwakaye anam akigiel ka agielanar ngikinyam lu itao anakwap a Misiri, ka emuchuruseenu ka ngibukui luche.

⁴Ere a Sidon, kirumito iyong ngileech! Kainyo kinger iyong anam ka nituluk a anam, ebala, “Nyeriabakina ayong nakanuan kori nyidouno nyitanuna ayong ngide sapa kori lupesur!”

⁵Eriangakinosi tani Ngimisiri nairareta atamar enyasun Tiro.

⁶Kikaloutu, esi ngitunga a Poinike! Tamataros pan nakwap a Sipania.

⁷Erai logo dir ere lokolong kus a Tiro a? Ere lokolong a alakara, lokolong esiakini a angorot a? Ere lokolong aloseenete ngitunga keng ekwakaye nganamea toloma nakwap a ngitunga aluche a?

⁸Ngae arekini ngakiro nugu daang atamar esubakinosi alo Tiro ere lo erai nikeng aponeeneta ngikapolok, ere lo eraakasi ngimuchurus keng ngikapolok lu akeritae anakwapea kadaang?

⁹Erai Akuj Namerikanyer ngesi arekini ngakiro nguna daang. Asubakini kongina sodi kinyasunea ekinis kech, ka akititing ngileech ngulu ekeritae anakwap.

¹⁰Esi lu ilomito Sipania, Kapesi kitata ngamanat kus! Emam ibore kiratakini esi nabo.

¹¹Ekea Ekapolon Akuj agogongu keng alokidiama anam sodi tadaka ngapolosio. Adungu ngesi atamar kinyasunae ngirerea lua ngawasea anakaagongok lu eyakasi Poinike.

¹²Alimu Ekapolon Akuj kona, “Iyong ere a Sidon, asalu alakara kon nabo ichiakiaritae ngitunga kon. Tani kematarosi kesi Kupuro, nyeyuunosi tani kaina.” (

¹³Erai meere ngitunga a Asiria pearai ngitunga a Babilonia kolong alakakinete ngitieng ipudaate ere a Tiro. Kesi adukete ngakais na edirisito kisiriama ere kitijikinioto, toukonosi ngakais a ere kinyasut.)

¹⁴Toowanikisi, esi Ngisipania lu idokete nganamea! Enyasun ere lokolong igienosi esi.

¹⁵Enangi ngirwa lu imuriakinor Tiro a ngikaru a ngitomwon-kaarei, alu eriyan ka ngikaru lu eyarea ekapolon. Adaunet a ngikaru kangulu, ikokini ere a Tiro amalaat na eramakinitae etum ebeyo,

¹⁶“Tolem agita kon toeor, kirimio ere, iyong amalaat nakolong imuriakin! Toeok ngieosio lukebuseak lukaalak, kitobongokinioto ngikiliok nabo.”

¹⁷Adaunet a ngikaru alutomwon-kaarei kangulu, itamuni Ekapolon Akuj Tiro nabo, sodi tobua lomuchuruseenu lokolong keng ngorot, nabo togielanar ngesi napolosio a akwap daang.

¹⁸Ngaropiyae na eriamuni ngesi alomuchuruseenu, itegeliario tarata ngaka Ekapolon Akuj. Nyikachakinete kesi ngaropiyae nguna tarata ngakech, pearai einakinio ngulu ilipito Ekapolon Akuj togieleta akimuj kech ka ngiworui.