Read turkana Isaya 24 Bible Online

Isaya 24 - turkana bible

Isaya 24

¹Inyasuni Ekapolon Akuj akwap kimiek erai alaireng. Emojirikini ngesi akwap sodi topeta ngitunga.

²Eriamunete ngitunga ngichan ngipei. Ngichan lu eriamunete ngitunga, ikwaan ka lu eriamuni emuron. Lu eriamuni ekedalan, ikwaan ka lu eriamuni ekapolon keng. Lu eriamuni ekagielan, ikwaan ka lu eriamuni emuchurut. Lu eriamuni ekepotoron amicha, ikwaan ka lu eriamuni ekaaran amicha. Lu eriamuni ekebootonit, ikwaan ka lu eriamuni ekabaran.

³Inyasunio akwap lokojokon tomunyarae. Alimu Ekapolon Akuj, nabo esubakinosi.

⁴Eoniyori akwap, sodi torinyio, abul akwap daang arinyoki, abosiasi akwap ka adis.

⁵Enyasut ngitunga akwap angero ngitalio a Ekapolon Akuj, nabo nyemisito ngakiro. Awout akirichakin achamunet keng nakajik.

⁶Amunyasi robo ngilam akwap, nabo aanyut ngitunga aboliaro kotere akisech kech. Amunyarosi kesi edong ngidikidio eyarete.

⁷Arinyokis ngamusabib ajongo emuna asojunit, ngitunga lukolong alakara daang, esinyito lukolong alakara daang.

⁸Emam ngichoroi eringa eruosi, emam ekare ka akimaritetere, esililing ngagitae.

⁹Emam itwaan eringa eeo emasio emuna, adwariki epurot ngulu emaase.

¹⁰Ekurukuruokin ibore daang alore, agolokin ngitunga daang nakais toyuunotor.

¹¹Igorosi ngitunga emuna alorotin. Asalu alakara angopia jik anakwap.

¹²Aliwor ere asakatan, abwang ngidorin a ere.

¹³Ngakiro nugu kesi esubakinosi alobukui kadaang anakwap. Ikwaanikin ka ngirwa lua esal a ngalemet, ngirwa lu iloilookinere ekitoe a akimiet, sodi tararaun ageor keng, kori ngirwa lu elemere ngamusabib daang.

¹⁴Lupiyayek, iremarete kotere alakara. Elimorete ngulu eyakasi too akibuseanu a Ekapolon Akuj.

¹⁵Ngulu eyakasi kide, ipuruunete ngesi, ngulu eyakasi lokwaas a anam, ipuruunete Ekapolon Akuj na erai Akuj a Isirael.

¹⁶Kipupi ngieosio a ekipur eponito anasalunet a akwap, ipurore Isirael, ebukut lo etenoono. Oitiakoi! Emam ayong ibore egieno! Abosia ayong! Ngulu ipotonorete luche lochan, erubakinito esubete nguna, nabo aroner asechanu kech noi.

¹⁷Topupokisi ekoe, ngitunga a ngakwapea! Kidarit esi ebuloi, kidarito ngapanya nakisipokete, kidarito ngiloi lukisurumete.

¹⁸Ngini ebuchar alobuloi, echakakin nakipany. Ngini ebuchar anakipany, isurumi eloit. Elakakini Akuj ngakipi anadis, tamaranikis ngapirio a akwap.

¹⁹Ani kerai abwanga, ebwang akwap, ani kerai aberes, eberes, ani kerai akiukuukokin, iukuukokin dir.

²⁰Itereterokin loger a itwaan ani irakarit epurot, kiukuukokin loger a egaach. Inuyete akwap ngasechesea keng, toukor nyeringa nabo enyouni jik.

²¹Enangi ngirwa lu iriraa Ekapolon Akuj ngapolosio a adis ta ngikapolok lua akwap.

²²Echunakini Ekapolon Akuj ngikapolok nakipany loger a ngitunga alu eenitae, togolok kesi lojela, ani adaunet a ngirwa alukaalak, kirira kesi.

²³Ngirwa ngulu, eribokini elap, tojongo akolong akicha, kainyo Ekapolon Akuj Namerikanyer ngesi eliwor ekapolon. Epolokini ngesi Yerusalem alomoru a Sion, sodi kingolikis ngikarikok a ngitunga apolou keng.