Read turkana Isaya 25 Bible Online

Isaya 25 - turkana bible

Isaya 25

¹Ekapolon Akuj, irai iyong Akuj kang, Kekusi ayong iyong kepuruu! Isub iyong ngakiro nakatalarak, isubak iyong ngakiro daang nakolong irekini iyong a angorot, iyook.

²Inyasu iyong ngirerea aliworosi asakatan, toukono ngawasea kech nakaagongok. Ngakais nakolong apereenete ngikapolok a ngakwapea anache emam nabo jik.

³Kipuruunete iyong ngakwapea nakajwok, kikerete iyong ngirerea a ngakwapea anakamoitanak.

⁴Nikon emotunosi lukebootok ka lu emam ni ingarakinotor, nikon eyuunotor kesi ngirwa lua ngichan. Iyong kimechete kesi, iliwor iyong etorube lo iangareta kesi ana kolong. Kiramete ngitunga lukamoitanak loger a ekuwam alo ekusi ngirwa lua akiporo,[18]

⁵loger a akamu anakwap anakoonon. Nakaneni iyong Ekapolon Akuj, isililingi ngimoe kosi. Isililing iyong akirema a ngitunga alukamoitanak, loger a edou alo itililimi akolong nakariran.

⁶Kanege alomoru alo a Sion, esubakini Akuj Namerikanyer ekimuje a ngibukui kadaang anakwap. Epete ngamuja nakatumak ka emuna loajokon.

⁷Moru lopei ngolo, ngesi elemarea Ekapolon Akuj edou a esinyoi lokolong emukit ngakwapea daang.

⁸ Ikisari Ekapolon lo erai Ekapolon Akuj akitu jik! Emiatari ngesi ngakiyo anakonyen a ngitunga kadaang sodi tolema ngileech lu atingito ngitunga keng anakwapea kadaang. Alimu Ekapolon Akuj nguna.

⁹Ani esubakin ngakiro nguna, elimuni itwaan daang tama, “Akuj kosi naga! Ngesi kolong kidarit kitoyuu. Ngesi erai Ekapolon Akuj! Ngesi kigieno sua. Atalakaros tokona echurokisi kainyo kiyuu ngesi ngoni.”

¹⁰Iyoki Ekapolon Akuj emoru lo a Sion, nakaneni ipudao ngitunga a Moab loger a ngatunyeny ana ipudao anawaar a ngibaren.

¹¹Itorwaarete kesi ngakan kech tosub esakete akilulumare, nakaneni isurumi Akuj kesi ngileech, kitedepa ekunonoonu a akilulumare.

¹² Eukori ngesi ngawasea nakaagongok a Moab, tararau daang kwap napua.