Read turkana Isaya 26 Bible Online

Isaya 26 - turkana bible

Isaya 26

¹Enangi akolongit na eeokinioto ngitunga eeos logo anakwap a Yuda. Egogong ere yok! Akuj alope igangit ngawasea keng!

²Tangaasi ngidorin a ere Totiaakisi akwap na emunoi toloma, akwap na esubete ngitunga keng ngakiro na eriyan.

³Iyong Ekapolon Akuj ipotori ekisil loteno nak ngulu isikokina ngakiro kech, ngulu kigienosi iyong.

⁴Kigienokin Ekapolon Akuj jiik, kainyo ngesi erai ataaba nakajik.

⁵Etiditeu ngesi ngulu enisasi, kinyasu ere lokaagongon a ngawasea lo alomito kesi, touko ngawasea keng toritak nalup.

⁶Lukolong echiakiaritae kesi tokona idamidamete a ngakejen kech.

⁷Iyong Ekapolon Akuj itenikini erot lo itorito lu etenooko, erurut ni itorito kesi.

⁸Kiwapit sua nguna isaki iyong, kigieno sua iyong, iyong bon kiitanit sua.

⁹Iyong iitanit etau kang nakwaare nabo kasaki ayong iyong lokojokon. Ani irirae iyong akwap ka ngitunga, itatamasi ngitunga daang anakwap ngakiro na eriyan.

¹⁰ Ngitunga luaronok, tani kesubere ngakiro naajokak, nyitatamasi jik akisub nguna eriyan. Tani anakwap alu etenooko, eringa esubete naaronok make, nabo nyiteete apolou kon, Akuj.

¹¹Ee Ekapolon Akuj, ikearit iyong akan, isaki akirirare ngimoe kon, nakaneni nyiteete kesi. Kisurum kesi ngileech, kimiek taanyut ngichan a eriras kon, Ekapolon Akuj. Kidodik kesi eger lo iminar iyong ngitunga kon lokojokon.

¹²Iyong Ekapolon Akuj kiinak sua ekisil, iyong ngesi isubi ngakiro kosi daang.

¹³Ekapolon Akuj, na irai Akuj kosi, kipolokis sua ngikapolok luche nakaneni iyong bon kilimorit sua atamar irai ekapolon kosi.

¹⁴Atoaka kesi nyeyarete nabo, aliworosi ngikaram nyeyarunete nabo, kainyo irira iyong kesi imunya, emam itwaan eringa itamunit kesi jik.

¹⁵Ekapolon Akuj, itopolo iyong akwap kosi, inyaa iyong akwap kosi alowaitin kadaang, ngesi tokona kipuruunitere iyong.

¹⁶Ekapolon Akuj, ibu iyong kirira ngitunga kon, kotere ngichan lu aanyunete kesi, apot kilipa iyong.

¹⁷Ekapolon Akuj, ibu iyong kisikalou sua loger a aberu ana enangi akidoun kisikalou apipilu a ariaba.

¹⁸Kikoni sua ngaberu nakipoti, ani enangi akidoun, atoriabakinos, atanangakinos kidouni ekuwam pas! Emam ayuuno kiyau sua nakwap nabo emam ngitunga kidoik sua nakwap.

¹⁹ Ngitunga kosi lu atoka, eyarete nabo! Eyarunete ngawat kech nabo. Ngulu daang ejotoote analielin kech, ekienyunete toeokis elakara! Itonyouni Ekapolon Akuj lukolong atoakete a angorot, loger lo itikilukiluuneta ngakop akwap.

²⁰Kasiosi ngitunga kang, tolomasi nakais kus togolokinos tooma. Toduka wadio tanang anyunyura a Ekapolon Akuj edaun.

²¹Ebunit Ekapolon Akuj anawi keng ana eyei nadis. Ebunit akirirare ngitunga a akwap kotere ngasechesea kech. Elimorete ngalup ngaakot nakolong abukorio idaitae, nyeringa ngalup idayete ngulu kolong aario.