Read turkana Isaya 27 Bible Online

Isaya 27 - turkana bible

Isaya 27

¹ Akolongit ngina, elemuni Ekapolon Akuj ekileng keng loationon egogong taarana, sodi kiriraa Lepiasan, emun lo eseleta, kikolianar. Iteli ngesi nabo emun loche loapolon loketubulon lo eyei nanam, taar.

²Akolongit ngina, elimuni Ekapolon Akuj ngakiro a amana keng anaajokon a ngimusabib tama,

³“Ayong Ekapolon Akuj arai eketan, etamasi ayong amana ngakipi jiik. Etee akwaar ka apaaran, sodi nyiinyasu itwaan.

⁴Nyeringa ayong angoikinit amana ngina. Arai toya ngiikwa ka ngirega, kesilek ayong echunyak akim.

⁵Nakaneni ani kesakete ngimoe a ngitunga kang atochoik ayong kesi, ejoikinit epote esila, ee robo, potu esila.”

⁶Moi ekisidi, Ngisirael lu eraakasi ngalesea a Yakobo, erupunete loger a ekitoe tokilikiluut topukiasi, sodi kileleba akwap ageor kech.

⁷Nyirira Ekapolon Akuj Ngisirael lokojokon loger lo eriraare ngimoe kech, kori nyetoaka ngitunga kech lukaalak, loger a ngimoe kech.

⁸Erirae Akuj ngitunga keng yaa nakwap nagela, tokuta kesi a ekuwam alokaronon ekutuni alo kide.

⁹Erimakinio ngasechesea a Ngisirael erai kesubakinosi ngakiro nugu, erai kelemun ngamoru a ngikenoi alu ipeyooto ngitunga lu nyenupito Akuj, kirie ngamoru nguna loger a emunyen, nabo nyiimiekin ngakisikwaanet a akuj anaberu be Achera ewaasi.

¹⁰Enyasun tokona ere lokolong adukitoe ngawasea, aramakis ngitunga edong erai ariet na esil. Aliwor achokor a ngaatuk, edakasi neni tourienikinos.

¹¹Aoko ngaten a ngikito abilasi, ikeyenete ngaberu kipooto. Ani aloger emamakar ibore eyenete ngitunga, nyepete Akuj na erai akasubunan kech ngisien anikech kori nyechamuni kesi.

¹²Akolongit ngina, napei alo Eupurate tanang lokukuoru a Misiri, echunakini Ekapolon Akuj ngitunga keng a ngapei-pei loger a itwaan ani epiesi ngakanoi.

¹³Akolongit ngina, ekutakinio aburuch tanyarae Ngisirael daang lukolong adokinete toloto Asiria ka Misiri. Ebongunete kesi Yerusalem kilipa Ekapolon Akuj alokidiama emukura keng.[19]