Read turkana Isaya 28 Bible Online

Isaya 28 - turkana bible

Isaya 28

¹Oitiakoi! Abe etioko nginyas eanyuni apolou a Isirael! Ikwaan ekipur keng ka ekiraun lo isiritoe anakies a ngikarikok alu irakarit epurot. Itukukunyitoe ngakies kech nakenisak nakaneni eperete kesi earit epurot.

²Aseu Ekapolon itwaan nikaadengan tojwono, ni ebuni kitijik kesi. Ebuni loger a akiru ana ngamoru, loger a akiru anakaalan, loger a akaale ana ijukun toburichia akwap.

³Ipudaario ekinis a ngikarikok alu irakarit epurot kangulu.

⁴Engopiari ekipur a ngikarikok alukenisak kangulu, loger a ngakalalio ana eraunete ekingaren nakamu kideparae daang tanyamae atipei.

⁵Enangi akolongit na ikwaanikinotor Akuj Namerikanyer ka ekiraun lo isiritoe alotunga keng alupiyayek.

⁶Einakini ngikatubok ngakiro aosou na eyeneta ngakiro na eriyan, kitededeng ngulu iteete ere.

⁷Tani ngikadwarak ka ngimurok a Akuj, irakarit epurot itereterosi. Amat kesi emuna ka epurot lokaalan aliworosi ipianganarosi kibilerite. Irakarit epurot ngikadwarak noi akuruwo tani akiyen ngakiro na idodeanakini kesi Akuj, nabo eraka ngimurok epurot noi echwangakis ngakiro na etubeenete alokesio.

⁸Ileleba ngalekan lomeesae kech, emam ewae lo eseg.

⁹Kengunungunotor ayong ebalasi, “Abe ebala mono logo ngae etatami? Ngae esaki akiirar ngakiro keng? Ngaye robo kerai ngide luuchik lubeen aringa epalikinete akinak!

¹⁰Esaki ngesi akitatam ngoni etingianari etal a ngapei-pei, iwapianari ngirotin a ngakiro a ngipei-pei, echiiwanari ngakitatamet a ngapei-pei.”

¹¹ Kasiosi, ani pekiirarete esi nakang, emeuni Akuj ngitunga lu ianete ngabukui nagelayek, ngitunga luparing a ekiruor, toroea adikilil kus.

¹²Kiinakini kolong Akuj esi akiangar ka alakara, nakaneni towout esi akiirar ngakiro keng.

¹³Kotere nguna, kitatami Ekapolon Akuj esi etingianari ngakiro a ngapei-pei, iwapianari ngirotin a ngakiro a ngipei-pei, echiiwanari ngakitatamet a ngapei-pei sodi kilegeun esi anakikalamikinet a apei. Towanas, kirumun, kitorik.

¹⁴Esi ngitunga lua ngiwog, lu ipolokinito ere a Yerusalem, topupokisi ngakiro na elimunit Ekapolon Akuj.

¹⁵ Abe iwojosi esi ibalasi ichamakinosi ka akitu tabalas ipupokina ka ni eyakasi ngikatoak. Inupito esi atamar ibucharosi erai kepot ngakiro naaronok, kainyo igienosi esi alioko ka ngakiro na isudio toyuunotor.

¹⁶Alimu tokona Ekapolon lo erai Ekapolon Akuj kona, “Ewaakini ayong lore a Sion amoru nateno nakaagongon, toliwor apir na itirokina. Igiritae kidiama keng ngakiro nugu, ‘Anupit ngina itirokina, etitinyikini.’

¹⁷Ngakiro na eriyan kesi eliworosi auno na itemere akitirokina keng toliwor ateneanut isitenene ngesi.” Ilotari akiru na ngamoru alioko na igienosi esi, inyasunete ngakalel ibore ni imechete esi.

¹⁸Itongopiario achamakin kus ka akitu, ikisario apupo na ipupotor esi ka ni eyakasi ngikatoak. Ani kepot ngakiro naaronok, kiwanete esi lokojokon.

¹⁹Ani kepot ngakiro naaronok nguna, kisubuusikinete esi lokojokon, kiwala towariu, kiwala towariu, akwaar ka apaaran. Ngakiro nacha epote ani a Akuj daang, eliworosi naketubulok!

²⁰Ikokinete esi itwaan ni eperi lokitanda louriyen, tokuruwo akitorwaar ngakejen, tasak akimukokin iworu niyoot, takad akwaan.

²¹ Enyouni Ekapolon Akuj ejie loger lokolong ajio alomoru a Perasim, ka adipo a Gibeon, sodi topedorea asubakin nguna esaki, tani keparing ngakiro na esubi ngesi. Erumori ngesi etich keng, etich loparing.

²²Tojongoto robo akienar ngakiro nakechikichik ayong esi! Ani kikokis esi neni, eroner noi eriras anikus. Eira ayong Ekapolon Akuj Namerikanyer ebala atiaku amunyar akwap daang.

²³Topupokisi ngakiro nakalimokini ayong esi, todetasi ngaki kiirasi ngakiro kang.

²⁴Eketan a, akichil ngalup bon echili jiik a? Akikusakin ngalup bon ikusae jiik a?

²⁵Ani kikusak ngesi ngalup torumor, kitak ngesi ngikinyam a ngikito aluketukukunyok akimuj, kitak ngakanoi ka erau, sodi kitak ngamuja nache lokwaasea a amana.

²⁶Eyeni ngesi etich keng kainyo itatami Akuj ngesi.

²⁷Nyelemuni ngesi aburo naapolon tadaunea ngichok alokinyam a ngikito alu itukukunyete akimuj, pearai elemuni akitoe naachi tadaya.

²⁸Nyedai ngesi ngakanoi jiik kainyo inyasunosi, eyeni ngesi akida kisitor aurukuk kidiama nyiirienya ngichok a ngakanoi.

²⁹Nia Akuj Namerikanyer ebunitor aosou ngina daang. Ereanakini Akuj ngakiro keng a aosou, nabo esubanakinosi jiik.