Read turkana Isaya 29 Bible Online

Isaya 29 - turkana bible

Isaya 29

¹Oitiakoi, Abe etioko nginyas eanyuni Yerusalem, lo erai ekeno a ngakipeyos a Akuj! Amunyar ere lokolong alomit Daudi! Edaun ekaru epei bu loche, ka ngisukukui kech,

²tani kikoni neni, eyauni Akuj ngakiro naaronok Yerusalem, ere lo enyaritae “Ekeno a Akuj.” Emini akigoro ka akiutere kikok ere daang ekeno lo eburuchiarito ngaakot.

³Eremi Akuj ere ngolo, sodi kitijik.

⁴Ikokini Yerusalem itwaan nikatoan, ni isileki akiruorikin alotooma ngalup, ikokini etoil lo ingaingaa anapua.

⁵Yerusalem, ngimoe daang lu kitijikinete iyong, ekutario loger a apua, ani ngasigerea kech nakamoitanak, epororete loger a ngatunyeny, sodi atipei tanangakinos esi.

⁶Akuj Namerikanyer, kiyuuni esi a agiro anaapolon ka arikirikokin a akwap. Emeuni ngesi ekuwam lo edirisit ta akim nakariran noi.

⁷Sodi ngasigerea a ngakwapea kadaang ana itijiyete Yerusalem, ka ngiboro kech lujiet daang, ipuripuriakinosi loger a ngakiro ana irujao, loger a ngitapoi alu akwaar.

⁸Ngakwapea daang na echunakina akitijwore Yerusalem, ikwaanikinosi ka itwaan ni enyamit akoro kiruja niti imuji, ani ekienyuni, torukau akoro eringa enyamit. Kori itwaan ni earit akure, kiruja niti emasi ngakipi, ani ekienyuni, torukau edokole eringa eonit.

⁹Kasiosi robo, toliworos lubaang! Ee robo, toliworos ngimuduk! Ipiangapiangasi kesi tarai nyemata emuna. Kiteroterokinos nyiira epurot.

¹⁰ Kisulurak Ekapolon Akuj esi, kiinak ngaju nakatoak. Ngikadwarak eraakasi ngakonyen a ngitunga, nakaneni arap Akuj ngakonyen kech.

¹¹Idaitae eger angakitoodikinet kadaang ana ngikadwarak. Ekokis akitab na agol emachar. Ani kiyaa iyong nitwaan ni eyeni akisomare tolimok tama, “Kisomakinae pan akitab naga,” elimuni ngesi tama, “Nyapedori ayong akisomakin kainyo egolitoe a emachar.”

¹²Ani kiyaa iyong nitwaan ni nyeyeni akisomare tolimok tama, “Kisomakinae pan akitab naga,” elimuni ngesi tama, “Nyayeni ayong akisomare.”

¹³ Ebala Ekapolon “Ngitunga lugu, kelipito ayong ka arima a ngakituk make, nakaneni eloka ngitai kech anikang. Kelipito kesi ayong kotere akiwapit ngitalio a ngitunga, lu etingito kesi a ngakies.

¹⁴Kotere nguna, asubakinea ayong kesi ngakiro nakatalarak, atobongonok ngakiro nguna jiik, kuumwokis kesi. Ngulu eosok, edaun aosou kech, ngulu echwaaka, engopiari achwaanu kech.”

¹⁵Oitiakoi! Abe etioko nginyas eanyunete lu esakete akimunon ngakiro na ereto ani a Ekapolon Akuj! Esubete kesi ngakiro kech idaito ebalasi, “Emam itwaan kingolikini ngoni kori kianyuni!”

¹⁶ Ilochito kesi ngakiro daang. Ikokini agulu ikwaanikin ka ekayen keng ai? Ibore ni esubuni itwaan, ikokini ai elimokini itwaan ngini tama, “Meere iyong kisubuni ayong!” Kori tolimok tama, “Nyiyeni iyong tani ibore ni isubi!”

¹⁷Eringa mono wadiochichi, ilocho amoni nakamutonon a Lebanon toliwor ngamanat naketurupak ngikinyam. Sodi kilochos ngamanat naketurupak ngikinyam toliworos amoni.

¹⁸Ani enangi ngirwa ngulu, Iirarete lukinim akitab isomao, lumuduk, lupalem eyakasi naribu, engaarosi ngakonyen kingolikis akwap.

¹⁹Ngitunga lu itiditeuna, eanyunete alakara nakitetet na ebunit ani a Ekapolon Akuj. Ichurokinete lukebootok a alakara ana ebunit ani a Ekapolon Akuj, ana erai Akuj a Isirael na italeuno.

²⁰Emunyario ngitunga lukamoitanak, emunyario ngulu imenyarito Akuj, daang lu etukosi akisub naaronok eario.

²¹Emunyari Akuj daang lu isudioto luche ngakiro, ngulu itikitikete eriras a luaronok ta ngulu iruorosi alioko sodi nyeeriamuneta lu etenooko ngakiro na eriyan.

²²Tokona bocha, Ekapolon Akuj na erai Akuj a Isirael nakolong ayuuni Aburaam alochan, alimu kona kotere Ngisirael, “Ngitunga kang, nyeringa esi kisirumio ngileech, nyeringa esi idayete ngakonyen kotere etimoi.

²³Na ingolikineta esi ngide lu kainakini ayong esi, ianyunete esi atamar ayong arai Akuj a Isirael na etaleuno. Kipuruunete esi ayong kitokera.

²⁴Ngulu ebangaaka, itatamasi ngakiro toyena. Ngulu iburaate jiik, echamunete akitatamo kang.”