Read turkana Isaya 3 Bible Online

Isaya 3 - turkana bible

Isaya 3

¹Anang tokona Ekapolon Akuj Namerikanyer ni elemarea alo Yerusalem ka Yuda ibore daang ni igienosi ngitunga. Elemari akimuj ka ngakipi.

²Elemari lukajwok ka ngasigerea, ka ngikatubok ngakiro, ka ngikadwarak kech, ka ngimurok, ka ngikarikok kech

³ka ngikarikok a ngasigerea kech, ka lua akwap, ka ngikesuruorok, ka ngimurok lu eyenikinitae ta ngikasubak lupean.

⁴Itiliwori Ekapolon Akuj ngisorok ngikarikok kus, ngide luuchik kipolokinete esi.

⁵Ichiakiarete ngitunga, kichiakiasi luche, kimenya itwaan daang erukitos keng, ka ekidunyet keng, nyekerete ngisorok ngikasukou, nyekerete ngitunga ngikapolok kech.

⁶Enangi akolongit na irumunea itwaan lokaatokeng, lo eyanatar tolimok tama, “Kona eyakar iyong eworu lo inapi, toliwor ekapolon kosi. Toliwor ekapolon kosi ngirwa lua ngichan lugu.”

⁷Etachuni ngesi tama, “Nyapedori ayong akingarakin esi! Emam akimuj anawi kang, emam tani ngiworui. Nyikitiliwosi ayong ekapolon kus.”

⁸Etige, abe inyasunosi ngitunga a Yerusalem! Abukorosi ngitunga a Yuda! Kainyo ngakiro na iruorosi esi daang ka ngakiro na isubete nyejoikinito Ekapolon Akuj, iyenya esi Akuj alope.

⁹Ngakiro na ipakanarotor a ngajorei, kesi alimosi aronis kech. Oitiakoi! Abe etioko nginyas ianyunete esi! Esi ngikulepek inyarakinosi naaronok.

¹⁰Elakarosi lu etenooko[2] kainyo emam naaronok eanyunotor. Eanyunete naajokak kotere etich kech.

¹¹Oitiakoi! Abe etioko nginyas eanyunete luaronok! Eanyunosi ka naaronok. Kainyo nguna kolong asubeta kesi luche, ngesi esubakinere kesi dang.

¹²Echiakiasi ngide ngitunga kang, apolokis ngaberu kesi. Ngitunga kang, kitooliyosi esi ngikarikok kus, sodi kibiler esi nyiiyena ni itorito.

¹³Anyou Ekapolon Akuj alimor nguna esechakinitae, anyou akirirare ngitunga keng.[3]

¹⁴Aloma Ekapolon Akuj loriras, ariku ngikasukou ka ngikarikok loriras. Erirak ebala, “Esi ngamanat a ngimusabib, ileleba ngiboro lu engasio alokebootok nakais kus.

¹⁵Ngae abala esi kichiakiasi ngitunga kang, kitadalatar ngikebootok? Ayong Ekapolon Akuj Namerikanyer ngesi alimu nguna.”

¹⁶Alimuni Ekapolon Akuj tama, “Kingolik eger lo inisatar ngaberu a Yerusalem! Eloose kesi itujakinito ngimosiringan, todongodongoote ngitunga. Ichugasi kesi eloose toruos ngasua anakejen kech.

¹⁷Nakaneni ayong Ekapolon Akuj erirae kesi, abanyi ayong ngakies kech emiek epalor.”

¹⁸Akolongit ngina elemari Ekapolon ngiboro daang lu inisatar ngaberu a Yerusalem, lu eraakasi ngasua na enapitae anakejen, ka ngibolio lua ngakies, ka ngalaga na a ngimosiringan

¹⁹ta ngigiel a ngakan. Elemari ngawarui na erapitotor kesi ngireetin,

²⁰ka ngapukoto kech ta ngikeriau lu enapito anakan ka lu enapito anaaborin.

²¹Elemari ngikabaabae lua ngimoyo ka lua ngikumes.

²²Elemari ngiworui kech lua ngisukukui, ka lukooyak, ka ludapal ta ngichuei a ngaropiyae.

²³Elemari ngiworui kech luchawor, ka ngawarui namieset ngakiinyir ta ngawarui na enapito anakies.

²⁴Akidwang kesi akiwosa akimiet nakaakunyon, ebosunete. Akidwang akinap ngarubae naajokak, enapete ngaunoi anaaborin. Akidwang ngitim lu eoitoe, eliwor ngakies kech napalor. Akidwang akinap ngiworui luajokak, enapete ngiguniae. Ilocho akibuseanu kech toliwor ngileech!

²⁵Eario ngikiliok a Yerusalem, tani lukajwok, eario alojie.

²⁶Ikalounete ngidorin a ere tosutonokis. Ikokini ere aberu na ibooyi analup, na ebutorit ngiboro daang.