Read turkana Isaya 30 Bible Online

Isaya 30 - turkana bible

Isaya 30

¹Alimu Ekapolon Akuj kona, “Oitiakoi! Abe etioko nginyas ianyunete esi ngitunga lu ipolokinito Yuda, kainyo ichanaka esi. Iwapito nguna nyarekinit ayong, nabo ichamakinosi emam etau kang, kidoko akisech nakisech nache.

²Inyounete esi alosit Misiri eringa nyingita ayong. Isakete esi Misiri kiyok esi, sodi kigienokinos ekapolon a Misiri.

³Nakaneni epalagagi Parao nyikingarak esi, nabo ayuuno a Misiri na igienosi esi, kilomakini esi nakiro naaronok.

⁴Tani kenangito ngikaweikinak kech lorerea a Soan ka Anes anakwap a Misiri,

⁵eriangakinosi ngitunga a Yuda ekisidi ani egienokinotor akwap na nyemunoi, akwap na edepari akingarakin kesi, toliwor isurumit ngileech.”

⁶Eraakasi nugu ngakiro na edodiuni Akuj kotere ngitieng lu eyakasi Negeb. “Eloose ngikaweikinak itorito nakwap nakaronon, na eyakasi ngingatunyo ka ngimunio lukadwarak ta ngimunio luapolok eseletasi. Ngisikiria a ngikaweikinak ka ngikaala kech, isiwokitae ngadekon nakaalak a ngaropiyae, einaritae ngitunga a akwap ana nyepedori akingarakin kesi.

⁷Erai akingarakino a Misiri pas, kotere nguna, aratak ayong ekiro be, ‘Emun lo nyikiwani.’ ”

⁸Katolimok Ekapolon Akuj ayong atamar egir namoru nadapal, nabo egir nakitab, eger lo erokiata ngitunga, sodi kiboikinos ngagiran nguna jik idodiunito aronis kech.

⁹Ichanaka kesi jiik, nabo eliokoko jiik, nabo nyepupete ngakitatamet a Ekapolon Akuj.

¹⁰Elimokinete kesi ngikadwarak tamasi, “Kililinga, tojongoto akiruoro ngakiro na iyookino. Tolimokinae sua ngakiro nakibobokinito, todwara alioko bon.

¹¹Kotosi alorot kosi, tojongoto akiriwokina lorot kosi. Nyikisaki sua tani wadiochichi akiirar ngakiro a Akuj anakus italeuno a Isirael kangina.”

¹²Nakaneni ebala Akuj a Isirael na italeuno kona, “Nyimisito esi ngakiro nakesuruori ayong, igienosi esi ekurikur ka alioko.

¹³Isechito esi. Ikote esi awas nakooyen na echii napei alokidiama tanang nalup, irimaunosi esi atipei loger a awas kangina.

¹⁴Iealarosi esi loger a amot analupe ana ebwanga kiealar tongop abelekek natinget tani akim, kori naokunet ngakipi anakuja.”

¹⁵Ekapolon lo erai Ekapolon Akuj, Akuj a Isirael na italeuno, alimoki kesi kona, “Ani kibongokis esi ayong, kiapunos kigienokinos, kiyuunio esi toliworos lua ngikilinga.” Nakaneni iwout esi asubakin nguna!

¹⁶Abe ibalasi esi, “Nyikisaki! Kisii sua a ngangolei kosi anakapiranak.” Iteni ipedorete esi amatar lokojokon, nakaneni epiraka lu kirisito esi akidwang esi!

¹⁷Ngitunga abunget apei anikus, ematarosi ingolikinete emoit epei, ngimoe ngikan make kisipungarete esi daang. Emam ibore idongi anasigerea kus pearai akitoe a apendera bon idongi naita a emukura!

¹⁸Tani kikote neni, kidarit Ekapolon Akuj esi akidodikin ajokis. Esaki ngesi akidodikin esi ngisien kainyo esubi ngesi jiik nguna iyookino. Epiaritae ngulu igienosi Ekapolon Akuj.

¹⁹Esi ngitunga a Yerusalem, nyeringa esi igorosi nabo. Kidodikini esi Ekapolon Akuj ngisien. Napei cha iirarea akigoro kus, ikii.

²⁰Kitaanyuni Ekapolon esi ngichan, nakaneni emini ngesi ilope neni kitatam esi, nyeringa nabo eduki.

²¹Ani kioliyosi esi alorot toloto teten kori kedieny, iirarete etoil alokaku ebala, “Erot logo kane, kiwapakisi.”

²²Ilemunete esi ngakujo kus nasubuna na eburuchiaritae a ngakwangae ka na eburuchiaritae a egolit, sodi tachakasi loger a asakatan ibalasi, “Kotosi kanege!”

²³Nacha itakineta esi ngikinyam kus, kitaram Ekapolon Akuj akiru torupuneta, toriamut esi ngalemet nakaalak, taanyut ngaatuk kus nginyia lukaalak.

²⁴Ngimongin ka ngisikiria kus lu isitao ngamanat, eanyunete nginyia lu itoonitoe niajokon kiwaakinae amakat.

²⁵Akolongit na elemarere ngawasea nakaagongok a ngimoe kus, sodi taarae ngitunga lu eyakasi neni, eleleunete ngayana alomoru ka ngimukur daang.

²⁶Ikwaanikin akicha a elap ka na akolong, torirau akolong ngariraunet ngakan-kaarei kikwaanikin ka akicha a ngirwa a ngikan-kaarei anakolongit a apei. Esubakinosi ngakiro nguna daang akolongit na eenea Ekapolon Akuj ngajemei nakolong ewaakini ngesi lotunga keng sodi kitedek.

²⁷Kingolikisi, Ekapolon Akuj yege ebunit anikalonan! Akim ka apuru na einikina idodiunito angoit keng. Emaranete ngipon keng kotere angoit, ikwaan angajep keng ka akim nakamunyaran.

²⁸Ikoni akianga keng ngakalel na elelearete ibore daang, kileleba tanangito ngakipi kech lodokole. Ekutari akianga keng ngakwapea lonyas ka atubor ngakiro naaronok na ereto kesi.

²⁹Nakaneni esi ngitunga a Akuj, ilakarosi esi toeoto, loger lo ieotor kiiya kiwala akolongit na esukukuu a Akuj. Ilakarosi esi lokojokon loger a ngitunga alu etupasi aloeosio a ngibunei, eloose kai a Ekapolon Akuj ana erai ataaba a Isirael.

³⁰Isiirari Ekapolon Akuj itwaan daang etoil a apolou keng, ka ationis a angoit keng. Epete ngasarae a akim, ka agiro nakaalan, ka ngamoru a akiru ta akiru nakaalan.

³¹Ebuli ngitunga a Asiria na iirareta etoil a Ekapolon Akuj, ka ationis a eriras keng.

³²Aramet daang nacha eramea Ekapolon Akuj ngitunga a Asiria, etupakini erue a ngiburin ka ngagitae. Akuj alope itijikini ngitunga a Asiria.

³³Asubakin kolong ni inomere ekapolon a Asiria a akim anakaalan. Echukul neni noi tabalany, nabo esenokinitoe ngakito tanang kidiama. Iangakini Ekapolon Akuj akianget keng kitonoku akim.