Read turkana Isaya 32 Bible Online

Isaya 32 - turkana bible

Isaya 32

¹Ebuni monan ekapolon lo etenoono, topolokis ngikarikok akwap a ngakiro ana eriyan.

²Ikokinete kesi daang ekal lo emechio alokuwam alo ekusi ka ni emechio alokuwam alo edirisit. Ikokinete kesi ngingololin anariet, ikokinete etorube a ataaba anaapolon, anakwap analapat.

³Engaarosi ngakonyen ka ngaki kech kingolikis ka akiirar ngichan a ngitunga.

⁴Ngulu palem ikirikirasi, etubete ngakiro a aosou. Ani lupalem iyagayagasi, iruorikinete ngakiro na ilereete.

⁵Nyeringa nabo etamario lubaang abe ikileenikinit, kori nyenyarao ngirukooi lu erimae.

⁶Iruoro ekabangabangat abaangu, naaronok itami ngesi asubakin. Eraakasi ngakiro keng daang ngakiyenyet Ekapolon Akuj. Nyisumuji ngesi lua akoro, kori nyitamasi lua akure.

⁷Erono itwaan nibaang nabo esubi ngesi ngakiro naaronok. Etuk ngesi amunyar ngikebootok kotere alioko keng ka akiratakin kesi nyeanyut ngakiro na eriyan.

⁸Nakaneni itwaan ni erimae, esubi ngakiro a ateneanut, nabo eneikina nakiro na eriyan.

⁹Esi ngaberu na iyakasi najako, nguna emam ngichan ianyunito. Todetasi ngaki kiirasi ngakiro kang.

¹⁰Imwokito esi tokona, nakaneni adaunet a ekaru a epei, ilungakinosi esi kainyo nyianyunete ngalemet a ngamusabib.

¹¹Esi ngaberu na ngoon iyakasi najako emam ngichan, tamaranikisi kotere ebuloi! Tobutosi ngiworui kus kidongo imuner, sodi tanapa ngakorisae anaaborin.

¹²Tarama ngirarumo kus kialolongo, kainyo enyasun ngamanat daang naajokak, ka ngamanat a ngimusabib,

¹³toruput ngiikwa ka ngirega anakwap a ngitunga kang. Kigoro kotere ngakais a ere daang nakolong ayei alakara.

¹⁴Ematarosi ngitunga alokai a ekapolon taramakis ngitunga alore aloapolon. Ngawiyei ka ngakais na edirisito na iyokiyere ere, inyasunosi jik. Eliworosi kesi ichurotor ngisikiria a moding nabo kesi edakasi ngamesekin.

¹⁵Ikokinete ngakiro neni, tanang ni ebukunio Akuj etau keng niyok. Eliwor ariet amana na ekoniuni akimuj, talalaketa ngalemet a ngamanat kikokis amoni.

¹⁶Isikokin ateneanut ka ngakiro na eriyan awadaang anakwap.

¹⁷Eyauni ateneanut ekisil, ka akiboi akaalimon ta amuno nakajik.

¹⁸Iboikinosi ngitunga kang nakwap na ekisil, min ekisil nawiyei kech, kibooyoto akaalimon. (

¹⁹Nakaneni erami akiru na ngamoru kinyasu ngamon,[20] sodi toukoroe ere.)

²⁰Elakarosi ngitunga daang kotere epete ngakipi a ngamanat ka nginyia a ngisikiria ta ngaatuk.