Read turkana Isaya 33 Bible Online

Isaya 33 - turkana bible

Isaya 33

¹Oitiakoi! Abe etioko nginyas ianyunete esi, ngimoe kosi, tani keringa esi nyemunyara! Idema esi ngitunga ngiboro, tarai emam itwaan kidema esi ngiboro! Ani ipalikinete esi akinyasun, kinyasun esi, ani ipalikinete esi ademar luche, kitedemar esi.

²Ee Ekapolon Akuj, kidodikinae ajokis kon. Kigieno sua iyong. Kiyokoi sua akolongit daang, kitoyuu ngirwa lua ngichan.

³Na irurumakinea iyong, tamataros ngitunga, na inyounio iyong, topetaros kesi.

⁴Ekakaunio ebari kech tomoriakinos ngitunga.

⁵Epol Ekapolon Akuj! Epolokinit ngesi ibore daang. Ilelebi ngesi Yerusalem ngakiro na eriyan ka ateneanut.

⁶Kitoweyi ngesi esi, iyoki ngesi ngitunga keng jiik, nak aosou ta achwaanu. Ebari kech loapolon ngesi akiker Ekapolon Akuj.

⁷Enyarasi ngikiliok lukajwok esakete akingarakino. Ngikaweikinak a ngakwapea lu esakete ayaun ekisil, igorosi tokona lokojokon.

⁸Esilok ngirotin luapolok, emam ngikalotok eyakasi. Anger ngakiro na achamakinoi, emenyar ngikaanyunak. Nyeringa erimae ngitunga nabo.

⁹Ibooyi akwap kongin, esil. Aoniyosi ngamon a Lebanon, adipo naajokon a Charon, ekok ariet, nabo erarasi ngakui alokito alo Bachan ka emoru a Karimel.

¹⁰Alimoki Ekapolon Akuj ngibukui kona, “Anyouni ayong tokona, edodiu agogongu kang.

¹¹Ngakiro daang na irekinito esi, eraakasi pas, ngakiro na isubete esi ngaka pas. Ikwaan etau kang ka akim nakimunyari esi.[21]

¹²Irabokoikinosi esi loger a ngatabab ana inomio toliworos emunyen, kori ngiikwa lu inomio tarata ekuron.

¹³Ngitunga daang, lu eloka ka lu eapiyete, kimiek kiirasi ngakiro na asubi ayong toyena apolou kang.”

¹⁴Ebulit ngitunga lukasechak alo Sion, emaranete lu nyenupito Akuj ebalasi, “Ngae iboikinosi ka akim nakamunyaran? Ngae aniyok enaikini akim na erirae nakajik?”

¹⁵Itwaan enaikini ngesi ni etenoono, kiruoro nguna a iteni, ngesi ni nyingalaanari ngikebootok ngiboro tabarea, ngesi ni engeri adiakanot a ngaropiyae, ngesi ni engeri alomar ni etukore akiar, ka amuduk nyeanyunga naaronok.

¹⁶Itwaan ngini, iboikin akaalimon, ikokini awi keng awas nakaagongon a ngatabab, eanyuni akimuj na enyami ka ngakipi namatan.

¹⁷Ingolikinete esi ekapolon epolokini akwap naapolon a apolou anaationon.

¹⁸Iliworosi esi na itamuneta ngakiro nangorok, ingitasi make tamasi, “Nyaalu mono ngikemarak yok, ka ngiketubukok echur? Nyaalu ngirototin?”

¹⁹Nyeringa nabo ingolikinete ngitunga lukamoitanak lu iruorosi ngabukui na nyiirarete esi.

²⁰Kingolikisi Sion, ere lo kinyamea ngoni ngisukukui a Akuj! Kingolikisi Yerusalem! Erai akwap a ekisil, ejok elomio. Ikwaan ka eam lo itirokina nalup, lo nyedituunun ngakito keng na ngalup, nabo nyengedaanasi ngaunoi keng.

²¹Kidodikini Ekapolon Akuj ngoni ajokis keng. Ikokini akwap na eyakasi ngangololin ka ngayana nabalany. Nyitorete ngatubwae a ejie kori na ngikapolok.

²²Ekapolon Akuj ngesi ekatubon ngakiro yok, ngesi kipolokin ngoni, ngesi kiyuununi ngoni.

²³Eliworosi ngaunoi na eenitere ngatubwae nguna pas, nyepedorete akitowo atubwa. Atangatasi ngoni ngiboro lukaalak, engatarete tani luangwalak.

²⁴Emam itwaan a akwap yok ni eringa etamari, “Adeaka ayong.” Erimakinio ngasechesea daang.