Read turkana Isaya 34 Bible Online

Isaya 34 - turkana bible

Isaya 34

¹Esi ngitunga a ngakwapea kadaang! Tochununos topupokisi. Topupok akwap etia ni etia, ka ibore daang eyei tooma keng.

²Angoiki Ekapolon Akuj ngakwapea daang ka ngasigerea kech daang. Ainaki kesi eriras lo a akitu.

³Nyenukio ngawat kech, pearai idongete eperete neni tobosa. Iterengete ngaakot kech ngimoru.

⁴ Akolong, ka elap ta ngikanyer, ebosete tararaunos nalup. Engopiari adis loger a ejemu alo elugurikinio tolemarae. Eraraunosi ngikanyer loger a ngakui a emusabib kori ana emeyan.

⁵Alemu Ekapolon Akuj ekileng keng loapolon anadis taarea ngitunga a Edom. Eraakasi ngulu ngitunga lu erira ngesi atamar totoka.

⁶Eburichiarete ekileng ngolo ngaakot ka akimiet, kikokis ngaakot ka akimiet a ngimesekin ka ngaanei esaa lo engolere kipeyoore. Elemuni Ekapolon Akuj ngakipeyos nguna alore a Bosira, ka aaranot a ngitunga alukaalak anakwap a Edom.

⁷Eario ngitunga loger a ngikosowa, kori loger a ngitak ka ngimongin, iterengete ngaakot ngalup ngaakot na eburuchiarit akimiet.

⁸Eyei Ekapolon Akuj akolongit na eyuunea Isirael, tatachak naaronok alomoe kech.

⁹Ilochosi ngangololin a Edom toliworos elaam, toliwor echoto kech ngipip a akim, toliworos ngalup elaam lo enoki.

¹⁰ Enoki akwaar ka apaaran, talakak apuru na edirisi kidiama jik. Kidong akwap erai ariet napei analesit a apei tanang nache nabo emam ekaloton itori neni jik.

¹¹Tatula ka ngikuruka kesi irumete akwap. Itiliwori Ekapolon Akuj akwap alapatu na ibooyi pas, loger lokolong ekoni eringa nyesubuna.

¹²Enyarao akwap ngina, “Namam kapolon,” kainyo nyepete nabo ngikarikok.

¹³Erupunete ngiikwa ka ngirega anakais kadaang a ngikapolok, ka ngirerea lu edukitoe ngawasea, toloma ngikolowoi ka tatula.

¹⁴Epete ngitieng a moding neni, tanyaras ngipean make. Ebuni ekipe lo akwaar[22] neni esaki ni elomi.

¹⁵Edukete tatula ngakais kech, toureta ngabeyei, tobekut ngitak kech, kitana kaneni. Echunasi ngataruk inaa a ngapei-pei.

¹⁶Ani kisomata akitab a Ekapolon Akuj, iyenunete atamar esubakinosi nguna daang. Ekapolon Akuj ngesi adunguni atamar ikokinete neni, ngesi elope echunakini kesi.

¹⁷Ekapolon Akuj ngesi ekorakini ngitieng ngulu akwap, kiboikinos neni napei analesit a apei tanang nache, eliwor akech jik.