Read turkana Isaya 35 Bible Online

Isaya 35 - turkana bible

Isaya 35

¹Elakar ariet ka akwap nakoonon, ekilikiluunete ngatur a ariet.

²Elakar ariet toeok kimaritetek, ibuser loger a ngimoru a Lebanon, iturupete ngalup ngikinyam loger a ngamanat a Karimel ka Charon. Ingolikini itwaan daang akibuseanu a Ekapolon Akuj ka agogongu keng.

³ Kitogogongo ngakan napalag ka ngakungin na emaranete elilimiyorito.

⁴Tolimokisi ngulu iloit ngitai kona, “Totitinyeketo nyieam! Ebuni Akuj ayuun esi ka akirirare ngimoe kus.”

⁵Ingolikinete lumuduk, iirarete lukinim.

⁶Eporete luangwalak loger a agete, eeokinete ngangajepa alu nyiruorosi, kiremasi elakara. Eleleunete ngangololin anariet,

⁷eliwor asinyen na erirae anam, eliwor akwap nakoonon ngileleae. Nikolong alomito ngikolowoi, erupuni asirite ka atiriwae.

⁸Emini erot loapolon neni, lo enyaritae, “Erot lo italeuno.” Emam ekasechan itori lorot ngolo, emam ngikabangabangae lu ibatarete ngitunga lu iwapito erot ngolo.

⁹Emam ngingatunyo epete neni, emam ngitieng lukaadengak itorunete neni. Ngulu ayuu Ekapolon Akuj, kesi eloose nawi iwapito erot ngolo.

¹⁰Enangete kesi Yerusalem elakara, eeosi ikareete. Elakarosi kesi jik, nyeanyunosi nabo jik ka akialolong kori esinyoi.