Read turkana Isaya 36 Bible Online

Isaya 36 - turkana bible

Isaya 36

¹Ekaru lo a ngitomon ka nguomwon lo araakar Esekia ekapolon, abu Senakerib lo arai ekapolon a Asiria torem ngirerea a Yuda lu adukitoe ngawasea, sodi tolema.

²Tomea ngesi ekarikon a ngasigerea keng alo Lakich, tolot Yerusalem erikit ngasigerea nakaalak akitijwore ekapolon Esekia. Toloma ngasigerea nguna lorot lo edonyeenere ngiworui, ni eyei echilet lo echilunit ngakipi anatapar ana alokidiama.

³Kisiriamuut ngitunga a Yuda nguuni ngesi, ngitunga ngulu kesi Eliakim lokookeng a Ilikia, lo aweikinit akai a ekapolon, ka Chebina lokegiran ta Yoa lokookeng a Asap lo arai ekegiran ana asubasi anakwap.

⁴Tolimok ekarikon a ngasigerea a Asiria kesi tama, “Tolimokisi Esekia atamar ingita ekapolon a Asiria kona, ‘Nyoni mono igieno iyong?

⁵Itamit iyong atamar itemunete ngakiro make ajwonu a ngasigerea ka ekileenu kech a? Ngae tokona igieno iyong kingeritor ayong?

⁶ Abe itamit iyong atamar kingarakinete ngitunga a akwap a Misiri, nakaneni ikoni ibore ngini alemun akasirimait kichogaa. Ebil akasirimait ngina kichum akan kon. Ikoni ekapolon a Misiri neni kigienokin itwaan ngesi.’ ”

⁷Torubak ekapolon loochi a Asiria ngolo iruoro ebala, “Kori robo isaki iyong alimokin ayong atamar igieno iyong Ekapolon Akuj, na erai Akuj kon? Esekia ngesi enyasuni ngasenon ka ngikenoi a Ekapolon Akuj na alimokinea ngitunga a Yuda ka Yerusalem atamar kilipa alokeno alo ipeyonokinere Akuj, ekeno lo erai epei bon.

⁸Kibolokin ayong ka iyong alokiro a ekapolon a Asiria. Kamekini ayong iyong ngangolei ngabunge ngaarei erai kianyu iyong ngikiliok ngabunge ngaarei lu edokete tometa!

⁹Kidwangi iyong tani ekarikon a ngasigerea a Asiria loochi lo nyeyenikinitae. Tani ikoni neni, abe eringa iyong isaki Ngimisiri tomeut ngaurukukui na irito ngangolei ka ngikameak ngangolei nikon.

¹⁰Esibit iyong aremit ayong akwap kon ketiji iyong pekengarakinit Ekapolon Akuj a? Ekapolon Akuj alope kalimokini ayong atamar torem sodi kinyasu.”

¹¹Apot Eliakim, ka Chebina ta Yoa tolimokis ekapolon loochi a Asiria ngolo tamasi, “Kisuruoroe kare sua a Ngaramaik, kipupi sua. Nyiiruor Ngaeburaniae kainyo epupokinito ngitunga daang lu eyakasi nawas a ere.”

¹²Tatachu ngesi tama, “Itamito esi atamar kameunit ayong ekapolon a Asiria nikus ka ekapolon kus make, alimokin ngakiro nugu a? Mam jik. Esuruori ayong tani ngitunga lu edokito ngawasea, lu enyamete ngachin kech, tamata ngakul kech loger kus.”

¹³Abu ekapolon loochi ngolo tonyou towo kirema a Ngaeburaniae tama, “Topupokisi ngakiro a ekapolon alo eyenikinitae, alo erai ekapolon a Asiria!

¹⁴Ebala ekapolon kona, ‘Warasi Esekia nyikingal, nyikiyuuni ngesi esi.

¹⁵Warasi nyiichamut ngesi kimaimai esi kigienokinos Ekapolon Akuj. Nyiitamasi kori kiyuuuni esi Ekapolon Akuj. Nyiitamasi tani nabo kori iratakini ngesi ngasigerea nakosi a Asiria nyeelemasi ere kus.

¹⁶Nyiirasi ngakiro a Esekia! Kidungokinit esi ekapolon a Asiria atamar topudutu alore esila. Kichamakinio esi inyamete ngamusabib alokito a ngimusabib alu eraakasi ngikus a ngikulepek. Tanyama ngameyana alomeyana alu eraakasi ngikus a ngikulepek, nabo tamata ngakipi anakare ana eraakasi ngakus a ngikulepek.

¹⁷Tanang abuni ayong katoriko esi ketolom nakwap na ikwaan ka nakus. Eyakasi akwap ngina ngamanat a ngimusabib alu epureenere emuna, toyakas ngakiria na ipoore ngamugati.

¹⁸Warasi Esekia nyikingal esi tamasi kori kiyuuni esi Ekapolon Akuj. Apot kolong sek ngakujo a ngibukui aluche toyuut ngakwapea kech alokapolon a Asiria a?

¹⁹Nyaanu tokona ngakujo a Amas ka Aripad? Nyaanu ngakujo a Separipaim? Eyei kolong itwaan abu toyuu Samaria a?

²⁰Wori kolong ayuunea tani apei a ngakujo kanguna akwap keng ani a ekapolon a Asiria? Ani nyo tokona itamitotor esi atamar eyuuni Ekapolon Akuj Yerusalem?’ ”

²¹Kililinga ngitunga chek loger lo alimokinitor kesi ekapolon Esekia atamar kililinga. Amam akiroit alimut kesi.

²²Apot Eliakim ka Chebina ta Yoa tochilichilaasi ngiworui kech ialolongete, toloto alimokin ekapolon Esekia ngakiro daang na alimu ekapolon loochi a Asiria.