Read turkana Isaya 37 Bible Online

Isaya 37 - turkana bible

Isaya 37

¹Napei eirarea Esekia ngakiro na esisaunete kesi, tochilichilia ngiworui keng ialolongi, tanap ngiguniae. Abu ngesi tolot kai a Ekapolon Akuj.

²Abu ngesi tomea ngitunga nia ekadwaran a Akuj alo anyaritae Isaya, lokookeng a Amos. Ngitunga ngulu kesi Eliakim lo aweikinit akai a ekapolon, ka Chebina lo arai ekegiran a ngikesio ta ngimurok a Akuj luapolok. Anapito kesi daang ngiguniae.

³Tolimok Esekia kesi atamar tolimokis Isaya kona, “Erai akolongit naga aka ngichan. Kirirao sua nabo kirumito ngileech. Kikok sua aberu na adol akidoun nakaneni alilimiyo emam kona idinyakini.

⁴Ameu ekapolon a Asiria ekapolon lo etupit ngesi akimeny Akuj na eyari. Agasi atamar kiira Ekapolon Akuj na erai Akuj kon ngimeny ngulu sodi kirira ngitunga lu alimunete. Kilip robo Akuj kotere ngitunga yok lupiyayek.”

⁵Ani iirari Isaya ngakiro a ekapolon Esekia, tobua ngitunga ngulu nikeng ebala,

⁶“Ebala Ekapolon Akuj, warasi Ngisiria nyikitubul esi ani ebalatar nyikiyuuni esi Ekapolon Akuj.

⁷Isiirari Ekapolon Akuj ekapolon a Asiria ngakiro na itorotokinete tobong nakwap keng. Ani enangi inaa, itaari Ekapolon Akuj ngesi ngitunga.”

⁸Abu ekapolon loochi a Asiria kiira atamar arotoki ekapolon a Asiria alo Lakich, alot akitijwore ngitunga a ere a Libina. Tolot ekapolon loochi ngolo inaa aanyun ka ekapolon keng.

⁹Apot Ngisiria kiirasi atamar ebunit ajore a Ngimisiri akitijwore kesi, erikit ekapolon a Kuch lo enyaritae Tiriaka. Ani iirari ekapolon a Asiria ngakiro nguna, nak itwaan abarua na einari Esekia,

¹⁰lo arai ekapolon a Yuda. Egiritae abarua ngina ngakiro nugu, “Kilimok iyong Akuj na igieno iyong atamar nyekedwangi ayong iyong, nakaneni wara ngakiro nguna nyikingalata iyong.

¹¹Iira iyong ngakiro na esubeenea ekapolon a Asiria akwap nacha esaki ngesi akinyasun. Esibit iyong ipuun iyong a?

¹²Enyasunete kolong taapaakosi ngirerea a Gosan, ka Aran, ka Resep, sodi taara ngitunga a Beseden lu alomito Telasar. Emam ngakujo kech na apot toyuut kesi.

¹³ Nyaanu ngakujo a ngirerea alu enyaritae Amas, ka Aripad, ka Serapaim, ka Ena ta Ipa?”

¹⁴Kidiau ekapolon Esekia abarua alotunga alu ameunitae kisoma. Ani erumor tolot kai a Akuj, kiwaak abarua ngaren Ekapolon Akuj,

¹⁵sodi kilip ebala,

¹⁶“Ekapolon Akuj Namerikanyer, na irai Akuj a Isirael. Ibooyi iyong alokidiama ngiborei lua ngabeben. Iyong bon irai Akuj, ipolokinit ngapolosio daang anakwap. Isubuni kolong iyong akwap ka adis.

¹⁷Kingolik tokona Ekapolon Akuj na Ipol Noi ngakiro na esubasi anikosi. Kiira ngakiro daang na iruoro Senakerib, kimenyi iyong Akuj na iyari.

¹⁸Kiyeni sua daang atamar enyasut ngikapolok a Asiria ngibukui lukaalak, kidongo ngakwapea kech esil.

¹⁹Enoma kesi ngakujo a ngibukui kangulu. Pearai tani ngakujo nguna ngakujo dir, araakasi ngakito ka ngamoru na esubunitae eraakasi ngakisikwaanet a ngakujo.

²⁰Tokona Ekapolon Akuj na irai Akuj kosi, toyuunae sua ani a Ngisiria sodi toyeneta ngibukui a ngakwapea kadaang atamar iyong bon Ekapolon Akuj irai Akuj.”

²¹Abu Isaya lokookeng a Amos tomea itwaan alimokin ekapolon Esekia kona, Ani kona ilipea iyong Ekapolon Akuj na erai Akuj a Isirael, a ngakiro a Senakerib alo erai ekapolon a Asiria,

²²ngakiro nugu kesi alimu Ekapolon Akuj kotere Senakerib, “Iyong Senakerib, kikianatar iyong ngitunga a ere a Yerusalem, kimenyarito.

²³Esibit iyong ngae imenyi iyong ka akianar? Nyidodiuna iyong arimatoi anikang, ayong Akuj a Isirael na etaleuno.

²⁴Imeuni iyong ngikasubak etich kon, potu akiwoganakin ayong atamar, ilema iyong ngimoru lukooyak alo Lebanon, a ngaurukukui kon kadaang ana irito ngangolei. Iwoga iyong ibala itub alomoru kangulu ngichekereng lukooyak ka ngidomou luajokak, tanang kiding ngamon nikamutonon.

²⁵Iwoga iyong ibala iboki ngakare, sodi tamat ngakipi anakwapea anagelayek. Ibala nabo iyong epudaate ngasigerea kon angolol a Nili kitoono.

²⁶“ ‘Nyiirara iyong nakanuan atamar arekini ayong nguna kolong a angorot a? Nakaneni asubak tokona ayong nguna daang. Kainak kolong ayong iyong agogongu na ilochio ngirerea lu edukitoe ngawasea tosenokinos.

²⁷Apalag ngitunga lu alomito inaa, akuriaka kesi abulit. Ekote kesi nginyia lu eyakasi naro. Ekote nginyia lu erupunito alokidiama akai, lu etoon ekuwam lokariran a akide.[23]

²⁸Nakaneni ayeni ayong ngakiro kon daang, ayeni ngakiro na isubi iyong ka ni ilosi iyong. Ayeni ayong eger lo kingoikinitor iyong ayong.

²⁹Eira ayong ngakiro a angoit kangina ka ngiwog kon, akodakini ayong ekodait lokume kon, erepak akitoe nakituk kon, sodi katoriko iyong tobongo kitor lorot lopei kolong iwapuuni.’ ”

³⁰Abu Isaya tolimok ekapolon Esekia tama, “Emachar lo idodiuni ngakiro na esubakinosi. Ekaru logo, ka loche lo etupit logo, inyamete esi ageor na alomoding bon. Ani ekaru loche, itakinete esi ngamanat kus tolema. Itakinete ngikito a ngimusabib, tanyama ngimusabib.

³¹Ngitunga a Yuda lu idongete, isikokinosi kikokis nginyia lu ilijasi ngaten nalup, ani erumor tokoniut ageor.

³²Epuunosi ngitunga ngiche a Yerusalem ka emoru a Sion, kainyo esaki Akuj Namerikanyer nguna kikokis neni.

³³“Ngakiro nugu kesi alimu Ekapolon Akuj kotere ekapolon a Asiria, ‘Nyelomuni ngesi lore kori nyegumuni tani emal a akau. Emam ngasigerea na etingito ngaupwala na eapuunete lore. Emam ngakatiputipui a ejie na edukio kiriama ere.

³⁴Ebongori ngesi iwapit erot lopei ngoon abunio, eringa nyelomuna lore logo. Ayong Ekapolon Akuj alimu nguna.

³⁵Eratakini ayong ere logo atoyuu kotere ekipur kang a ilope, ka ngakiro nakolong echikakini ayong ekasuban etich kang Daudi.’ ”

³⁶Akolongit ngina nakwaare, tolot emalaikat a Ekapolon Akuj nadakar a Ngisiria taar ngasigerea 185,000. Ani iwalari akolongit nache, aperete kesi daang kaneni etoakito!

³⁷Abu Senakerib lo arai ekapolon a Asiria tobongo nakwap keng, tolot Ninewi.

³⁸Akolongit apei, na elipitor ngesi alokai a akuj keng ana anyaritae Nisirok, apot talokookeng ngiarei lu anyaritae Adiramelek, ka Chareser taara ngesi a ngilengea kech, todokis kesi toloto nakwap a Ararat. Abu lokookeng eche lo anyaritae Esaradon kilunyokin nados keng toliwor ekapolon.