Read turkana Isaya 38 Bible Online

Isaya 38 - turkana bible

Isaya 38

¹Ngirwa lupei ngulu, todeakakin ekapolon Esekia tonyou akitu. Tolot ekadwaran a Akuj Isaya lokookeng a Amos aanyun ngesi tolimok tama, “Ebala iyong Ekapolon Akuj tosubak ngakiro daang kitiriyan, kainyo nyengalekini edeke kon. Tosubakin kiteu akitu.”

²Torei Esekia tokienyik esiep a akai kilip tama,

³“Ekapolon Akuj, kitam atamar asub ayong etich kon ewapit ngakiro kon atarai lokamuno iyong, nabo asak ayong ngirwa daang akisub ngakiro na isaki iyong.” Abu Esekia kikalou lokojokon.

⁴Sodi tolimok Ekapolon Akuj Isaya akiroit,

⁵atamar tobongo nia Esekia tolimok tama, “Ayong Ekapolon Akuj na arai Akuj a apaakon Daudi, eira akilipit kon nabo engolik ngakiyo kon. Kemiekini ayong iyong toyar ngikaru ngiche lu eraakasi ngitomon ka ngikan.

⁶Kayuuni ayong iyong ka ere lo a Yerusalem logo ani a ekapolon a Asiria. Eratakini ayong ere logo.”

⁷Tatachu Isaya tama, “Ibore en kidodikini iyong Ekapolon Akuj toyenea atamar irichakini ngesi ngakiro nakichikak iyong.

⁸Adoket nakolong aduki ekapolon Aas, isiyotori Ekapolon Akuj etorube akamaluwot ngakikalamikinet ngatomon.” Abu etorube ngolo kiyoto akamaluwot ngakikalamikinet ngatomon.

⁹Ani engalekini ekapolon Esekia, abu ngesi kigir eeos logo lobuakinet Akuj alakara.

¹⁰“Abu atama kori atoani alosorokane kang, tadaikin ngikaru kang lu idongito naliel.

¹¹Atama kori nyengolikini Ekapolon Akuj nabo, anakwap a ngitunga alu eyarete, atama kori nyengolikini ngitunga kirukit ka lu eyakasi nakwap.

¹²Atuboritae akiyar kang tasalu, loger a eam alo eyatario, loger a eworu alo etubunio anidonyiet. Atama kori ayau Akuj esal kang.

¹³Egoro ayong akwaar kiiya kiwala kotere apipilu, tosub kerobirobi engatuny ngakoyo kang. Atama kori ayuu Akuj esal kang.

¹⁴Toliwor aruo loger a logecha, toliwor akunua loger a akuuri. Tobur ngakonyen kang kotere akirereorit nadis asaki kengarakin. Ekapolon, toyuunae ayong alochan kalu kadaang.

¹⁵Nyaanu na alimuni? Ekapolon Akuj asubaki nguna. Kariebete ayong ngakiro etau, nyepote ngaju.

¹⁶“Ekapolon, ayari ayong kotere iyong bon. Kitangalekinoe atoyar.

¹⁷Ilocho apipilu kang toliwor ekisil. Kiyuu iyong ayong anaaronok kadaang. Irimak iyong ngasechesea kang daang.

¹⁸Emam ekatoan lo kipuruuni iyong. Nyigienokinosi lukatoak ateneanut kon.

¹⁹Ngitunga lu eyarete kesi kipuruunete iyong, loger lo tokona kepuruunitor ayong iyong. Elimonokinete ta apa ngide kech eger lo iraakar iyong lokimunoi.

²⁰Ekapolon Akuj, kitangalek iyong ayong. Kirami ngagitae atoeokisi kikusi iyong, epuruutu iyong alokai kon ngirwa daang lu kiyarea.”

²¹Alimokinit sek Isaya ekapolon Esekia atamar tomunak ngameyana dio toretorea elepunait keng, sodi tangalek.

²²Engita sek Esekia abala, “Nyo idodiuni atamar alosi ayong kai a Akuj?”