Read turkana Isaya 39 Bible Online

Isaya 39 - turkana bible

Isaya 39

¹Ngirwa lupei ngulu, kiira ekapolon a Babilonia lo anyaritae Melodak Baladan lo arai lokookeng a Baladan atamar adeakakin ekapolon Esekia. Abu ngesi tomea ngitunga inasi Esekia abarua ka ainakinet.

²Kipeyou Esekia ngipeyok kidodik ebari keng. Kidodik tani ngakwangae ka egolit, ngikito lu itukukunyete akimuj, ka ngamieta nakaakunyok ta ngiboro keng daang a ejie. Emam ekeru keng tani epei lo abu kidong nyidodikina ngesi kesi. Kidodik Esekia kesi tani ngiwaitin daang a akwap keng.

³Sodi tolot ekadwaran a Akuj Isaya nia ekapolon Esekia kingit tama, “Aliwae eponitotor ngitunga lugu? Abalasi kesi iyong ai?” Tatachak Esekia tama, “Eponito anakwap anakalonan enyaritae Babilonia.”

⁴Kingit Isaya ngesi tama, “Nyoni aanyungarete kesi alokai kon?” Tatachak Esekia tama, “Aanyungasi kesi ibore daang. Emam ibore daang ni eyei lokerui ni nyidodikina ayong kesi.”

⁵Abu Isaya tolimok ekapolon tama, “Kiira akiroit a Akuj Namerikanyer.

⁶Kingolik a, enangi akolongit na elemarere ibore daang alokai kon, ka ngiboro lukolong ekachete taapaakon napei kolong jik tanang akolongit naga. Iritorio ngiboro ngulu daang Babilonia. Emam ibore idongi.

⁷ Erikio ngalesea ngache na iyanatar iyong, toliworos ngikiliok lu idongitoe lu esubete etich alokai a ekapolon a Babilonia.”

⁸Abu Esekia tolimok Isaya tama, “Ejok akiroit a Ekapolon Akuj na ilimu iyong.” Etami ngesi abala, “Abe ejok bo erai kemin ekisil kiratakin ibore daang ngirwa daang lu ayarea ayong.”