Read turkana Isaya 40 Bible Online

Isaya 40 - turkana bible

Isaya 40

¹Ebala Akuj, “Kisililinga ngitunga kang, kisililinga kesi!

²Kisuruoro ngitunga a Yerusalem totitinyeketo. Tolimokis kesi atamar aup kesi eriras nakaneni arimakin tokona ngasechesea kech.[24] Ainak ayong kesi eriras lo itemokino kotere ngasechesea kech daang.”

³ Epupio etoil a itwaan echala ebala, “Tosubakisi erot a Ekapolon Akuj nariet! Kitenikisi erot a Akuj yok anariet!

⁴Kileleba ngadipoe daang, kireriakisi ngimoru daang. Eliworosi ngimukur nilapat, tosulutut akwap nangarab.

⁵Etakanuni akwangis a Ekapolon Akuj, ingolikinete ngitunga daang. Alimu Ekapolon Akuj nguna.”

⁶ Epupio etoil a itwaan echala ebala, “Tolimo!” Engis ayong atama, “Anukiro alimori?” Tolim tama, “Tolimo atamar ikwaan ngitunga daang ka nginyia, ikwaan akibuseanu kech ka ngatur a moding.

⁷Eokete nginyia nabo erinyokinete ngatur, napei cha itukutunea Ekapolon Akuj ekuwam. Ee robo, erai itwaan nginyia.

⁸Eokete nginyia, nabo erinyokinete ngatur, nakaneni erubi akiroit a Akuj jik.”

⁹ Yerusalem, todoka moru lokooyen tolimo ngakiro naajokak! Sion, kirema lokojokon tolimo ngakiro naajokak![25] Kiruorik nyiem. Tolimok ngirerea a Yuda atamar ebunit Akuj kech!

¹⁰Ebunit Ekapolon lo erai Akuj aliwor ekapolon lo eyei apolou naationon, kirukut ka ngitunga lu ayuu ngesi.[26]

¹¹ Iyoki ngesi esipanit keng loger a ekeyokon, echunakini ngesi ngimesekin luuchik tadak alorarum, sodi torik namanang wadio.

¹²Ngae epedori akitem ngakipi a anam a akan anidapal, kori ngae itemi adis a ngakan keng? Ngae epedori akiting ngalup a akwap alotooma ekopo, kori kitem ngimoru ka ngimukur anaratilio?

¹³ Ngae epedori alimokin Ekapolon Akuj ngakiro na ejoikinit esubi? Ngae epedori akitatam ka akisian ngesi?

¹⁴Nia Ngae eloseene Akuj taanyunea aosou? Ngae etatami ngesi ngakiro na eriyan? Ngae ainakini ngesi aosou na eyenea ngakiro?

¹⁵Eraakasi ngibukui pas ani a Akuj ikwaan ka ngakipi na idokakin nibore, isikwaanitae kesi ka apua anakitemiet, eeok ngikwarin ikwaan ka apua nanyapid.

¹⁶Lebanon ka ngikito keng etia ni etia, nyitonokunete akim a ngakipeyos keng, ngibaren a Lebanon daang etia ni etia nyitemokino eliworosi ngakipeyos a Akuj yok.

¹⁷Eraakasi ngakwapea daang pas ani a Ekapolon Akuj, ikwaan anikeng ka amamau a ibore.

¹⁸ Ngae isikwaanere Akuj? Etamario ikwaan ka nyo?

¹⁹Nyikwaan ngesi ka akuj na esubete ngikunonoi, toburichiasi luketiakak ngasua a egolit, sodi tosipokis nakwangat.

²⁰Itwaan ni ipiyori akigiel akwangat kori egolit, toseu akitoe na nyebosi. Tasaku ngesi ekunonoit lo eyeni akichiere, sodi tosub ekisikwaane lo nyeukor.

²¹Nyiyenete esi a? Eringa esi nyiirara? Nyelimokina esi kolong a angorot a? Nyiyenete esi eger lokolong esiakinea akwap a?

²²Ngolo ibooyi alokicholong a apolou ngesi asubuni akwap. Eyei ngesi yaaye ngidowon itee ngesi ngitunga ikwaan ka talodete. Apetari ngesi adis loger a eworu alodapal, loger a eam alo elomitae.

²³Etiyauni ngesi ngikapolok lu eyenikinitae kitiliwo pas.

²⁴Ikote kesi ngikito luuchik lu aringa itakinio, lu nyilijara ngaten nalup. Ani itukutuni Ekapolon Akuj ekuwam tooniyosi kesi tokutarae loger a ngatunyeny.

²⁵Ingita Akuj na italeuno kona, “Ngae kisikwaaneta esi ayong? Eyei dir itwaan kikwaan ka ayong a?”

²⁶Kireosi pan nadis! Ngae asubuni ngikanyer lugu daang? Ngae ngolo erikit kesi loger a ngasigerea? Eyeni ngesi ekimar kech, elimokinit daang ngirora! Etiono apolou a Akuj, emam ngikanyer lo engopit tani epei!

²⁷Ngisirael, kotere nyo iburaata esi, ibalatar, “Nyeyeni Ekapolon Akuj ngichan kus, nabo nyemisit ngakiro na nyeriyan nakisubere esi?”

²⁸Nyiyenete esi a? Nyiirara esi? Ekapolon Akuj ngesi Akuj nakajik, asubuni ngesi akwap daang. Nyeburuuni ngesi kori nyiloyeene jik. Nyepedorio angichun ngitamen keng.

²⁹Itogogongi ngesi ni eburunit, ani ni epalag, nak ngikilinga.

³⁰Tani ngisorok, iloyeene, tobur. Ani ngikiliok lusorok, ibusokinosi ani iloitor.

³¹Nakaneni daang lu igienosi Ekapolon Akuj, eanyunete ngikilinga lukiteat. Epororete loger a ngigolei, ematarosi nakaneni nyeburuni, eloose nakaneni nyiloi.