Read turkana Isaya 41 Bible Online

Isaya 41 - turkana bible

Isaya 41

¹Ebala Akuj kona, “Esi ngakwapea na iloka, kililinga pan topupokisi ngakiro kang! Tonyoutu ayaar ngakiro kus nitubet ekies, emini esi alolom na iruorikineta. Emorikinos atotiakutu itwaan ni iyookino.

²“Ngae kolong echuchuuni ekajwon lo abuni alo kide,[27] tobwang ngimoe keng anicha elosi kadaang? Ngae isidwangi ngesi ngikapolok ka ngibukui? Eari ekileng keng kesi toritak nalup loger a apua. Iealarete ngimalea keng lua amod kesi loger a ngatunyeny ana ekutari ekuwam.

³Kiwap ngesi kesi kitor akaalimon. Ekeri ibiroro tosub nyichiakit ngalup!

⁴Ngae kolong asubakini ngakiro nguna? Ngae arekini ngirwa lu esubakinotor ngakiro? Ayong Ekapolon Akuj ayei kolong napei anakisiakinet. Ayong Ekapolon Akuj amini tanang losal.

⁵“Engolikis ngitunga a ngakwapea anakalonak ngakiro na asubak ayong, eemito kesi emaranete kotere ebuloi. Kotere nguna, echunakinosi kesi sodi pot.

⁶Ingarakinosi ngikadukok, elimonokinosi make ebalasi, ‘Totitinyer!’

⁷Elimokini ekechian ngakito tolimok eketiakan ngasua tama, ‘Isubak iyong etich lokiminari!’ Lokedichan akuj nasubuna a ngasua, ipuruuni lokadupan ngisumarea. Tolimut kesi tamasi, ‘Asubun nikajokon.’ Sodi kitowaa kesi akuj ngina todupakis ngisumarea.

⁸ “Nakaneni Isirael, ekasuban etich kang, iraakasi esi ngitunga lu aseu ayong, iraakasi esi ngalesea a Aburaam, alo erai lopae kang.

⁹Kayauni kolong ayong esi alosal a akwap, katanyar alowaitin alukalonak katolimok atama, ‘Irai iyong ekasuban etich kang.’ Abu ayong nyakanger esi, pearai abu katoseu.

¹⁰Nyieam kainyo kirukit ayong ka esi! Arai ayong Akuj kus, warasi nyikibul! Ketogogongi ayong esi kengarak. Keyoki ayong esi katoyuu.

¹¹“Ngulu kingoikinito esi daang, irumete ngileech na idwangere. Ngulu kitijiyete esi daang, etoakete tongopiasi anakwap.

¹²Ilomarete esi akisak kesi, nakaneni nyianyunete esi kesi. Ngulu kitijiete esi, engopiarete tarata pas.

¹³Ayong arai Ekapolon Akuj na arai Akuj kus. Ketogogongi ayong esi kalimokinit abala, ‘Nyieam, kengarakini ayong esi.’ ”

¹⁴Ebala Ekapolon Akuj kona, “Esi Ngisirael, tani kidiseak esi, nabo tapalag, nyieam, kengarakini ayong esi. Ayong Akuj a Isirael na etaleuno, ngesi kayuununi esi.

¹⁵Kesikokini ayong esi ibore nidaet ngikinyam, ni eyakasi ngikel lukitet akwanak. Irienyete esi ngimoru kinyasut, eraraun ngimukur tarata ngatunyeny,

¹⁶sodi kilepasi esi kidiama tokuta ekuwam nikalonan kiela ekuwam loapolon. Ani erumor talakaros esi kainyo arai ayong Akuj kus. Kipuruunete esi ayong na arai Akuj a Isirael na etaleuno.

¹⁷“Ani kengopikis ngitunga kang ngakipi, ani esaa lo esakete, tookito ngidokolei kech akure, ayong Akuj a Isirael, nyaisikini kesi.

¹⁸Eteleleuni ayong ngangololin alomukur alukoonok deu, atalakak ngileleae anadipoe. Etiliwori ayong ariet ngabwelin, etiliwo akwap nakoonon ngileleae lu eleleete.

¹⁹Eturupuni ayong ngichekereng anariet, ka ngiwo ka ta lopara. Erupunete ngamon anakwap anakoonon, ngamon a ngidomou ngikito lu enyaritae ngimitidari ta ngitelitei.

²⁰Ingolikinete ngitunga ngakiro nguna toyena atamar ayong Ekapolon Akuj, ngesi asubakini nguna. Eanyunete nabo atamar ayong Akuj a Isirael na etaleuno ngesi asubakini nguna.”

²¹Ekapolon Akuj na erai ekapolon a Isirael, ebala kona, “Esi ngakujo a ngibukui, yautu ngakiro na ikeredikina esi!

²²Potu pan todwara ngakiro na moi esubakinosi, atoyanete sua ngirwa lu esubakinotor. Tolimokis ngikatubok ngikesio ngakiro nakolong asubasi, kitolimokis sua eger a ngakiro kanguna, sodi etamakineta.

²³Tolimokinae sua ngakiro na isidiunosi atoyeneta atamar iraakasi esi ngakujo! Tosubakisi pan ngakiro ngadi, kejokak kori keroko, sodi atoriangakinotor sua kitobul.

²⁴Iraakasi esi pas, nabo eraakasi ngakiro na isubete esi daang pas. Kikadakini itwaan ni atiaku akilip esi!

²⁵“Echuchuunit ayong itwaan alo kide,[28] itoruni ngesi kwap bu kitijik. Ipudae ngesi ngikapolok loger a echoto, loger lo ipudaa ekayen ngamoti echoto.

²⁶Ngae anikus adwarit ngakiro nugu sodi atamareta iyookinito esi? Emam tani ipei kus alimunit, emam itwaan eira esi ilimunete!

²⁷Ayong Ekapolon Akuj ngesi arai lo ekingaren alimokini Sion, atomea itwaan Yerusalem atamar, ‘Eponito ngitunga kon! Eponito nawi!’

²⁸Ani engolikini ngakujo, emam tani apei na ayei akiroit na elimuni, emam tani apei na apedori atachun ngakiro na engita ayong.

²⁹Eraakasi ngakujo nugu daang pas, emam ibore esubakinete, epalag kesi nabo emam ngikilinga.”