Read turkana Isaya 42 Bible Online

Isaya 42 - turkana bible

Isaya 42

¹ Ebala Ekapolon Akuj kona, “Ekasuban etich kang, lo ainak ayong ngikilinga, ngesi aseu ayong nabo ketalakarit. Elelebik ayong ngesi etau kang, eyauni ngesi ngakiro na eriyan nakwapea daang.

²Nyelachakini ngesi kori nyiremari, kori nyiruoro irema alorukudi.

³Eliwor ngesi lo epalaana ani alupalag, tapataner ani alu emam ibore. Einuni ngitunga ngakiro na eriyan.

⁴Nyelungakin ngesi kori nyipirisaar etau, itowei ngesi ngakiro na eriyan anakwap. Idarito ngakwapea nakalonak akitatamo keng.”

⁵ Asubuni Akuj adis sodi topeta, kisubus ngesi akwap ka ibore daang ni eyei neni, nak ngitunga a akwap daang akiyar ka akianget. Alimoki tokona Ekapolon Akuj ekasuban keng kona,

⁶“Ayong Ekapolon Akuj kanyarae iyong kainak apolou na irichakini atamar esubio ngakiro na eriyan anakwap. Kichamakin ayong ka ngitunga daang anikon, ainuni ayong ngakwapea daang akicha esitoru nikon.

⁷Ingaari iyong ngakonyen a ngimuduk, talachak lu eenitae alojelae alu eribokinit.

⁸“Ayong bon arai Ekapolon Akuj na arai Akuj kus. Emam akuj ache kimorea ayong apolou kang, nyikimori ayong ka ngakujo nasubuna ekipur kang.

⁹Asubakinosi ngakiro nakolong adwari ayong. Kalimokini tokona nakiteat eringa nyenanga ni esubakinotor.”

¹⁰Toeokisi Ekapolon Akuj eeos lokitetet, toeok akwap daang ekipur keng! Esi lu iloose ananamea, kipuro ngesi! Toeokisi esi ngakwapea nakalonak ka daang lu ilomito inaa!

¹¹Ariet ka ngirerea keng, kipuro Akuj! Ngitunga a ngadakarin a Kedar, kipuro ngesi! Ngulu elomito lore a Sela, kiremasi anaitae a ngimoru ilakara!

¹²Ngulu elomito nakwapea nakalonak, kipuro ka akikut Ekapolon Akuj!

¹³Anyou Ekapolon Akuj ejie loger a ekajwon, engat ngesi iburakinit ejie, ewangak ngesi ejie, irema, edodiu ngikilinga keng alomoe keng.

¹⁴Ebala Akuj kona, “Edatak ayong ngirwa lukaalak emam ngakiro atachak ngitunga kang. Anang tokona akolongit na anyounio, egoro loger a aberu ana eriaba akidoun.

¹⁵Enyasuni ayong ngimukur ka ngimoru, etoon nginyia ka ngikito. Eloch ngadipoe a ngangololin toliworos ngarieta,[29] etoon ngabwelin a ngakipi.

¹⁶“Ariki ayong ngitunga kang lumuduk, esitor lorotin lu nyisitoro kesi a ache. Eloch ayong aribu kech toliwor akicha, etiliwo akwap nangarab na erurut alongaren kech. Eraakasi nguna ngakichikakinet kang, erichakini ayong kesi nyechwangakini.

¹⁷Ngulu daang igienosi ngakujo nasubuna, lu enyarito ngakisikwaanet abe ngakujo kech, isurumio ngileech nikaronon.”

¹⁸Ebala Ekapolon Akuj kona, “Topupokisi esi lukinim! Kingolikisi, esi lumuduk!

¹⁹Eyei itwaan emudukana akidwang ekasuban etich kang a? Eyei ni ekinimana akidwang itwaan ni ameuni ayong a?

²⁰Ngisirael, ingolikis esi nakaalak, nakaneni emam na ichoiasi! Eyakasi ngaki nakiiraret nakaneni emam ibore iirasi!”

²¹Esaki Ekapolon Akuj noi ayuun ngitunga, sodi kisikok ngesi ngitalio keng ka ngakitatamet, tasak ngitunga keng tokera.

²²Nakaneni ngitunga keng lugu tokona ademar ngiboro, nabo aliworosi kesi ngirikon! Erumiar kesi agolokin lojela. Arikor kesi angop ikayuunan.

²³Ngae anikus iirari ngakiro nugu? Napei tokona jik, idetarete esi ngaki a?

²⁴Ngae epotori Ngisirael nak ngikademak ka ngirukooi. Erai Ekapolon Akuj elope, lokolong kisechakini ngoni! Nyiwapa ngoni elote lo asaki ngesi nabo nyiwapa ngakitatamet keng.

²⁵Kotere nguna, abu Ekapolon Akuj kisiwarak ngoni angoit keng, nabo atoriamutu aboliaro alojie. Torirau angoit keng alo Isirael loger a akim, nakaneni pekiyeni ngoni ngakiro na esubasi nabo nyemisikina.