Read turkana Isaya 43 Bible Online

Isaya 43 - turkana bible

Isaya 43

¹Isirael, ebala Ekapolon Akuj nakolong kisubuni iyong kona, “Nyiem, kayuuni ayong iyong. Kanyar ayong iyong a ekiro kon, irai iyong ikang.

²Ani itori iyong nakipi natuluk, kiruki ayong ka iyong, nyikipiyorete iyong ngichan. Ani itori iyong nakim, nyikinomi akim, nyikimunyari iyong asarae

³kainyo ayong arai Ekapolon Akuj na arai Akuj kon, Akuj a Isirael na etaleuno, nakayuununi iyong. Ajali ayong Misiri kitalakakinere iyong, ajali ayong Kuch ka Seba.

⁴Ajali ayong ngibukui etia ni etia sodi katoyuunea iyong, kainyo kamuno ayong iyong noi, nabo kamina kedodikinit arimatoi.

⁵Nyiem, kirukit ayong ka iyong! Abuuni ayong ngitunga kon nawi alo kide ka achunun alo too.

⁶Alimokini ewae lo alokwap atama, ‘Talakak kesi toloto,’ atolimok kuju atama, ‘Tochoite iratakini kesi.’ Kimiek ngitunga kang tobongut anakwapea anakalonak, tobongut alowaitin kadaang a akwap.

⁷Eraakasi kesi ngitunga kang a ilope, asubuni kolong ayong kesi kainut ayong ekipur.”

⁸Ebala Akuj, “Tanyarautu ngitunga kang nitubet ekies. Emudukaka kesi tarai eyakasi ngakonyen, Ekinimaka tarai eyakasi ngaki!

⁹Tanyarautu ngakwapea daang lokies. Anakujo kech kadaang, akuj ani apedori akidwar nguna esubakinosi, akuj ani adwarit ngakiro na tokona esubasi? Torikut ngakujo nguna ngikaanyunak kech kidodiut atamar iyookinito kesi nguna, tolimosi iteni a ngakiro kech.

¹⁰“Ngisirael, iraakasi esi ngikaanyunak kang, kaseuni ayong esi toliworos ngikasubak etich kang, sodi kitoyeneta esi ayong kitonup. Toyena atamar ayong bon arai Akuj. Emam akuj ache pearai ayong, emam na amin nakanuan nabo emam na emini monan jik.

¹¹“Ayong bon arai Ekapolon Akuj, emam akuj ache kiyuuni iyong.

¹²Adwari kolong ayong nguna esubakinosi, ani erumor abu kengarak esi. Emam akuj nagela na asubaki nguna nakanuan, iraakasi esi ngikaanyunak kang.

¹³Ayong arai Akuj, nabo arubakini araakau Akuj jik. Emam itwaan epedori abuchar anakan kang, emam itwaan epedori akiloch ngakiro na asubi ayong.”

¹⁴Ekapolon Akuj nakolong kiyuuni esi, na erai Akuj a Isirael na italeuno, ebala kona, “Ani abili ayong ayuun esi, ameari ayong ngasigerea Babilon, atobwang ngidorin a ere. Ani achala a Ngikalidayo alu eraakasi ngitunga a Babilon, ilocho toliwor akigoro.

¹⁵Ayong arai Ekapolon Akuj, na arai Akuj kus na etaleuno. Kasubuni kolong ayong esi Ngisirael, arai ayong ekapolon kus.”

¹⁶Kolong a angorot, ewaakini Akuj erot kiding anam, kisitor erot kiding ngitoroi lu akulaate.

¹⁷Toriko ngasigerea nakajwok namunyaro, ngasigerea a ngaurukukui ka ngangolei. Toritakinos daang nalup nyenyouno nabo jik, kimuchakis loger a ataa ana itudungeo!

¹⁸Nakaneni ebala Ekapolon Akuj, “Tojongoto aneikina ngakiro na aekasi, kori tojongoto akitam ngakiro nangorok.

¹⁹Kiteutu ngakiro nakiteat asubakini ayong. Esubasi tani tokona, nyiteete esi a? Asubakini ayong erot anariet, nabo eteleleu ngangololin anariet.

²⁰Kakerete ayong tani ngitieng a moding, kepuruunete ayong ngikolowoi ka ngikaleeso, kainyo eteleleuni ayong ngangololin anariet, etamat ngitunga kang luseuna ngakipi.

²¹Eraakasi kesi ngitunga lu asubuni ayong a akiding kang a ilope, sodi toeotor ekipur kang!”

²²Ebala Ekapolon Akuj kona, “Nakaneni esi Ngisirael, abu ayong ketubur esi noi, nyilipa esi ayong.

²³Nyeinuna esi ayong ngimesekin lu eraakasi ngakipeyos na inomio, nyidodikina esi ayong arimatoi kotere ngakipeyos kus. Nyebelara ayong esi kotere akisak ngakipeyos nakaalak, kori nyituburuna ayong esi kotere akisak emitina lokaakunyon.

²⁴Nyegielakina esi ayong emitina lokaakunyon, kori nyisimwono esi ayong anikatoronon a ngibaren kus. Akidwang nguna, kisinua esi ayong eegos a ngasechesea kus, kituburut esi ayong kotere naaronok isubete.

²⁵Tarai ayong ngesi Akuj nakarimanakini esi ngasechesea kus, nyeringa nabo abilit ngasechesea kus lomoyo.

²⁶“Potu apana lokies, kisisautu ngakiro a ekies kus! Tolimutu ngakiro kus atoyeneta na iyookinito esi!

²⁷Asechi kolong apaakus lo ekingaren,[30] kasechakinete kolong ayong ngikarikok kus,

²⁸kinyasut ngikapolok kus[31] akai kang. Kotere nguna, enyasu ayong Isirael, emiek ngitunga kang iyenyio.”