Read turkana Isaya 45 Bible Online

Isaya 45 - turkana bible

Isaya 45

¹Aseu Ekapolon Akuj Korechi toliwor ekapolon keng! Aseu ngesi kidwang ngibukui, ameu ngesi ademar ngikapolok apolou kech, engakini Ekapolon Akuj ngesi ngidorin a ngirerea. Alimoki Ekapolon Akuj Korechi kona,

²“Kengarenikini ayong iyong ereriak ngimoru ka ngimukur. Abwangi ayong ngidorin lua ngasua ananyangayek, eala ngasua kech nakirionok na iriwokinitae.

³Kainakini ayong iyong ngaropiyae na iweitae, ka ebari lo imunonitae. Neni ngesi iyenunea iyong atamar ayong Ekapolon Akuj na arai Akuj a Isirael ngesi kolong kanyarae iyong a ekiro kon.

⁴Kaseu ayong iyong sodi kingarak Isirael, lo erai ekasuban etich kang, ngitunga lu aseu ayong. Kainak ayong iyong arimatoi naationon, tani pekiyeni iyong ayong.

⁵“Ayong arai Ekapolon Akuj, emam akuj ache. Emam Akuj ache mati ayong. Kainakini ayong iyong ngikilinga tani pekiyeni iyong ayong.

⁶Asubi kona sodi toyeneta ngitunga daang napei alo kide tanang too, atamar ayong arai Ekapolon Akuj, toyena nabo dang atamar emam akuj ache mati ayong.

⁷Asubi ayong akicha ka aribu ayaununi ayong apiaro ka naaronok. Ayong Ekapolon Akuj ngesi asubi nguna daang.

⁸Ee Akuj, tachaku kare adis alokidiama, kimiek adis kitetep ateneanut loger a akiru. Tangaar akwap kidiau ayuuno, sodi tokilikilu akwap kotere ateneanut. Asubakini ayong Ekapolon Akuj nguna.”

⁹ Oitiakoi! Abe etioko nginyas eanyuni itwaan ni ebolosi ka Akasubunan keng! Ikwaan ngesi ka amot na isuburae ekayen keng. Ikokini echoto ingisi ekayen ai, tama, “Nyo iyeunit iyong?” Kori tama, “Emam ibore iyeni iyong!”

¹⁰Oitiakoi! Abe etioko nginyas eanyuni itwaan ni elimokini apakeng tama, “Nyo iuriunit iyong?” Kori tolimok itiokeng tama, “Nyoni idouni iyong iriabar?”

¹¹Ebala Ekapolon Akuj, na erai Akuj a Isirael na italeuno, “Nyikitimi esi akingit ayong ngakiro a ngide kang, ka alimokin ayong nguna ejoikinit asubi a?

¹²Ayong kolong asubi akwap, sodi atosub ngitunga toloma neni. Apetakini ayong adis a ngikilinga kang, ayong apolokinit akolong, ka elap ta ngikanyer.

¹³Ayong echuchuuni Korechi tonyou, tosubak ngakiro na asaki ayong, kitiriyan ngakiro. Etorwaari ayong erot lo itori ngesi daang. Eduki ngesi nabo Yerusalem, lo erai ere kang, sodi talachak ngitunga kang lu irumiaritae nakwap nache. Esubi ngesi nguna emam ibore etachitere kori ediakitere.” Alimu Akuj Namerikanyer nguna.

¹⁴Alimoki Ekapolon Akuj Isirael kona, “Eliwor ebari a Misiri ka Kuch ekon. Ani ngitunga lukooyak a Seba, eliworosi ngikasubak etich kon, kiwapakinete kesi iyong toenitetei a ngiriko. Ijuuruyete kesi alongaren kon kimaimaa ebalasi, ‘Irukito iyong ka Akuj, emam akuj ache mati ngesi bon.

¹⁵Akuj a Isirael, na eyuununi ngitunga keng, iteni erai Akuj na edukit.

¹⁶Ngulu ilipito ngakujo nasubuna, irumete ngileech toema, ibileri kesi daang.

¹⁷Nakaneni eyuuni Ekapolon Akuj Isirael, eanyuni Isirael ayuuno nakajik, nyirumete Ngisirael ngileech jik kori nyitoemio kesi.’ ”

¹⁸Ekapolon Akuj asubuni adis, ngesi erai Akuj! Ngesi ayeuni ka asubun akwap, kitogogong jik. Pekolong asubuni ngesi akwap toliwor aka ekurikur, pearai asubuni toloma ngitunga. Ngesi ebala, “Arai ayong Ekapolon Akuj, emam akuj ache.

¹⁹Peeruoro ayong emunonit, nyiruoro anaribu. Nyelimokina ayong Ngisirael atama, ‘Tasakae ayong alokurikur.’ Ayong Ekapolon Akuj, eruoro ngakiro naakwaak, alimorit ngakiro na eriyan.”

²⁰Ebala Ekapolon Akuj kona, “Tochununos ngitunga a ngibukui alu idongito iyarete, potu lokies! Ngulu etubonorosi edakito ngakujo na ichietae, ka akilipit ngakujo na nyeyuunete kesi, ebangaaka ngitunga ngulu!

²¹Potu kiruorikisi, tolimosi ngakiro a ekies kus, kimiekisi kesi kingitanaros ngakiro! Ngae kolong adwari ngakiro nugu a angorot? Meere ayong Ekapolon Akuj na arai akayuunan a? Emam akuj ache mati ayong bon.

²²“Toreeunos tokona nikang toyuunos, esi ngitunga daang anakwap! Ayong bon arai Akuj, emam ache.

²³ Erai akichikakinet kang aka iteni, nyilochio. Ekongi ayong a ekiro kang, eriediki itwaan daang alongaren kang, tolim atamar aliwor ni emunoi anikang.

²⁴“Elimunete kesi atamar nikang bon ngesi eanyunere akidwang ka ngikilinga. Nakaneni ngulu karemokino ayong, irumete ngileech.”

²⁵Ayuuni ayong Ekapolon Akuj ngalesea a Yakobo daang, kepuruunete kesi ayong.