Read turkana Isaya 46 Bible Online

Isaya 46 - turkana bible

Isaya 46

¹“Esal a ngakujo a Babilon logo! Elipitae kolong Bel ka Nebo, nakaneni eyakasi tokona nasaaja isiwokitae ngisikiria, aliworosi eegos a ngibaren alu eburunit.

²Nyeyuunosi ngakujo nguna make, irumiaritae kesi yaarae nikalonan. Esal a ngakujo a Babilon logo!

³“Topupokinae, esi ngalesea a Yakobo, esi ngitunga kang lupiyayek. Ayong kadakit esi anakookes kata itiokus, keyok esi napei anakidoun.

⁴Arai ayong Akuj kus nabo keyoki esi tanang imojongete epete ngakorwo nakies. Kasubuni kolong ayong esi nabo keyoki, nabo kengarakini ayong esi katoyuu.”

⁵Ebala Ekapolon Akuj, “Ngae kesikwaanere ayong? Eyei itwaan kikwaan ka ayong a?

⁶Engaanarete ngitunga ngichuei kech tobukut egolit, itemete kesi ngakwangae anaratilio kech. Tatacha eketiakan egolit ngaropiyae sodi tosubakinea kesi akuj, ani erumor kijuuruoto kilipa!

⁷Toriongakis akuj ngina losegeta yaasi. Tosipokis sodi towo kitirokin neni jik nyiyotokini. Na igoronokinio itwaan ngesi, nyiikini kori nyeyuuni alochan.

⁸“Kitamutu nugu, esi ngikasechak, kitamanasi ngakiro na asubak ayong.

⁹Kitamutu ngakiro nangorok, toyena atamar ayong bon arai Akuj, emam ache ikoni ayong.

¹⁰Napei kolong anakisiakinet, adwarit ayong nguna esubakinosi. Alimuni ayong atamar nyichwangakinosi ngakiro na areat ayong, nabo asubakini daang na asaki asubakin.

¹¹Anyarauni ayong itwaan alo kide,[33] ibirun kwap loger a ekuruk, sodi kitemok nguna arekini ayong. Alimu ayong nabo asubakini.

¹²“Topupokinae ayong, esi ngitunga lukechanak, esi lu itamito atamar elona ayuuno.

¹³Etaapu ayong akolongit a ayuuno, nyelona. Nyetinenikini ayuuno kang. Ayuuni ayong Yerusalem ainu Isirael ekipur.”