Read turkana Isaya 47 Bible Online

Isaya 47 - turkana bible

Isaya 47

¹Ebala Ekapolon Akuj kona, “Babilon, kasio totiyaun alokicholong kon a apolou, kiboikin napua! Ikwaan kolong iyong ka apese na nyepero ka ekile a ache, irai ere lo nyidwanga, nyeringa nabo iyong irai nakajokon kori nakaalimon.

²Tolemu ngamoru nakirieet! Kiriak ngakiria! Talachu awaru na erapit ereet! Talacha ngiworui kon! Kikea ngiworui kon todok ngingololin![34]

³Kingolikinete ngitunga iyong imuner, ingolikinete ngileech kon. Atachakini ayong naaronok, emam itwaan keratakini.”

⁴Akuj a Isirael na italeuno kilachakini ngoni. Erai ekiro keng Akuj Namerikanyer.

⁵Ebala Ekapolon Akuj Babilon, “Kililing kiboikin naribu, nyeringa nabo kinyarao iyong akapolon a ngakwapea!

⁶Angoikinit ayong ngitunga kang, etusub kesi meere ngikang, epoto kesi kainak iyong, nyidodikina iyong kesi ngisien, ibu iyong kitusub tani ngikasukou etich loationon.

⁷Itamit iyong ibala, ‘Aliwor ayong akapolon jik,’ ibu iyong nyiimisik ngakiro nugu, kori nyiitama atamar ikokini esal kech ai.

⁸ “Topupok, iyong na imina amera, iyong na ibala kori ibooyi niajokon, iyong na itami ibala, ‘Ayong bon arai, emam iche kedwangit ayong. Nyaliwor ayong jik apuserut, kori nyedaun ngide kang.’

⁹Nakaneni apei kolongit, inangakin iyong ngakiro nguna daang esubakinosi anikon. Tani kisubit iyong asubanot daang, tomuro ngikitetio daang, edaunosi ngide kon ka ekile.

¹⁰“Asibit kolong iyong kori ibooyi akaalimon anaronis kon, itamit iyong ibala, ‘Emam itwaan ketee.’ Kibatasi iyong aosou ka achwaanu kon, kitama iyong tama, ‘Ayong bon arai, emam iche kedwangit ayong.’

¹¹Epote naaronok nikon, nyipedori iyong akiratakin a amuronot kon. Epote nginyas nikon atipei, nginyas lu nyeanyuna iyong a ache!

¹²Kasio, kirichak amuronot kon ka asubes, lukolong isubi iyong napei alokiditeu. Epedorete karika akingarakin iyong, epedorete karika akitoem ngimoe kon.

¹³Kituburunito iyong ngimurok kon pas. Kimiek robo ngikekeriak lukon ngulu pot kingarakis, lukesemok ngikanyer, ngulu etiakatiakaate adis, ngulu edwarete nguna esubakinosi ngilapio daang.

¹⁴“Ikokinete kesi ngatunyeny, nakaneni enomi akim kesi! Nyepedorete kesi tani ayuun make, erirauni akim noi anikech, nyeliwor akim na ipiarare!

¹⁵Daang na epedorete kesi asubakinea iyong nguna, ngikekeriak lukon igieno iyong nakanuan ngulu. Kimiekinete kesi iyong topetaros daang, emam itwaan idongi kitoyuu iyong.”