Read turkana Isaya 48 Bible Online

Isaya 48 - turkana bible

Isaya 48

¹Ngisirael, topupokisi, esi lu iraakasi ngalesea a Yuda. Ikongete esi a ekiro a Ekapolon Akuj tamasi abe ilipito Akuj a Isirael, nakaneni eraakasi nguna ngaka ngakituk pas.

²Tarai bo iwogasi esi ibalasi, iraakasi esi ngitunga a ere a Akuj, ibalasi igienosi Akuj a Isirael, na erai ekiro keng Akuj Namerikanyer.

³Elimokinit Ekapolon Akuj Isirael kona, “Kolong a angorot, adwari ayong nguna esubakinosi, ani erumor atosubak atipei.

⁴Ayeni ayong atamar iliwor iyong lokechanan, togogonger loger a asuat anakirion, toniniker loger a asuat ananyang.

⁵Ngesi kolong adwarea ayong ngakiro kon a angorot, atolimo ngakiro na eringa nyesubakina, sodi nyiilimunio tama, ‘Ngakujo nakang nasubuna ka ngakisikwaanet kesi asubakinete nugu.’

⁶“Ipupi kolong a ngaki, ingolik tokona a ngakonyen! Iwouni iyong alimor nguna? Kalimokini tokona ngakiro nakiteat nakolong aringa ayong nyisileereuno.

⁷Tokona esubatar nguna, nyesubakina nakanuan a ache. Arai tosubakina, kibala iyong, ‘Anu! Na ayeni ayong sek a’

⁸Nyiirara iyong nugu nakanuan kori nyeyena, emam akiroit tani apei anangu naki kon, kainyo ayeni ayong atamar imodeana iyong, nabo irai iyong ekasechan napei anakidoun.

⁹“Eratakinit ayong angoit kang, etikitiki ayong nyikimunya iyong sodi kipuruunioto ngitunga ekiro kang.

¹⁰Kening ayong iyong anakim a aboliaro, loger lo itosegere akwangat anakim. Nakaneni ariam ayong atamar irai iyong pas.

¹¹Asubi ayong nguna kotere ayong alope, nyalakakini ayong ekiro kang imenyaritae, kori nyikimori ayong ka itwaan iche ekipur lo erai ekang bon.”

¹² Ebala Ekapolon Akuj kona, “Topupokinae, Isirael, ngitunga lukolong anyarae ayong! Arai ayong Akuj, ayong arai na ekingaren ka na esal, ayong bon arai Akuj.

¹³Ngakan kang kolong asubunete ngapirio a akwap, sodi atopetak adis. Na anyaraa ayong akwap ka adis, todolut daang nikang atipei.

¹⁴“Tochunakinos esi daang, kiirasi! Emam tani apei a ngakujo kus na abu todwar atamar itwaan ni aseu ayong ngesi itijikini Babilon. Esubakini ngesi nguna asaki ayong tosubak.

¹⁵Ayong ngesi alimuni nguna atanyara ngesi. Atoriko ayong ngesi sodi etojok ngakiro keng.

¹⁶“Taapuutu tokona, kiirasi ngakiro na alimuni ayong. Napei anakisiakinet, eruoro ayong ngakiro ilereete, nabo eyoonokini ayong ngakiro kang na alimuni daang.” (Kameu tokona Ekapolon lo erai Ekapolon Akuj ayong kainak agogongu a etau keng.)

¹⁷Akuj a Isirael na italeuno, Ekapolon Akuj na kiyuuni iyong, ebala, “Ayong arai Ekapolon Akuj, Akuj kon, naketatami iyong kingarakinor, katorik iyong alorot alo ejoikinit iwapi.

¹⁸“Arai kolong kiwapak ngitalio kang! Keleleunit apiaro nikon loger a angolol ana nyeoneene! Kebunit ayuuno nikon loger a ngitoroi a anam.

¹⁹Kelalak ngalesea kon loger a asinyen, pekikisar ekiro kon kori pekengopia.”

²⁰ Tonyoutu tokona alo Babilon talachakinos! Tolimosi ngakiro nguna a ekare, tolimosi awadaang, atamar “Ayuu Ekapolon Akuj Isirael lo erai ekasuban etich keng!”

²¹Nakolong arikitor Ekapolon Akuj ngitunga keng, nyenyama kesi akure anariet. Abu nak kesi ngakipi anataaba, apaki ngesi ataaba, toleleut ngakipi.

²² Ebala Ekapolon Akuj, “Emam ngikasechak ekisil.”