Read turkana Isaya 49 Bible Online

Isaya 49 - turkana bible

Isaya 49

¹ Topupokinae, esi ngakwapea nakalonak, esi ngitunga lu ilomito nikalonan! Kanyarae Ekapolon Akuj ayong eringa ayei nakook a itiokang, katoseu ayong atoliwor ekasuban etich keng.

² Kipena ngesi angajep kang tokwaner loger a ekileng. Katarap ngesi ayong etorube a akan keng.[35] Kepena ngesi ayong loger a emal a amod, kerepak namod keng kewaa.

³Katolimok ayong tama, “Isirael, irai iyong ekasuban etich kang, kotere iyong, kepuruunete ngitunga ayong.”

⁴Atolim ayong atama, “Asub ayong etich pas! Abuko ngikilinga kang pas.” Tarai apedori ayong akigienokin Ekapolon Akuj, kainak na ejoikinit ayong aanyuni, ngesi kainanakini ayong ebachit.

⁵Kasubuni Ekapolon Akuj ayong anakook a itiokang, atoliwor ekasuban etich keng, sodi atobuu ngitunga keng, atobuu Ngisirael lu epetara. Kainaki Ekapolon Akuj ayong ekipur, ngesi erai ngikilinga kang.

⁶ Kalimokini Ekapolon Akuj ayong tama, “Ekasuban etich kang, kainakinit ayong iyong etich loationon. Tani keyei etich lo a abuakin Ngisirael lu idongito eyarete apolou kech, ketiliwori ayong iyong akicha a ngakwapea, sodi toyuunotor ngitunga daang anakwap.”

⁷Akuj a Isirael na italeuno, na erai akayuunan, alimoki ngolo imenyaritae noi, ngolo eremokino ngakwapea tarai ekasuban etich a ngikapolok, alimoki kona, “Kingolikinete ngikapolok iyong kilachakinio, enyounete kidodikis iyong arimatoi, ingolikinete tani ngikapolok luuchik, ijuuruyete kesi kidodikis iyong arimatoi.” Esubakinosi nguna kainyo aseu Ekapolon Akuj ekasuban etich keng. Akuj a Isirael na italeuno, irichakini ngakichikakinet keng.

⁸ Ebala Ekapolon Akuj, “Ani enangi akolongit nayuunet esi, kengarakini ayong esi, eik akigoro kus. Kachoikini ayong esi keyok kichamakin ayong ka ngitunga daang, kitoru achamunet ngina nikus. Kemiekini ayong esi tobongosi nakwap kus ngina tokona erai alaireng.

⁹Alimokini ayong lu eenitae atama, ‘Talachakinos!’ Atolimok lu eyakasi naribu atama, ‘Topudutu nakicha!’ Ikokinete kesi ngamesekin na edakasi alomukur,

¹⁰ nyenyami kesi akoro kori akure jik. Nyenomi kesi akolong kori nyewani ekuwam lokariran a akamu, kainyo erikit kesi ngolo emina kesi. Erikori kesi loleleae a ngakipi.

¹¹“Ewaakini ayong erot loapolon lomoru, atosubak erot lo itorunete ngitunga kang.

¹²Epote ngitunga kang anikalonan, epote alokwap ka too, epote alo Aswan[36] alokuju.”

¹³Iyong adis, toeok a alakara! Iyong akwap, kirema a alakara! Esi ngimoru, kiremasi toeokisi! Isililingi Ekapolon Akuj ngitunga keng, isieniyete ngesi ngitunga keng lu eboliare.

¹⁴Nakaneni tolimut ngitunga a Yerusalem tamasi, “Kichaka Ekapolon Akuj sua! Kimuriakin sua ani a Ekapolon Akuj.”

¹⁵Tatachu Ekapolon Akuj tama, “Imuriakini aberu ikoku keng ni enaki a? Nyeminakini ngesi ikoku ni akook keng a? Tani kimuriak aberu ikoku keng, nyikimuriakinete esi ayong.

¹⁶Yerusalem, ketamunit ayong iyong jiik! Egirit ayong ekiro kon nidapal a ngakan kang.

¹⁷Ngitunga lu ebongokinete akiduk iyong, ibunyuna eponito. Erotokinete lu ngoon kinyasunete iyong.

¹⁸Tongolengolek kingolia wadaang! Echunasi ngitunga kon eponito nawi! Ani araakar ayong Ekapolon Akuj, Akuj na ayari, inisakinor iyong ngitunga kon, loger lo inisar aberu na iusio asir keng.

¹⁹“Enyasunio akwap kon kidong esil, nakaneni edidinger tokona kotere ngulu ebongunito akilom neni. Ngulu kolong kitiliworete iyong alaireng, echadario noi anikon.

²⁰Ngitunga kon lukolong edoikinio nakwap nache, kilimokinete iyong akolongit ache tamasi, ‘Adidinger akwap naga, kisaki sua wache ni kilomi!’

²¹Sodi kitamana iyong kona, ‘Ekoe, ngae kolong kedoikini ayong ngide lugu daang? Adaun kolong ngide kang, peadikino ayong aanyuni ngiche. Keritario kolong ayong kayaar nakwap nache, ngae etanuni ngide lugu? Edongi kolong ayong bon, aliwae aponeta ngide lugu daang?’ ”

²²Ebala Ekapolon lo erai Ekapolon Akuj kona, “Ekeari ayong akan atanyara ngakwapea, eyaunete kesi ngide kon nawi.

²³Ikokinete ngikapolok taapakon, ikokinete ngakapolok ta itiokon. Ijuuruyete kesi alongaren kon kidodikis iyong arimatoi. Emeyete kesi apua a ngakejen kon. Sodi toyen iyong atamar ayong arai Ekapolon Akuj. Daang lu idarito akingarakino a Ekapolon Akuj, nyisurumio ngileech.”

²⁴Epedorio ademar asiger ibore ni engatari a? Epedorio ayuun ngirikon a itwaan anikamoitanan a?

²⁵Atachu Ekapolon Akuj ebala, “Nguna kesi esubakinosi. Edemario asiger ngirikon keng, edemario itwaan nikamoitanan ibore ni engatarit. Etiji ayong itwaan nicha kitiji esi, sodi atoyuu ngide kus.

²⁶Ngulu kichiakiarito esi, alemuni ayong taaras make, irakarete kesi ngaakot kech a ngikulepek loger a epurot. Neni ngesi eyenuneta ngitunga daang atamar arai ayong Ekapolon Akuj, ayong kayuununi esi katalachak. Eyenunete atamar ayong arai Akuj a Isirael nakaagongon.”