Read turkana Isaya 5 Bible Online

Isaya 5 - turkana bible

Isaya 5

¹ Topupok katoeok eeos logo eeos alopae kang ka amana keng. Ayei lopae kang amana a ngimusabib kidiama emukura lo iturupaka ngalup ngikinyam.

²Tobok ngesi ngalup tolema ngamoru, kitak ngamusabib naajokak noi. Toduk epem lo iteere, tosubak ni echiyere ngamusabib. Kidar ngesi ngamusabib ekokete, nakaneni tababaraketa ngamusabib daang.

³Ebala bocha tokona lopae kang, “Esi ngitunga lu ilomito Yerusalem ka Yuda, totiakutu kerai ayong asechit kori amana kang.

⁴Eyei ibore ni nyesubakina ayong alomana a? Ani kotere nyo bo akoniunio ngesi ngamusabib nakaabarak, nyeekoniu ngamusabib naajokak na edarit ayong?

⁵“Kalimokini ngakiro na asubakinea amana kang. Ayatari ayong ngikelio keng, atangarakakaa awas keng sodi emiek ngitieng tadaka kipudata.

⁶Emiekini edoan torup kaneni. Nyeragiragi ngamusabib, kori nyachili ngalup. Emiekini ayong ngirega ka ngiikwa toruput alomana. Eratakini tani ngidowon nyeelakakis ngakipi.”

⁷Isirael ngesi erai amana a ngimusabib a Akuj Namerikanyer. Eraakasi ngitunga a Yuda ngamusabib na etakini ngesi. Eitanit Akuj ngakiro na eriyan anikech, nakaneni todepasi kesi nguna toliworos earasi. Eitanit atamar tosuba ngakiro na iteni, nakaneni apot ngitunga toliworos igorosi esakete atamar kitosubere na iteni.

⁸Oitiakoi! Abe etioko nginyas ianyunete esi! Esi lu igielete ngakais naapolok ka ngamanat, kidokokis kidiama nache sek itingito. Tongopik luche ni elomete, kidongo esi make ilomito nakwap.

⁹Eira ayong Akuj Namerikanyer ikongi ebala, “Iteni idongete ngakais nakaalak erai ngawiyeingorok, engopi itwaan elomi nakais naapolok ajokak.

¹⁰Amana a ngimusabib na erai ngaekae ngatomon, ekoniuni ngamusabib na epuruunere emuna lo erai ngalitae ngakan-kauni make. Ngikinyam lu itakinio erai ngichuei amiat ka ngitomwon-kauni, ekoniunete ngalemet ngichuei ngitomon ka ngikan-kauni make.”

¹¹Oitiakoi! Abe etioko nginyas ianyunete esi! Esi lu inyouniyete nataparach elilim tolomakis akimat epurot, toribok eringa kirakarit epurot.

¹²Alosukukui kus itingito esi ngagitae, ka ngatamburin, ka ngibunei ta emuna. Nakaneni nyikachito esi ngitichisio a Ekapolon Akuj, nabo nyiteete na esubi ngesi.

¹³Kotere nguna, eliworosi ngitunga kang ngirikon ani ebangaaketa. Eari akoro ngikarikok kus, tongeda akure ngitunga luche.

¹⁴Ni eyakasi ngikatoak, idarit kesi a ekimue, engaamito ngalup idarito kesi. Ilikorete ngalup ngikapolok a Yerusalem, aapei ka ajore nakachalan a ngitunga aluche.

¹⁵Irumete itwaan daang ngileech, itiditeunio lukenisak.

¹⁶Nakaneni Akuj Namerikanyer, ipuruunio. Idodiununi ngesi apolou keng ani esubea na eriyan. Kisileereu akibuseanu keng ani iriraa ngitunga keng.

¹⁷Alorerea alu enyasun, edakasi ngimesekin luuchik, edakasi lukanakunak ka ngikaalei,[4] tosub neni achokor kech.

¹⁸Oitiakoi! Abe etioko nginyas ianyunete esi! Esi lu kikuruwo atiaka ka ngasechesea kus.

¹⁹Ibalasi esi, “Kiburuburak Ekapolon Akuj, tosubak na isaki asubakin, engolikisi pan. Kimiekisi Akuj a Isirael na italeuno tosub ngakiro na esaki atoyena.”

²⁰Oitiakoi! Abe etioko nginyas ianyunete esi! Esi lu ibaasi, naaronok ejokak, tamasi naajokak eroko. Esi lu ilochete akicha toliwor aribu, kilocho aribu toliwor akicha. Kitoboboto ibore ni edwar, sodi kitodwara ni ebob.

²¹Oitiakoi! Abe etioko nginyas ianyunete esi! Esi lu itamito atamar iosok, tabaas ichwaaka noi.

²²Oitiakoi! Abe etioko nginyas ianyunete esi! Esi lu iraakasi ngangutea a emuna! Esi lu iosokinito akimoromor emuna!

²³Esi lu ilakakinete itwaan ni esechit ani kibunakinea ibore nidiaket. Towout asubakinea itwaan ni nyesechit ngakiro na eriyan.

²⁴Tokona bocha, loger lo emunyarea akim ngatunyeny, ka eger lo erujakinotor nginyia anakim, ebosete ngaten kus na alokwap, tooniyosi ngakui tokuta ekuwam, kainyo ingerete esi ngakiro nakitatami Akuj Namerikanyer, na erai Akuj a Isirael na italeuno.

²⁵Engoikinit Ekapolon Akuj ngitunga keng, anyoiki kesi akirirare. Emaranikinete ngimoru, Imiekinio ngawat alu etoakete eperete alorotin loger a asakatan. Tani kikokis neni, nyesaluni angoit a Ekapolon Akuj, pearai eringa ngesi enyoikinit kesi kirira.

²⁶Idodiuni Ekapolon Akuj ibore ni enyaraa ebukut lo elona. Iunyakini ngesi poneta kesi alosal a akwap. Epote kesi atipei kibirunos!

²⁷Nyeburuni kesi kori nyedakarosi. Nyilurakinosi kori nyejotoorosi. Nyilajalajakin ngarubae. Nyengedasi ngarukanes a ngamuk.

²⁸Ekwaka ngimalea kech, ekudokina ngakawa kech esukito akigum. Egogong ngakichieket a ngangolei kech loger a ngamoru. Irimete ngakejen a ngaurukukui kech ibiroro loger a ekuwam alo edirisit.

²⁹Irurumaate ngasigerea kech loger a ngingatunyo alu earete ibarasit tachadasi ni nyedemarere.

³⁰Na enangea akolongit ngina, imaretetekinete kesi ani edwangeta Isirael, echalasi loger a anam ana ekulae. Kingolik akwap naga! Erai aribu ka ngichan! Eliko aribu akicha.