Read turkana Isaya 50 Bible Online

Isaya 50 - turkana bible

Isaya 50

¹Ebala Ekapolon Akuj, “Itamito esi atamar etwarakini kolong ayong ngitunga kang loger a ekile alo elaki aberu keng a? Ani aliwae eyei abarua a elakit? Itamito esi atamar kagielari kolong ayong esi tarata ngirikon, loger a itwaan ani egielari ngide keng tarata ngikedalak a? Mam jik! Kirikio kolong esi kotere ngasechesea kus, kitwarakinio kolong esi kotere aronis kus.

²“Kotere nyo elilingeta ngitunga kang na alosio ayong ayuun kesi? Kotere nyo peekieta na anyaraa ayong kesi? Ikwa euriana akan kang nyakalachakini esi a? Ekilakini ayong anam toon, kilochos ngangololin tarata ariet, sodi totoka ngikolia kotere angopit a ngakipi.

³Apedori ayong akimuk adis toribok tosub enapit ngiguniae lu igoror kotere akitu a itwaan.”

⁴Ekapolon lo erai Ekapolon Akuj, ketatam ayong ekiruor, sodi etogogong ngulu eburunit. Ataparach daang, ketedetarit ngesi ayong ngaki, sodi eira ka akirichakin nguna ketatami ngesi ayong.

⁵Ekapolon lo erai Ekapolon Akuj, kainaki ayong achwaanu, nyeliworo ayong lokechanan, kori nyibongokino ngesi akau.

⁶ Ngulu kedichete ayong, ajalak ayong akau kang. Ngulu arusete ngitim a abokony, atoisikinea ngamatengen kang. Nyidaa ayong ereet kang nakesurumere ngileech kemoanakin.

⁷Nakaneni nyeriangakina ayong kainyo kengarakinit Ekapolon lo erai Ekapolon Akuj. Erichakina ayong asaki anaikin. Ayeni atamar nyekesurumio ngileech,

⁸ kainyo eapi Akuj, idodiuni ngesi atamar nyasechit ayong. Ngae ketepegi ayong? Bu itwaan ngini atoloto lokies, Ngae erai emoit kang? Taapuu pan itwaan ngini diyete kang!

⁹Ekapolon lo erai Ekapolon Akuj, ngesi kengarakini ayong, ngae tokona etamari asechit ayong? Engopiarete ngikarikok ayong lokies, edaudaunosi loger a ewaru alo irikarete ngakimam.

¹⁰Esi daang lu irimasi Ekapolon Akuj, lu iwapito ngakiro a ekasuban etich keng, ipedorete esi akitor lorot lo eribokinit noi, nakaneni kigienokinos Ekapolon Akuj na erai Akuj kus.

¹¹Esi daang lu itukosi amunyar luche, kimunyarete esi ngakiro napei kus. Ekapolon Akuj alope ngesi esubakini nguna, eliwor esal kus lokaronon noi.