Read turkana Isaya 51 Bible Online

Isaya 51 - turkana bible

Isaya 51

¹Ebala Ekapolon Akuj kona, “Topupokinae ayong, esi lu isakete kitoyuun, esi lu isakunito akingarakino nikang. Kitamutu ataaba nakolong iponeta esi, achukule a ngamoru nakolong kibokunere.

²Kitamutu apaakus Aburaam, ka Sara na erai ataakus. Anyarae ayong Aburaam emam ngide, atopia ngesi etalala ngalesea keng.

³“Edodiuni ayong ngisien ani a Yerusalem, ka daang lu elomito lowaitin a Yerusalem lu enyasun. Tani kerai ngalup keng ariet, etiliwori ayong amana, esikwaan ka amana nakolong etakini ayong Eden. Alakara ka ekare emini neni, ka ngieosio lu kepurore ayong ka abuakinit alakara.

⁴“Ngitunga kang, topupokinae, kiirasi ngakiro na alimuni ayong. Ainakinit ayong ngakwapea ngakitatamet kang, einunete ngitalio kang kesi akicha.

⁵Abuni ayong atipei atoyuu kesi, aapuut ngirwa lu ayuunea ayong kesi. Apolokini ayong alope ngibukui, kedarito ngakwapea nakalonak ayong, kegienosi ayong atoyuu kesi.

⁶Tokienyiasi nadis, kingolikisi akwap! Engopiari adis loger a apuru, echilichiluun akwap loger a eworu alongorot, totoaka ngitunga daang lu eyakasi nakwap loger a ngichuch. Nakaneni ayuuno na ayauni ayong, eliwor akajik, nabo nyesaluni akidwang kang.

⁷“Topupokisi ngakiro kang, esi lu iyenete nguna iyookino. Esi lu eyakasi ngitalio kang lotai kus. Warasi nyieam nakimenyere, nyiisur ngitai nakiyenyere.

⁸Irikarete kesi ngakimam loger a ngiworui. Nakaneni ayuuno na ayauni ayong, eliwor akajik, erubi akidwang kang ngirwa daang.”

⁹Ekapolon Akuj, tokienyu toyuunae! Toyuunae a agogongu kon, loger lokolong isubeenea a angorot. Iyong kolong itubi ekipe lo a anam lo enyaritae Raab[37] kiela.

¹⁰Iyong kolong itooni anam tobelak erot nakipi, sodi kitorut ngitunga lu iyuuni iyong.

¹¹Ngulu iyuu iyong, enangunete Yerusalem elakara, eeosi kimariteteete elakara. Elakarosi kesi jik, nyeanyunete kesi akialolong ka esinyoi nabo jik.

¹²Ebala Ekapolon Akuj kona, “Ayong kainanakini esi ngikilinga. Nyo iemitotor esi itwaan ni etoaneene, ni engopiari atipei loger a nginyia?

¹³Kimuriak esi Ekapolon Akuj nakolong kisubuni esi, nakolong apetakini adis kidiama, nakolong etowei ngapirio a akwap a? Nyo iemitotor esi jiik kotere anyunyura a ngitunga alu kichiakiarito esi, alu esakete amunyar esi? Nyeringa anyunyura kech kitapi esi.

¹⁴Ngulu eenitae, elachakinio atipei, eyarete kesi ngirwa lukaalak, taanyut akimuj na esakete daang.

¹⁵“Ayong arai Ekapolon Akuj na arai Akuj kus, etukulauni ayong anam, etonyou ngitoroi keng torukis. Ekiro kang logo, Akuj Namerikanyer!

¹⁶Apetari[38] ayong kolong adis alokidiama etowo ngapirio a akwap. Abala ayong Yerusalem, ‘Iraakasi esi ngitunga kang! Kainak ayong esi ngakitatamet kang, keratakini ayong esi a agogongu kang.’ ”

¹⁷ Yerusalem, tokienyu! Tonyou towo! Ingoba iyong eriras a Ekapolon Akuj, lo kitamasi ngesi iyong a angoit keng, ingoba iyong daang tanang kisiteroterokini.

¹⁸Emam itwaan kiriki iyong, emam itwaan alotunga kon ni kiriki iyong akan.

¹⁹Kirochakinosi iyong ngakiro ngaarei naaronok, enyasu ejie akwap kon, anyam akoro ngitunga kon. Emam itwaan kidodikini iyong ngisien.

²⁰Eridakis ngitunga ani alilimiyoreta ngawat eyakasi nakiitoret a ngirotin kadaang, ikwaan ka agete na echakakin loloit a ekalokan. Aanyut eriras a angoit a Akuj.

²¹Esi ngitunga a Yerusalem lu ianyunito aboliaro, esi lu itereterosi tosub kirakarit emuna,

²²kiikinit esi Ekapolon Akuj na erai Akuj kus, ebala, “Alemari ayong ekopo a eriras lokolong kainakinit ayong esi a angoit. Nyeringa esi nabo imaase emuna lokisitereterokini esi.

²³Ainakini ayong eriras ngolo lukolong kichiakiarito esi, lukolong kiperikinete esi lorotin kipudata loger a asakatan.”