Read turkana Isaya 52 Bible Online

Isaya 52 - turkana bible

Isaya 52

¹ Yerusalem, togogonger, toliwor lokiyenikinitae! Ere a Akuj lo italeuno, tobutokin akibuseanu kon! Nyeringa ngitunga lu nyenupito Akuj elomunete nabo ni iyei iyong.

²Yerusalem, talachakin! Tonyou anapua, kiboikin lokicholong kon lo a apolou! Talacha ngiriko lu kienito iyong, iyong Sion lo irai erikot!

³Alimoki Ekapolon Akuj ngitunga keng ebala, “Nakolong kitiliworere esi ngikedalak, amam ngaropiyae kitachitere esi. Aloger alopei kangolo, emam ibore etachio kitalachakinere esi.

⁴Nakolong ilooso esi akilom Misiri iraakasi ngitunga a akwap a ache, isubete esi kongina ani isaketa esi ngikulepek. Nakaneni apot ngitunga a Asiria kiterikosi esi kitingaasi, nabo emam ibore kitachakis kesi esi.

⁵Ngakiro napei nguna, kesi tokona esubakinosi alo Babilon, iraakasi esi ngirikon tarai emam ibore kitachitere. Ngulu kipolokinito esi, inisasi ka akiwoga, nabo kemenyarito ayong jiik.

⁶ Enangi akolongit na iyeneta esi atamar ayong na arai Akuj kesuruor esi, nakaneni ayei ayong.”

⁷Ejok noi akingolikin itwaan ni emeunitae ekokoriuno alomoru eyaunit ngakiro naajokak, ngakiro a ekisil! Alimo ngesi akidwang, tolimok Sion tama, “Erai Akuj kon ekapolon!”

⁸Iremasi ngiketeok a ere iremasi aapei a alakara! Iteete kesi a ngakonyen kech a ngikulepek abongun a Ekapolon Akuj Sion!

⁹Kiremasi toeokisi a alakara, esi asakatan a Yerusalem! Eyuuni Ekapolon Akuj ere keng, kisililing ngitunga keng.

¹⁰Kotere apolou keng na italeuno, eyuuni Ekapolon Akuj ngitunga keng, ingolikinete ngitunga daang anakwap.

¹¹ Tonyoutu! Tonyoutu alo Babilon, esi daang lu idakito ngiboro a akai a Akuj! Nyiitap ibore ni italeo[39] akitap. Kitaleunos tonyout toloto.

¹²Alotoru naga, nyinyounete esi ikirikirasi, nyisiyete esi inyounete. Kiriki esi Ekapolon Akuj na erai Akuj kus kitochoik alowaitin kadaang.

¹³Ebala Ekapolon Akuj kona, “Epiario etich a ekasuban etich kang, eliwor ngesi lo erimae noi.[40]

¹⁴Ariangakinosi ngitunga lukaalak na engolikineta ngesi. Asechech akwaan keng peekwaan ka na itwaan.

¹⁵ Iumwokinete ngakwapea nakaalak na ingolikineta ngesi. Iumwokinete ngikapolok tongop ngakiro elimunete. Ingolikinete kesi toyena ibore ni nyeanyuna kesi nakanuan.”