Read turkana Isaya 53 Bible Online

Isaya 53 - turkana bible

Isaya 53

¹ Etachunete ngitunga tamasi, “Ngae adikino enupi ngakiro na tokona kiruoro ngoni? Ngae adikino ingolikini agogongu a Akuj anakiro kanu?

²Ekapolon Akuj ngesi asaki ekasuban etich keng torup loger a ekitoe alo ilijara ngaten nalup nakoonok. Amam ngesi apolou kori akibuseanu na adikino kisupari ngoni. Amam ibore kiminari anikeng, ni adikino kirikori ngoni nikeng.

³ Kipotu ngoni emenyasi ngesi atongero, tanaik ngesi aboliaro ka nikaapilan. Tarapa ngitunga ngakonyen nyeanyungareta ngesi. Kipotu ngoni nyikimisik ngesi tosub erai pas.

⁴“Nakaneni abu ngesi tanaik aboliaro na adikino eliwor ayok, apipilu na adikino eliwor ayok. Neni daang kitamit ngoni atamar erai aboliaro keng eriras lo abunit ani a Akuj.

⁵ Apon ngesi kiwaakinae ngajemei kotere ngasechesea yok, kidetae kotere naaronok kisubi ngoni. Aboliaro keng ngesi kitangalekini ngoni.

⁶Kikoni ngoni daang ngamesekin na echakara, itorit itwaan daang lorot keng a ilope. Nakaneni abu Ekapolon Akuj kirira ngesi, eriras lo achamit erai eyok kadaang.

⁷ “Apon ngesi toboliare nikaronon, Nakaneni tanaik ngesi, nyelimuno akiroit tani apei.

⁸Kirumunae ngesi kirirae, torikoroe akiar, amam itwaan akachit ngakiro keng. Kipudoroe ngesi anakwap ana eyakasi ngitunga lu eyarete kotere ngasechesea a ngitunga yok.

⁹ Kimorikinae aliel keng ka na ngitunga aluaronok, tonukae ngesi ka ngikabarak, tarai amam erukoonu asubit ngesi, kori amam akiroit na alioko tani apei na abu kitoru nakituk keng.”

¹⁰Ebala Ekapolon Akuj kona, “Ayong asaki taanyu ngesi ngichan, ka esinyoi. Arai akitu keng akipeyos na eyauni arimakino a ngasechesea. Kotere nguna, ingolikini ngesi ngalesea keng, eyari ngesi ngikaru lukaalak. Kotere akitorun nikeng, esubakinosi nguna asaki ayong.

¹¹Ani edaun aboliaro keng, eanyuni ngesi alakara nabo, toyen ngesi atamar pearai aboliaro keng aka pas. Kotere aosou a ekasuban etich kang alo etenoono, itiliwori ngesi lukaalak lu etenooko, itiri ngesi eriras lo adikino lukaalak eanyunete, nabo kotere ngesi, arimakini ayong kesi.

¹² Ewaakini ayong ngesi nia arimatoi, ewaak kiding ngikapolok ka ngulu eyenikinitae. Kainyo ajali ngesi ilope akiyar keng kimarakinae lokasechak. Kilunyokin ngesi nados a ngikasechak alukaalak, kilip atamar torimakinae kesi.”[41]