Read turkana Isaya 54 Bible Online

Isaya 54 - turkana bible

Isaya 54

¹ Yerusalem, ikwaan iyong ka aberu nakolup, kirema tokona toeok a alakara. Ianyuni tokona iyong ngide lukaalak, akidwang lua aberu ana iusitae!

²Tanyaa eam kon, kitooyaa ngaunoi keng, todupak ngakito na itoweitere nalup!

³Inyaari iyong ngikukuorin kon alowaitin kadaang. Ebongunete ngitunga kon nakwap na tokona elomito ngibukui luche. Ngirerea lu arata ngawiyongorok, ilelebun ngitunga.

⁴Nyiem, nyikirumete iyong ngileech nabo, nyikitingi iyong etimoi. Kimuriakinete iyong ngileech a esorokane kon, ka asilis a araakau apuserut.

⁵Kainyo ikokini Akasubunan kon lokile kon, enyaritae ngesi Akuj Namerikanyer. Kiyuuni iyong Akuj a Isirael na italeuno, ngesi epolokinit akwap daang.

⁶Isirael, ikwaan iyong ka ateran na ialolongi ani angerio lokile keng. Nakaneni kinyarit iyong Ekapolon Akuj, Tobongu nikeng ebala,

⁷“Kaisikini ayong iyong wadiochichi, kabuuni ayong iyong ani kaminar noi.

⁸Kotere angoit kang, abu ayong kebongok iyong akau wadiochichi, nakaneni kaminakini tokona ayong iyong jik. Ayong Ekapolon Akuj na arai akayuunan kon alimu nguna.

⁹ “Ikwaan ngirwa lugu anikang ka lukolong a Noa, ikwaan ka eger lokolong alimunio ayong atamar nyeringa nabo jik akaale enyami akwap. Alimu tokona nabo atamar nyakangoikini iyong, kori nyekekilakini, kori nyekerirae.

¹⁰Epedorete ngimoru arimaun, epedorete ngimukur aukor, nakaneni erai amina kang anikon akajik, nabo akichikakinet kang na ekisil, erichakini ayong jik. Alimu ayong Ekapolon Akuj nakamina iyong nguna.”

¹¹ Ebala Ekapolon Akuj kona, “Wae Yerusalem, iyong na ianyunit aboliaro ka ngichan, iyong na emam itwaan kisililingi. Aduki ayong ni isipokin iyong a ngamoru anakaalak a ngaropiyae.

¹²Aduki ngaitae kon a ngamoru anaarengak puu, atoduk ngidorin kon a ngamoru ana enokete loger a akim esiriam awas a ngamoru anakaalak a ngaropiyae.

¹³ “Etatami ayong alope ngitunga kon, ainak kesi ajakaanut ka ekisil.

¹⁴Kitogogongete iyong ngakiro na eriyan ka ateneanut. Nyianyuni iyong aboliaro kori ebuloi.

¹⁵Ani itwaan ni kitijikini iyong, esubi nguna peachamakinit ayong, itwaan cha daang ni kitiji iyong, edakar ngesi ilope.

¹⁶“Ayong asubuni eketiakan ngasua, ngolo irirakini akim kitiakunea ngiboro lua ejie. Ayong asubi tani asiger, tolem ngesi ngiboro lua ejie taarea.

¹⁷Nakaneni emam ibore kiwani iyong aloboro alu ejie kangulu, epete iyong ngakiro na itachakini ngulu kititaate iyong daang. Aikini ayong ngikasubak etich kang, esidwang. Ayong Ekapolon Akuj alimu nguna.”