Read turkana Isaya 55 Bible Online

Isaya 55 - turkana bible

Isaya 55

¹ Ebala Ekapolon Akuj kona, “Bu itwaan daang ni enyamit akure! Potu ngakipi nugu kane! Potu daang lu emam ngaropiyae, togiela ngakanoi tanyama! Potu togiela emuna ka ngakile! Emam ibore kitatachio esi!

²Nyo ebukoritere ngaropiyae kotere ibore ni nyerai akimuj? Nyo ibukoritotor esi ngaropiyae na inyamete kotere ibore ni nyikisimwoni? Todetasi ngaki kiirasi ngakiro kang, kiwapakis, sodi tanyama ngamuja naajokak noi, talakaros kotere ajako.

³ “Ngitunga kang, todetasi ngaki, potu nikang toyara! Eliwor achamunet kang ka esi akajik, kainakini ayong esi apiaro nakolong echikakini ayong Daudi.

⁴Etiliwori ayong ngesi ekapolon, ka ekarikon a ngasigerea a ngakwapea. Kotere akitorun nikeng, edodik ayong kesi apolou kang.

⁵Inyaraate tokona esi ngitunga a ngakwapea anagelayek, pekolong kiyenete kesi esi, nakaneni epeunete tokona akimorikin ka esi! Ayong Ekapolon Akuj na arai Akuj a Isirael na etaleuno, asubakini nugu daang. Kainakini esi arimatoi ka ekipur.”

⁶Toreeunos nia Ekapolon Akuj, tanyarata ngesi eringa eapi.

⁷Toisikis ngitunga luaronok eboyor kech, kilocho lu nyetenooko ngitamen kech. Tobongokis kesi Ekapolon Akuj na erai Akuj yok, isienono ngesi nabo erimakini atipei.

⁸Ebala Ekapolon Akuj kona, “Nyikwaan ngitamen kang ka lukus, etiakak ngirotin kang ka lukus.

⁹Eger lo elonia adis analup, eger lopei ngolo ngesi elokieta ngirotin kang ka ngitamen ani eyakasi lukus.

¹⁰ “Ikoni akiroit kang ngidowon ka akiru, lu etiyaunosi alokidiama nyeebongosi eringa nyitapapala akwap kiturup ngikinyam lu itao, ka akimuj nanyamat.

¹¹Ikoni akiroit na alimuni ayong neni, nyelakakini asubakin ngakiro na asaki ayong esubakini daang na areat ayong akisub.

¹²“Irotokinete esi alo Babilon ilakara, kirikorio esi kipudor alore a ekisil. Eeokinete ngimoru ka ngimukur, iremarete ngikito a alakara.

¹³Erupunete ngidomou ani tokona erupunitotor ngirega, erupuni lopara ani tokona erupunitotor ngiikwa. Eliwor ibore ngini emachar lokajik, ngakisitamunet a ngakiro ana asubak ayong Ekapolon Akuj.”