Read turkana Isaya 56 Bible Online

Isaya 56 - turkana bible

Isaya 56

¹Ebala Ekapolon Akuj ngitunga keng, “Tosuba nguna eriyan ka naajokak, kainyo kayuuni ayong esi atipei.

²Apiari ayong ngulu irichakinito Sabato jiik, nabo nyimenyarito. Apiari ayong ngulu nyesubete naaronok.”

³Ani keloma itwaan a akwap anache lotunga a Ekapolon Akuj, nyeelimu ngesi tama, “Nyakachamuni ayong Ekapolon Akuj kilipi ka ngitunga keng.” Nyeelimu itwaan ni idongitoe tama, “Ekoni lo erai ayong ekitoe lokoonon ani nyauria, nyapedori aliwor ipei a ngitunga a Akuj.”

⁴Elimokinit Ekapolon Akuj itwaan ngini ebala, “Ani kiker iyong ayong kirichak Sabato, tosub ngakiro nakajoikinito ayong, kirichak achamunet kang,

⁵itamunio ekiro kon alokai kang, erubakinete ngitunga kang itamunito ekiro kon nikooyen, akidwang eger lo eyakatar iyong ngide lusapa ka lupesur. Kitamunio iyong jiik.”

⁶Ekapolon lo erai Ekapolon Akuj, elimokinit ngitunga a akwap anache lu areeunosi lotunga keng, lu eminasi ngesi tosubete etich keng, lu irichakinito Sabato ka achamunet keng, elimokinit ebala,

⁷ “Karikuni ayong esi Sion lo erai emoru kang,[42] talakaros alokai ana kelipeenere ayong, atacham ngakipeyos na kilemikinete esi ayong alokeno alo kepeyonokinere ayong. Enyarao akai kang akai na ilipeta ngibukui daang.

⁸Ayong Ekapolon Akuj na achununi ngitunga kang anakwap ana aeniaritae kesi, alimu ayong atamar achununi nabo ngiche kimorikinos ka lusek achun.”

⁹Elimokinit Ekapolon Akuj ngitunga a ngakwapea anache ebala, “Potu loger a ngitieng a amoni tanyama ngitunga kang.

¹⁰Emudukaka ngikarikok kech daang, lu ejoikinit ichikichikete ngitunga kang! Emam ibore eyenete kesi. Ikote kesi ngingokwo lu nyikomosi, lu erai ngaju ka akirujare bon eyenete. Ejotoko dir!

¹¹Ikote kesi ngingokwo lukadakak lu nyimwokeenete. Emam ibore eyenete ngikarikok lugu. Esubi itwaan daang ngakiro na ejoikinito ngesi, nguna ikeunete ngesi ilope.

¹²Elimonokinosi kesi ebalasi, ‘Atolemutu emuna, atongobasi kitoup! Ejoker akolongit naka moi noi akidwang akolongit naga!’ ”