Read turkana Isaya 57 Bible Online

Isaya 57 - turkana bible

Isaya 57

¹Na etoanea itwaan ni etenoono, emam itwaan emisit. Ee robo, na etoanea itwaan ni ilipit Akuj, emam itwaan eyeni, kainyo elemario itwaan ni etenoono nyeanyunotor ka naaronok,

²toloma ngesi nia ekisil. Kiangasi ngesi kaneni aapei ka lukolong atenoono eboyor kech.

³Esi ngikasechak, potu nege! Iraakasi esi ngalesea a ngikapilak, ka ngikalomak ta ngamalaae.

⁴Ngae ikianatar esi? Ngae inganyanakinete esi ngakituk kus nabalany ka ngangajepa? Ngikaliokok lugu!

⁵Ilipito esi ngakujo na ituuriyete ngitunga ani ipudonoreta alokwap ngichokei lu ilipeenete esi. Ilemete esi ngide kus tarata ngakipeyos anadipoe ka ngaburiburio a ngatabab.

⁶Tosekut ngamoru nasulut anadipoe kitiliwosi ngakujo kilipa. Tolemut ngakipeyos a emuna ka na ngalemet tobukokis namoru nguna. Inut nabo ngakipeyos a ngalemet. Esibit esi kajoikinito ayong ngakiro nguna daang a?

⁷Idokete esi ngimoru lukooyak toloto kipeyoto kaina ka apudonor.

⁸Itoweito esi ngakujo kus nasubuna alotooma ngidorin kus lu alongaren. Kitoisikis esi ayong tobutosi ngiworui kus, todokasi lokitandae kus lubalany, aapei ka ngiminan kus lu itachito esi sodi kiteperioto esi. Torumosi etereku a ngawat kus kaneni.

⁹Iwasasi esi ngamieta kus nakaakunyok, sodi toloto akilip akuj na enyaritae Molek.[43] Imeanarete esi ngitunga akirimit akwap daang, tanang tani ni eyakasi ngikatoak, sodi kitasakakis esi ngakujo na ilipete.

¹⁰Ituburuna esi kotere akisak ngakujo ngache, tani ikoni neni, nyiilungakinosi esi jik. Itamito esi atamar kiinakinete ngakujo kus ngikilinga, ngakiro nguna nyikiburunea esi.

¹¹Ebala Ekapolon Akuj kona, “Ta ngae mono ngakujo na kitoemito esi nugu, kisingalaate esi ayong nyikitamut ayong tani wadiochichi? Nyikikerito esi ayong ani ngoon elilingea ayong nikooyen a?

¹²Itamito esi atamar isubete naajokak, alimori ayong ngakiro na isubete esi nakaneni nyikingarakinete ngakujo kus esi.

¹³Na ikalounito esi isakete akingarakino, kitoyuut pan esi ngakujo nakus nguna! Ekutari kesi ekuwam nikalonan, ee robo, ekutari tani akianget! Nakaneni ngulu kegienosi ayong, elomete nakwap kilipa alokai kang.”

¹⁴Ebala Ekapolon Akuj kona, “Totiaakisi ngitunga kang tobongut nikang. Topiasi erot lo itorunete kesi! Todukokisi erukudi, tosubakisi!

¹⁵“Ayong Akuj na etaleuno ngina ayei kidiama, ngina ayari jik. Ebooyi ayong ani italeuno alokidiama, nakaneni kibooyi ayong tani ka ngitunga lu itiditeuna lu elungito ngasechesea kech, sodi atobuakinea kesi atitinyu ka akigieno.

¹⁶Nyarubakini ayong nabo jik akirirare ka angoikinit ngitunga lupei kolong nabo ainakini ayong akianget a akiyar[44]

¹⁷Angoikinit kolong ayong kesi kotere akisech kech ka arorokanut, sodi erira ayong kesi, ebongok akau. Nakaneni apot kesi kichanaketa torubakis iwapito ngakiro kech a ngikulepek.

¹⁸“Engolik ayong nguna esubete kesi, nakaneni ayuuni ayong kesi. Ariki ayong kesi engarak, esililing ngulu igorosi esutonokinete.

¹⁹ Ainakinit ayong daang ekisil, ngulu eapiyete ka lukalonak! Etangalekini ayong ngitunga kang.

²⁰Nakaneni ikote ngitunga luaronok anam na ekulae, na ijukunito ngitoroi asakatan ka echoto, emam kona etubosi.

²¹ Emam ngikasechak ayuuno eyei. Alimu ayong Ekapolon Akuj nguna.”