Read turkana Isaya 58 Bible Online

Isaya 58 - turkana bible

Isaya 58

¹Ebala Ekapolon Akuj kona, “Kiremasi lokojokon! Tolimokisi ngitunga kang a Ngisirael ngakiro a ngasechesea kech!

²Kelipito kesi ayong akolongit daang, niti ebalasi, abe kisaki akiyen noi ngakiro kang ka ngitalio kang. Ebalasi kesi kisaki ngitalio lu eriyan anikang nabo tamasi kijoikinit akilipit ayong.”

³Ingitasi ngitunga ebalasi, “Nyo kironeeneo sua akimuj na nyikiteo Ekapolon Akuj? Nyo kitaarar sua akoro na nyemisitor ngesi?” Tolimok Ekapolon Akuj kesi tama, “Nguna a iteni isubete esi nugu, esaa lo ironioto esi akimuj, ngesi nabo pei isubeta esi ngakiro kus a ngikulepek ka akichiakiarit ngikasubak etich kus.

⁴Kitededengi esi akiron akimuj, sodi kiburata tojwoto. Esibit esi eirari ayong ngakilipasinei kus kerai erone kus akimuj ngolo a?

⁵Na ironioto esi akimuj kitasionos, kijuuruoto esi lokojokon, loger a enyait alo ekudokina, topetakis ngiguniae lokuruon toperioto. Ibore ibalasi esi akiron akimuj ngini a? Esibit esi kajoikinito ayong nguna?

⁶“Erone akimuj lo asaki ayong logo. Tongeda ngiriko lu ichiakiaritere luche, ka lua ngakiro ana nyeriyan, talakakis ngulu eboliare toliworos lu elachakina.

⁷ Tomora akimuj ka lu enyamit akoro, tangaasi ngidorin tolomut lu emam ngawiyei. Nakisi ngiworui lu emam ngiworui enapito, kingarakisi lu iyanasi ka esi.

⁸“Ani kikokis esi neni, kinwakuni akicha kang loger a esimakunyuk, sodi tangalekis ngajemei kus atipei. Kiruki ayong ka esi jik katoyuu, kiyoki esi akwangis kang alowaitin kadaang.

⁹Ani kilipete esi ayong, eirari ayong. Ani kinyaraate esi ayong, ekii ayong. “Ani kipalikis esi akichiakiarit luche, ka ngimeny ta ngakiro naaronok,

¹⁰ani kisumuja esi lu enyamit akoro, nakis ngulu ichanasi ibore ni iitanito, ilocho aribu nakiriamit esi toliwor akicha na apaaran lotingilan.

¹¹Kariki ayong esi jiik, ketuup ngiboro luajokak. Ketogogongi ayong esi ketojok. Ikokinete esi amana na eupito ngakipi, ikokinete elelea lo nyeoneene.

¹²Edukokinete ngitunga kus nabo ibore nikolong enyasun a angorot, tobongokis akiduk ngapirio nangorok. Kinyarao esi ngitunga lu ebongonokinete akiduk ngawasea, lu abongokinete akiduk ngakais na arimaun.”

¹³Ebala Ekapolon Akuj kona, “Ani kitaleut esi akolongit na Sabato sodi nyiisuba ngakiro kus a ngikulepek akolongit ngina, ani kimunokis esi akolongit kang na italeuno, kidodikis arimatoi nyiilot wache, kori nyiisub etich, kori nyiingamangam ngakiro pas.

¹⁴Ani kikokis esi neni, ianyunete esi alakara na ebunit anakisub etich kang. Ketiliwori ayong esi lukikeritae awadaang anakwap, sodi talakaros anakwap ana kolong ainakini ayong apaakus Yakobo. Alimu ayong Ekapolon Akuj nguna.”