Read turkana Isaya 59 Bible Online

Isaya 59 - turkana bible

Isaya 59

¹Nyiitamasi robo kori epalag Ekapolon Akuj noi Nyikiyuuni esi. Nyiitamasi robo kori enangakina ngaki keng nyiirari ngakiro kus.

²Ngasechesea kus kesi itengerito ngesi akiirar esi. Ngasechesea kus kitiakito esi ka Akuj, na isaketa esi akilip ngesi.

³Isechito esi ani ebukoritotor ngakan kus ngaakot, itinga naaronok a ngimoyo kus, itorunit alioko nangajepa kus nabo ingaingaasi esi naaronok a ngakituk kus.

⁴Emam esi itwaan elosi lokies kotere ngakiro na eriyan kori na eteniyete. Igienosi esi ngakiro na alioko kidwangeta ekies. Ileleba naaronok tooma kus, iuriyete esi naaronok.

⁵Ikwaan ngakiro na itukosi esi ka ngabeyei a emun alo akisierit. Itwaan ni enyami ngabeyei nguna, etoani, na ebekarere, toseletuun emun. Ikwaan ngakiro na itukosi esi ka akai a asimokok.

⁶Ngakais a ngasimokoka kus, nyedonyunosi ngiworui, nyepedorete ngitunga akimukokin ibore ni idonyunete esi. Eraakasi ngakiro na itukosi esi ngakachakarak, eroko ngakiro na isubete esi.

⁷Itukosi esi jiik ngakiro naaronok, idodor esi anakiro anaaronok. Nyiriakasi esi akiar ngitunga lu nyesechito. Nicha iloose esi daang, toisikis ngichan ka nginyas.

⁸Nyiyenete esi ibore be ekisil. Ngakiro na isubete esi daang, nyeriyan. Iwapito esi erot lokachakaran, itwaan ni iwapakini erot ngolo, nyeanyuni ekisil.

⁹Ebalasi ngitunga kona, “Kiyen tokona atamar nyo pekiyuunea Akuj ngoni alotunga alu kichiakiarito? Kisaki ngoni akicha atolooso nakaneni aribu ngesi eyei.

¹⁰Kitwapitwapi ngoni loger a ngimuduk, ee robo, loger a ngitunga alu emam ngakonyen. Kidakanar ngoni naparan tosub kori erai nakwaare. Kikoni ngoni ngitunga lukatoak alokiding ngitunga lua ngikilinga.

¹¹Kibulit ngoni nabo kialolongi. Kimuit ngoni ayuuno a Akuj ani kichiakiaritere, nakaneni emam ngakiro esubakin.

¹²“Ekapolon Akuj, elalak ngasechesea kosi alongaren kon. Kiriraate sua ngasechesea kosi a ngikulepek, kainyo kiyeni sua ngasechesea kosi noi.

¹³Kinger sua iyong, Ekapolon Akuj, kiwou akiwapakin iyong. Kichiakia sua luche, kibongok iyong akau. Kitami sua ngakiro na alioko, itorunit alioko nakituk kosi.

¹⁴Etwarakin ngakiro na eriyan, achadar ateneanut. Kainyo adakakin iteni ni egielanareta ngitunga ngiboro, nabo nyelomunete ngakiro na eteniyete.

¹⁵Angopia ateneanut jik, itwaan ni epalikini naaronok, toloma lochan.” Engolik Ekapolon Akuj nugu, nakaneni ekadakinito ngesi, kainyo nyesubio nguna eriyan.

¹⁶ Etalarito ngesi ngakiro na emamakar itwaan eyuuni ngulu ichiakiaritae. Aloger kangolo, eyuuni ngesi kesi a ngikilinga keng a ilope, sodi taanyu akidwang.

¹⁷Enapi ngesi ngakiro na eriyan, loger a eworu alo igakinitere alorarum, tanap akidwang loger a apukot. Enapi ekimue lo esakea akitemokin ngakiro daang ka atachakin naaronok esubere ngitunga.

¹⁸Irirae ngesi ngimoe keng itemem ka na esubete kesi, tani lu eyakasi nakwapea nakalonak.

¹⁹Napei alo kide tanang too, eemete ngitunga daang ngesi ka apolou keng. Ebuni ngesi loger a angolol ana etulakanyi ngakipi, loger a ekuwam aloapolon.

²⁰ Ebala Ekapolon Akuj ngitunga keng, “Abuni ayong Yerusalem katoik ka ayuun esi daang lu ireeunosi anasechesea kus.

²¹Kichamakin tokona ayong ka esi, kainak ayong esi agogongu kang ka ngakitatamet tarata ngakus jik. Napei tokona jik, iwapete esi ngakiro kang, kitatama ngide kus ka ngalesea kus akiwap ayong jik.”