Read turkana Isaya 6 Bible Online

Isaya 6 - turkana bible

Isaya 6

¹Ekaru lo atoanea ekapolon Usia, engolik ayong Ekapolon ibooyi alokicholong keng a apolou alo ekeuna noi. Kilelebun eworu keng akai a Akuj wadaang.

²Eriamito ngesi ngisubuna lua asarae ewaasi. Ayakasi ipei kech daang ngabeben ngakan-kapei. Arapit ipei kech daang ereet keng a ngabeben a ngaarei, tarap akwaan a ngabeben a ngaarei sodi topor a ngaarei.

³ Anyarasi kesi abalasi, “Italeuno, italeuno, italeuno! Italeuno Ekapolon Akuj Namerikanyer! Apetakin akibuseanu keng nakwap.”

⁴Kitamaranik agiro a ngitoilio kech ngapirio a akai a Akuj, kilelebun apuru kai.

⁵Atolim ayong atama, “Oitiakoi! Abe ekadaunan lo arai ayong lo! Kainyo achakara ani araakar itwaan ni nyitaleuno akituk, nabo ayei kiding ngitunga lu nyitaleuno ngakituk. Tarai engolikis ngakonyen kang Ekapolon, lo erai Akuj Namerikanyer!”

⁶Ani erumor toporu ipei a ngisubuna kangulu nikang etingit atotole na erirae nakelemuni ngesi alokeno a ngakipeyos, tolem a ngasua anaridet ngatotol.

⁷Tatap ngesi akituk kang a atotole kangina tama, “Atap atotole naga akituk kon. Adaun tokona aronis kon. Arimakin akisech kon.”

⁸Eira ayong Ekapolon ebala, “Ngae ameari ayong? Ngae eliwor emeanara kosi?” Ani erumor atatachu ayong atama, “Ayong logo! Tomearae ayong.”

⁹ Tolim ngesi tama, “Kape tolimok ngitunga lugu kona, ‘Topupo cha ipupete, nakaneni nyiyenunete. Kiteto cha iteete, nakaneni nyingolikinete.’ ”

¹⁰Katolimok nabo tama, “Kitabangaania ngakies a ngitunga kalu, kitikiniman ngaki kech, kitumudukan ngakonyen kech. Sodi nyiingolikineta a ngakonyen kech, kori nyiirasi a ngaki kech, kori nyeechoiasi a ngaososio kech. Ani kesubakis nguna, epedorete katobongokis ayong sodi toyuunae kesi.”

¹¹Sodi engis ayong atama, “Ngirwa ngiai irikarete ngakiro nugu, Ekapolon?” Katatachak ngesi ayong tama, “Tanang ngirerea daang inyasunio, tanang ngakais idongete emam ngitunga, tanang akwap inyasun toliwor alaireng.

¹²Etwarakini ayong ngitunga torikoe nikalonan, kidong akwap esil.

¹³Tani kidong itwaan ipei alotunga alutomon nakwap, emunyar ngini dang. Ikokini atorom a echoke alo atubor.” (Erai atorom akisiakinet nakitetet a ngitunga a Akuj.)