Read turkana Isaya 60 Bible Online

Isaya 60 - turkana bible

Isaya 60

¹Yerusalem, tonyou, kimau loger a akolong, kimaunit iyong akwangis a Ekapolon Akuj!

²Eburichiari aribu ngakwapea nache daang, nakaneni emini akicha a Ekapolon Akuj nikon, etakanuni akwangis keng anikon.

³Epote ngibukui nakicha kon, epote ngikapolok nabaiaret a akolongit kon anakitetet.

⁴Tongolengolek kingolik ngakiro na esubasi, echunasi ngitunga kon esakete aponere nawi! Epote talokookon anikalonan, edakio tanakookon loger a ngide.

⁵Ingolikini iyong ngakiro nugu talakar, ilakar iyong kichurok. Eyaunio ebari a ngakwapea nikon, ebuni ebari kech a ekwakaye nganamea.

⁶Epote ngikaala lukaalak noi alo Midian ka Epa. Epote alo Cheba iwokito egolit ka emitina. Elimorete ngitunga ngakiro naajokak na asubaki Ekapolon Akuj.

⁷Eyaunio ngamesekin daang a Kedar ka Nebayos nikon tarata ngakipeyos, kipeyonokinoe Ekapolon Akuj alokeno a ngakipeyos. Ekapolon Akuj isubusi akai keng noi.

⁸Ngaka ai ngatubwae nugu iwaara loger a ngidowon, loger a ngakurio ana ebongete nakais kech?

⁹Eraakasi kesi ngatubwae na eponito anikalonan iwokunito ngitunga a Akuj nawi aapei ka ngakwangae kech ta egolit. Sodi torimatar Ekapolon Akuj, Akuj a Isirael na italeuno. Etiliwo ngesi ngibukui daang lu erimasi ngitunga keng.

¹⁰Elimokinit Ekapolon Akuj Yerusalem ebala, “Ebongokinete ngitunga a akwap anache akiduk ngawasea kon, tosuba ngikapolok kech etich kon. Kerirae kolong ayong esi kotere angoit, nakaneni kaminakini tokona esi kedodik ngisien.

¹¹ Engaarosi ngidorin kon akwaar ka apaaran, sodi kiinuneta iyong ngikapolok a ngakwapea ebari kech.

¹²Ngakwapea na nyesubete etich kon, inyasunio jik

¹³“Ngakito a ngidomou, ka mitidari ta ngitelitei, ngakito naajokak a ngamon a Lebanon, eyaunio tobongokinere akiduk iyong, Yerusalem, kisubusere akai kang, kisubusere ere kang.

¹⁴ Epote talokookeng a ngitunga alu kolong kichiakiarito iyong kijuuruoto kidodikinito iyong arimatoi. Daang lukolong kimenyarito iyong, ijuuruyete anakejen kon kilipa. Kinyaraate kesi iyong ebalasi, ‘Ere a Ekapolon Akuj,’ ‘Sion, ere a Akuj a Isirael ana italeuno.’

¹⁵“Nyeringa iyong nabo kiisikinio kiteremokinetei, nyiliwor ere lo aramakis ngitunga nabo nyisiler. Ketiliwori ayong iyong ere loapolon lo ibus, ni eyei alakara nakajik.

¹⁶Kidakete iyong ngakwapea ka ngikapolok loger lo edakea aberu ikoku keng. Iyeni iyong atamar ayong Ekapolon Akuj kayuu iyong. Kilachak iyong Akuj a Isirael naationon.

¹⁷“Kainuni ayong iyong egolit, meere akwangat. Kainuni akwangat ka asuat nanyang, meere asuat nakirion ka ngakito. Kainuni asuat nakirion, meere amoru. Nyeringa nabo ngikapolok kon kichiakiarete iyong. Etiliwori ayong kesi lu kipolokinete iyong kotere ateneanut ka ekisil.

¹⁸Nyeringa nabo erukoonu elimunio anakwap kon. Nyeringa nabo elimunio nginyas ka asilis anakwap kon. Kayuuni ayong iyong loger a awas, kipuruuni iyong ayong ani kayuunea.

¹⁹ “Nyeliwor nabo akolong akicha kon naparan, kori nyeliwor elap akicha kon nakwaare. Ayong Ekapolon Akuj ngesi aliwor akicha kon nakajik. Kimauni iyong akicha a akwangis kang.

²⁰Esalunete ngirwa kon lu esinyoi. Ayong Ekapolon Akuj ngesi aliwor akicha kon nakajik. Akicha na erubi akidwang na akolong ka elap.

²¹Eliworosi ngitunga kon daang lu esubete nguna iyookino, eliwor akwap akech jik. Ayong kolong etakini kesi, ayong kolong asubuni kesi, sodi esileereu apolou kang alotunga kadaang.

²²Tani ngitunga a awi kon lu ekidioko ka lu itiditeuna, elalakearosi tarata ebukut lo eyenikinitae. Na enangea akolongit ngina, asubakini ayong ngakiro nguna atipei. Arai ayong Ekapolon Akuj!”