Read turkana Isaya 61 Bible Online

Isaya 61 - turkana bible

Isaya 61

¹ Ekapolon lo erai Ekapolon Akuj, keleleb ayong etau keng. Kaseu ngesi ayong katomeu etatam ngikebootok ngakiro naajokak, etangalek ngulu esurur ngitai, atolimo atamar alachakin ngirikon, atalachak ngulu eenitae.

²Kameu ngesi ayong alimor atamar anang ekaru, lo eyuunea Ekapolon Akuj ngitunga keng, sodi kidwang ngimoe kech. Kameu ngesi ayong akisililing lu igorosi daang esutonokinete.

³Ainakin ngulu igorosi alo Sion, alakara meere esinyoi, eeos a ekipur meere akialolong. Ikokinete kesi ngichokei lu etak Ekapolon Akuj alope. Esubete kesi daang nguna iyookino, kipuroe Akuj kotere nguna asubaki.

⁴Ebongokinete kesi akiduk ngirerea lukolong enyasunio a angorot.

⁵Ngitunga kang, esubete ngitunga a akwap anache etich kus. Iyokiyete kesi ngibaren kus, itaate ngamanat kus ka achoikin ngimusabib kus.

⁶Kinyarao esi ngimurok a Ekapolon Akuj, ngikasubak etich a Akuj yok. Inyamete esi ebari a ngakwapea, kinisatar ani eraakar ekus.

⁷Edaunosi ngileech kus ka etimoi. Ilomete nakwap nakus a ngikulepek, iatakin ebari kus ngakiatakinet ngaarei, talakaros esi jik.

⁸Ebala Ekapolon Akuj kona, “Amina ayong ngakiro na eriyan, aremokin akichiakiarit luche ka asechanu. Ainakini ayong ngitunga kang ebachit dir, atachamakin ka kesi jik.

⁹Eyenikinio kesi alokiding ngibukui, itwaan daang ni ingolikini kesi, toyen atamar eraakasi kesi ngitunga lu apiarit ayong.”

¹⁰ Elakara Yerusalem kotere ngakiro na asubaki Ekapolon Akuj. Ikoni Yerusalem aberu na iusio na enapit ngiworui a akuuta. Etanap Akuj ngesi ayuuno ka akidwang.

¹¹Iteni, loger lo iturupuneta ngalup ngikinyam topoloto, Ekapolon lo erai Ekapolon Akuj, eyuuni ngitunga keng, kipuruut ngibukui daang ngesi.