Read turkana Isaya 62 Bible Online

Isaya 62 - turkana bible

Isaya 62

¹Eruorikini ayong etititiny Yerusalem, nyelilingi ayong tanang Yerusalem eyuunio. Tonoku ayuuno keng loger a akinwaket.

²Yerusalem, ingolikinete ngakwapea iyong idwangi! Ingolikinete ngikapolok daang akwangis kon. Kinyarao iyong a ekiro alokitetet, ekiro lo kiinakini iyong Ekapolon Akuj alope.

³Ikokini iyong ekiraun lokebusean a Ekapolon Akuj.

⁴Nyeringa nabo kinyarao iyong “Lo aisikin,” kori nyenyarao akwap kon “Aberu na achakakin neni.” Enyarao ekiro kon lokitetet, “Italakarit ngesi Akuj.” Enyarao akwap kon, “Iusitae elakara.” Kainyo italakarit iyong Akuj nabo ikokini ngesi ekile a akwap kon.

⁵Kiusi iyong ngolo kolong kisubuni loger lo iusea esorokit apese. Italakari iyong Akuj loger lo elakaror ekile kotere aberu na iusi.

⁶Yerusalem, ewaak ayong ngiketeok nawasea kon. Nyililingete kesi jik akwaar ka apaaran. Ejoikinit kesi isitamunete Ekapolon Akuj ngakichikakinet keng, nyeelakakis ngesi imuriakinete.

⁷Nyiimiekis ngesi iangari tanang ebongokini akiduk Yerusalem. Kitiliwosi ere lo ipuro akwap daang.

⁸Ekong Ekapolon Akuj a agogongu keng, nabo esubakini nguna a agogongu keng. Ebala, “Nyeringa nabo ngalemet kon, eliwor akimuj a ngimoe kon. Nyeringa nabo ngitunga a akwap anache emaase emuna kon lo ichidaritor iyong ngakiinyir.

⁹Nakaneni esi lu ilemete ngalemet nguna, kesi inyamete kipuro Ekapolon Akuj. Esi lu ichoikinito ka akiger ngamusabib, kesi imaase emuna alokai kang.”

¹⁰Esi ngitunga a Yerusalem, topudosi alore, todukokis erot a ngitunga kus alu ebongunito! Ee robo, todukokisi! Todukokisi erot loapolon, kidepasi ngamoru daang! Kiwaakisi ibore ni idodiunit toyeneta ngakwapea daang.

¹¹Elimokinit Ekapolon Akuj akwap etia ni etia kona, “Tolimok ngitunga a Yerusalem atamar ebunit Ekapolon Akuj ayuun esi, einunit ngitunga keng ebachit.”

¹²Kinyarao esi, “Ngitunga a Akuj lu italeuno,” “Ngitunga lu ayuu Ekapolon Akuj.” Enyarao Yerusalem, “Ere lo emina Akuj.” “Ere lo nyeisikina Akuj.”