Read turkana Isaya 63 Bible Online

Isaya 63 - turkana bible

Isaya 63

¹ “Ngae ebunit alore a Bosira alo eyei nakwap a Edom? Ngae en enapit ngiworui luajokak arengak, elosi[45] ikileenikinit tarai nia ngikilinga?” “Erai ayong Ekapolon Akuj, abunit alimor akidwang kang, apedori ayuun.”

²“Nyo erengieta ngiworui kon ikwaanatar ka lua itwaan ani ipudae ngamusabib tochiunere emuna?”

³ Tatachu Ekapolon Akuj tama, “Epudae ayong ngibukui loger a ngamusabib, Emam itwaan kengarakinit. Epudae ayong kesi a angoit, kiterakin ngaakot kech loworui kang daang.

⁴Atodung ayong atamar anang ngirwa lu ayuunea ngitunga kang. Anang akolongit na eriraa ngimoe kech.

⁵ Engolia ayong atoriam emam itwaan ebunit akingarakin, katatalasi ayong ngakiro nguna. Nakaneni ketogogong ayong angoit kang edwang ayong alope anapei.

⁶Kotere angoit kang, abu ayong epuda ngibukui daang eala, atobukok ngaakot kech nalup.”

⁷Esisauni ayong amina a Ekapolon Akuj na nyesaluni. Epuruuni ayong ngesi kotere daang nakisubea ngoni. Ainaki ngesi Ngisirael apiaro nakaalan kotere ngisien keng ka amina na nyedaun.

⁸Alimuni Ekapolon Akuj tama, “Iteni eraakasi kesi ngitunga kang, ngide lu nyekengalaate.” Sodi toyuu ngesi kesi.

⁹Alochan kech kadaang, Ekapolon Akuj alope ayuuni kesi, meere emalaikat. Ayuuni ngesi kesi kotere amina keng ka ngisien. Etani ngesi kesi napei kolong a angorot.

¹⁰Nakaneni tongero kesi Akuj kitongoa etau a Akuj. Sodi toliwor Ekapolon Akuj emoit kech, kitiji kesi.

¹¹Nakaneni kitamut kesi[46] ngakiro nangorok, kitamut ngirwa lukolong a Musa alo arai ekasuban etich a Ekapolon Akuj, kingitas kesi tamasi, “Nyaali tokona Ekapolon Akuj, lokolong ayuuni ngikarikok a ngitunga keng ananam? Nyaali Ekapolon Akuj, lokolong ainakini Musa etau keng?

¹² Nyaani Ekapolon Akuj nakolong asubi ngakiro naationok kisitoru nia Musa? Apaki ngesi ngakipi a anam alongaren kech kipuruunere ngesi jik.”

¹³Ariki ngesi kesi kisitor nakipi natuluk loger a ngangolei ana itorete nariet nyeelakarosi.

¹⁴Abu Ekapolon Akuj kisianga ngitunga keng, loger lo erujarere ngaatuk nadipo na elibit. Ariki ngesi ngitunga keng kipuruunere ekiro keng.

¹⁵Ee Ekapolon Akuj, kingolikinae sua anadis, ani erai awi kon na italeuno. Nyo idodiunit atamar kimina iyong sua, kimisikinit? Nyaani agogongu kon? Nyaani amina kon ka ngisien? Nyikijamua sua.

¹⁶Irai iyong apakosi. Nyikiyenete sua taapaakosi Aburaam ka Yakobo, nakaneni iyong Ekapolon Akuj nakiyuununi sua jiik irai apakosi.

¹⁷Ekapolon Akuj, nyo kilakakinitor iyong sua kidepari ngirotin kon? Nyo kitiliworitor iyong sua lukechanak, atoreas anikon? Tobongu kare kotere lu esubete etich kon, kotere ngitunga lu eraakasi jiik ngikon.

¹⁸Sua ngitunga kon lukitaleuno, kiritarete kolong ngimoe kosi a ngirwa a ngidikidio, kipudata kesi akai kon.

¹⁹Kitisibit iyong sua lu eringa iyong nyepolokino nakanuan, ngitunga lu nyeliworo ngitunga kon.