Read turkana Isaya 65 Bible Online

Isaya 65 - turkana bible

Isaya 65

¹ Tolim Ekapolon Akuj tama, “Asaki kolong ayong akiikin ngakilipasinei kech, nakaneni nyilipa kesi. Asaki kolong ayong kataanyun, nakaneni nyesaka kesi ayong. Nyilipa akwap ngina ayong, tarai bo edarit ayong atachakin kesi kona, ‘Ayong logo. Kengarakini esi.’

²Ebaarit ayong ngakan kang jiik anyarit ngitunga kang lukechanak, lu nyesubete naajokak, lu iwapito ngirotin kech a ngikulepek.

³Ketongoyeenete kesi ayong jiik, nyirumete tani ngileech. Ipeyonokinete ngakujo kech anamanat[48] ka akinom emitina alokenoi a ngakujo anagelayek.

⁴Eloseenete kesi nakwaare naburiburio ka nalielin akisuruor ngikaram. Enyamete kesi akiring a ngiputiro tamata ngapoko a ngitieng alu kakadakinito ayong.

⁵Ani erumor tolimokis luche tamasi, ‘Tachadaros anikosi, nyiapuut kitaleuno sua noi, nyitemokino esi kitapete sua.’ Ketongoito ayong ngakiro a ngitunga kangulu ikoni angoit kang anikech akim na nyedunge.

⁶“Atiaku ayong eriras kech, igiritae eriras kech. Nyelilingi ayong pearai atachakini na esubete kesi.

⁷Atachakini ayong kesi kotere ngasechesea kech ka ngasechesea kata apaakech. Enomanakinete kesi ngakujo kech emitina anasenon a ngimukur. Keruorotor ayong naaronok. Erirae ayong kesi itemem ka ngakiro kech naaronok.”

⁸Ebala Ekapolon Akuj kona, “Emam itwaan inyasuni ngamusabib naajokak, pearai esubunere emuna. Konginapei, nyenyasuni ayong dang ngitunga kang daang, ayuuni ayong ngulu esubete etich kang.

⁹Apiari ayong Ngisirael lu ekitela a Yuda, irumete ngalesea kech akwap kang na ngimoru. Ngitunga kang luseuna, lu esubete etich kang, elomete inaa.

¹⁰ Kelipete kesi ayong nabo torujasi ngamesekin ka ngaatuk kech tadaka nginyia alo Charon ana eraakasi ngaroatin na eyakasi too, ta adipo a Ngichan na eyei lowae lo alo kide.

¹¹“Nakaneni nyikokinete neni anikus alu kiisikinito ayong. Esi lu nyimisikinito Sion, lo erai emoru kang,[49] sodi kilipa Gad ka Meni na eraakasi ngakujo a Ekeny ka ngichan lua esal.

¹²Atiaku ayong atamar kiario esi alojie, kainyo nyikia esi nakanyaraa ayong, nabo nyepupokina esi na eruorikinea ayong. Toseut esi akinger ngakiro kang ka akisub naaronok.

¹³Ngesi kalimokinitor ayong esi atamar Ngulu esubete etich kang, imujete, nakaneni kinyami esi akoro, emasete, kitanyam esi akure, elakarosi, kiruma esi ngileech.

¹⁴Eeokinete kesi a alakara, nakaneni ikalounete esi esurur ngitai.

¹⁵Eliwor ekiro kus ngesi ilamatar ngitunga kang luseuna. Ayong Ekapolon lo arai Ekapolon Akuj, kaari esi. Ngulu iwapito ngakiro kang, ainakini ekiro lokitetet.

¹⁶Itwaan daang ni esaki apiaro anakwap, esakari ngesi Akuj na iteni topia ngesi. Itwaan daang niche ikongi, ikongi a ekiro a Akuj ana iteni. Edaunosi ngichan lungorok kimuriakinos.”

¹⁷ Ebala Ekapolon Akuj kona, “Asubuni ayong akwap nakitetet ka adis nakitetet. Ngakiro nakolong asubasi a angorot, imuriakinosi jik.

¹⁸Talakaros jiik kotere ngiboro lu asub ayong. Yerusalem nakitetet na asubi ayong, ilelebun alakara nabo elakarosi ngitunga keng.

¹⁹ Alakar ayong ilope noi kotere Yerusalem ka ngitunga keng. Nyemini akigoro inaa, nyemini akisak akingarakino.

²⁰Nyeringa nabo ngide luuchik etoakete, ibooyete ngikasukou tomojonga noi. Ngulu enangete ngikaru kech amiat, etamario eringa esorokaka, ani ketoana itwaan nyenanga ngikaru ngulu, etamario ilamam.

²¹Edukete ngitunga ngakais toloma, itaate ngimusabib tanyama.

²²Nyedukete ngakais togelakin ngitunga elomete. Nyitaate togelakin ngikanyamak. Eyarete ngitunga kang ngikaru lukaalak loger a ngikito, nabo elakarosi lokojokon kotere etich a ngakan kech.

²³Nyeliwor etich kech eka pas, nabo nyeanyunosi ngide kech ka naaronok. Apiari ayong kesi ka ngalesea kech jik.

²⁴Tani eringa kesi nyenyara ayong, ekii ayong. Tani eringa kesi nyerumoro akilip, atachuni ayong ngakilipasinei kech.

²⁵ Edakasi ngipeei ka ngimesekin aapei, edakasi ngingatunyo nginyia loger a ngaatuk, apua ngesi eliwor akimuj a ngimunio. Alomoru kang alo enyaritae Sion,[50] emam ibore nikakwanan kori nikenyasunan. Alimu ayong Ekapolon Akuj nguna.”