Read turkana Isaya 66 Bible Online

Isaya 66 - turkana bible

Isaya 66

¹ Ebala Ekapolon Akuj kona, “Adis erai ekicholong kang a apolou, akwap erai ekicholong lo edokokinit ayong ngakejen kang. Ipedorete esi adukokin ayong akai ani? Aliwae alomi ayong?

²Ayong kolong alope asubuni akwap daang! Kotere nguna, eraakasi daang ngikang. Kajoikinito ayong ngitunga lu itiditeuna ka akilung ngasechesea, ee robo, ngitunga lu kakerito ayong ka akiwap ngakiro kang.

³“Esubete ngitunga nacha esakete. Anikech, ikwaan akiar emong kipeyoe ka akiar itwaan kipeyoe. Ikwaan akipeyore imesek ka akibil emosiring a iingok. Ikwaan alemun ngadekon a ngalemet ka alemun ngaakot a eputir. Ikwaan akinom emitina ka akilip akuj nasubuna. Ejoikinito kesi ngakiro nakakadakinito ayong.

⁴Ayauni ayong ngakiro naaronok nikech, eanyunosi kesi ka ngakiro napei eemito kesi, kainyo emam itwaan abu kiki na anyaraa ayong, nabo emam ni abu topupok na eruorikinea ayong. Aseunete kesi akinger ngakiro kang ka akisub naaronok.”

⁵Topupokisi ngakiro na alimu Ekapolon Akuj, esi lu ikerito ngesi kiwapito ngakiro keng, “Ani aloger iraakatar esi lu itenooko anikang, kiremokino esi ngitunga kus ngiche nabo kipakarito esi. Kikianatar kesi esi ebalasi, ‘Kidodiu pan Ekapolon Akuj apolou keng kitoyuu esi sodi engolikisi sua esi ilakara.’

⁶Topupokisi! Eyei echale lore! Ebunit etoil alokai a Akuj! Ekapolon Akuj ngesi irirae ngimoe keng!

⁷ “Ere kang lo italeuno, ikoni aberu na idouni atipei nyeriabakina.

⁸Eyei itwaan engolik kori eira ngakiro na ikote nguna nakanuan a? Epedori akwap etia ni etia akidoun a akolongit a apei a? Napei ariabakinor Sion, abu kidou ngide keng.

⁹Apedori ayong ayau ngitunga kang ani enangi ni idounere, eratak nabo nyiidoun a?” Alimu Ekapolon Akuj nguna.

¹⁰Talakaros aapei ka Yerusalem, talakaros kotere ngesi, esi daang lu iminasi ere logo! Talakaros ka ngesi tokona, esi daang lukolong igorosi kotere ngesi!

¹¹Kibobokini esi ajako a Yerusalem loger lo ebobokinioto ikoku ngakile a itiokeng.

¹²Ebala Ekapolon Akuj kona, “Kainuni ayong esi ajako nakajik, eropuuni ebari a ngakwapea kadaang nikus loger a angolol ana nyeoneene. Ikokinete esi ikoku ni itanaki itiokeng, tadakae, kikanakanae kotere amina.

¹³Kesililingi ayong esi alo Yerusalem loger lo isililingea aberu ikoku keng.”

¹⁴Na ingolikineta esi ngakiro nguna esubasi, etamarete ngitai kus chuu, tokilikiluut ngawat kus loger a nginyia. Neni ngesi iyenuneta esi atamar ayong Ekapolon Akuj engaranakini ngulu esubete etich kang nabo angoikinit ayong ngimoe kang.

¹⁵Epote Ekapolon Akuj ka akim, ta ngaurukukui keng nakapiranak loger a ekuwam aloapolon, bu kirira ngulu engoikinit ngesi.

¹⁶Irirae Ekapolon Akuj ngitunga a akwap daang lu eriamuni ngesi esechito, kirira a akim ka ekileng, eario lukaalak.

¹⁷Ebala Ekapolon Akuj kona, “Anang esal a ngitunga lu italeunosi kotere akilip ngakujo nagelayek, tolosioneto namanat,[51] tanyama akiring a ngiputiro, ka na ngirunyei ta ngamuja nache nakakadakinito ayong.

¹⁸Ayeni ayong[52] ngitamen kech ka ngakiro na esubete kesi. Abunit ayong achunakin ngitunga a ngakwapea kadaang. Na echunakinotor kesi wapei, ingolikinete apolou kang

¹⁹toyena atamar ayong erirae kesi. “Nakaneni edeuni ayong ngiche kech atomea lobukui ka nakwapea nakalonak, na nyiirara ekipur kang kori nyingolikina apolou kang. Ngakwapea nguna kesi Sipania, ka Libia[53] ta Lidia. Irukorete kesi ka ngikagumanarak ngimalea a amod. Ameari toloto Tubal ka Giris. Elimorete kesi apolou kang anakwapea kanguna.

²⁰Ebuunete kesi ngitunga a akwap kus luche daang alobukui kainut ayong eraakasi ainakinet. Eyaunete kesi moru kang[54] alo Yerusalem edokito ngangolei, ka ngisikiria ta ngikaala, edokito ngaurukukui na irito ngangolei, loger lo eyaunieta Ngisirael ngadekon a ngalemet a ngiboro alu italeunitoe kai a Akuj.

²¹Etiliwori ayong ngiche kech ngimurok ka Ngilawi.

²² “Eturubi ayong ngalesea kus ka ekiro kus loger lo erubeta akwap nakitetet ka adis nakitetet kotere agogongu kang.

²³Esukukuu daang lo eanyungarere elap ka lo a Sabato, epote ngitunga a ngakwapea kadaang kelipa ayong kanege alo Yerusalem. Alimu ayong Ekapolon Akuj nguna.

²⁴ “Ani enyounete kesi, ingolikinete ngawat nakatoak a ngitunga alu kangerete ayong. Ngikuru lu enyamete ngawat nguna, nyetoakete jik. Akim na enomi kesi, nyedunge jik. Ekadakini ngitunga daang akingolikin kesi.”