Read turkana Isaya 7 Bible Online

Isaya 7 - turkana bible

Isaya 7

¹ Ngirwa lu araakar Aas ekapolon a Yuda, kisiak ejie. Arai Aas lokookeng a Yosam tarai etatait a Usia. Apot Resin lo arai ekapolon a Siria, ka Peka lokookeng a Remalia, lo arai ekapolon a Isirael, kitijikis ngitunga a Yerusalem, nakaneni tokuruwo alemar ere.

²Ani elimokinio ekapolon a Yuda atamar ibakito ngasigerea a Siria ka na Isirael, tobul ngesi ka ngitunga keng daang, tamaranikis loger a ngikito alu iloiloi ekuwam.

³Tolimok Ekapolon Akuj Isaya tama, “Toriko lokookon Chear Yachub[5] tolot kisiriam ekapolon Aas. Iriamuni iyong ngesi alorukudi alo eyakasi ngikadonyok ngiworui, alosal a echilet alo echilunit ngakipi anabwel ana alokidiama.

⁴Tolimok ngesi kona, ‘Toosunite robo. Kililing, nyiem, nabo wara etau kon nyipirisaar, kainyo angoit a ekapolon Resin ka ngitunga keng a Siria, ka angoit a ekapolon Peka, ikwaan ka apuru pas na ebunit anakito a akim ana eloose adungere.

⁵Etukito Siria ka Isirael aapei ka ekapolon kech.

⁶Esakete akitijikin Yuda, kitoema ngitunga sodi kibaketa alowae kech, ani erumor kitiliwosi lokookeng a Tabeel ekapolon.’

⁷“Ayong Ekapolon lo arai Ekapolon Akuj, alimu atamar nyesubakinosi nguna jik.

⁸Kainyo ere loapolon a Siria ngesi Damasko. Erai Resin ekapolon a Damasko. Adaunet a ngikaru a ngitomwon-kapei ka ngikan, epetario ngitunga a Isirael, nyeringa nabo eliwor ebukut.

⁹Aloger alopei kangolo, ere loapolon a Isirael ngesi Samaria. Erai lokookeng a Remalia ekapolon a Samaria bon. Ani pekinup iyong nyipedori akisikokin.”

¹⁰Tolimok nabo Ekapolon Akuj Aas tama,

¹¹“Tolimok Ekapolon Akuj kon atamar kidodik akiroit nakailiilon, toliwor na ebunit analup ani eyakasi ngikatoak kori alokidiama noi anadis.”

¹² Tatachu Aas tama, “Nyengita ayong emachar. Nyasaki ayong akining Ekapolon Akuj.”

¹³Tatachu Isaya tama, “Topupok tokona, alesit a ekapolon Daudi. Kikad iyong akituburunit ngitunga kon, isak akituburun Akuj dang a?

¹⁴Ani kikote neni, kidodikini tokona Ekapolon iyong akiroit nakiliilon. Epoti apese kidou ikoku nisapat, tanyara ekiro keng Imanuel.

¹⁵Ani epoloe enangi ni engerio akisub ngakiro naaronok, enangi ni etiakunea akisub naajokak, emasi ngakile ka akinyam akimiet a ao.[6]

¹⁶Ani eringa ngirwa ngulu nyenanga, eramakini itwaan daang anakwapea a ngikapolok aluarei alu kitoemito iyong kangulu.

¹⁷“Eyauni Ekapolon Akuj nikon, ka ngitunga kon ta ngitunga luyenet kon, eyauni ngichan lu nyeanyuna esi nakanuan atiakatar ngapolosio a Isirael ka Yuda. Kiinunio esi ekapolon a Asiria.

¹⁸“Na enangea ngirwa ngulu, iunyakini Ekapolon Akuj tanyara Ngimisiri, kibukeaunos loger a ngichuch eponito anangololin ana eremito angolol a Nili. Kibukeaunos lua Asiria anakwap kech loger a ao.

¹⁹Ilulosi kesi kilelebunos nadipo napakapaka, kilelebunos naburiburio a ngatabab ta ngachara daang na edakasi ngibaren.

²⁰“Na enangea ngirwa ngulu, igiri Ekapolon ekabanyan ngakies a ekwakaye Eupurate. Ekabanyan ngolo ngesi ekapolon a Asiria! Ebuni tabany ngabokonya kus, ka ngakies ta ngawat kus daang.

²¹“Na enangea ngirwa ngulu, tani kemeat itwaan ataok apei ka ngaanei ngaarei,

²²iwokinete, taanyu itwaan ngini akimuj na esaki daang. Ee robo, lupiyayek idongete nakwap, emaase ngakile tanyama akimiet a ao.

²³“Na enangea ngirwa ngulu, ngamanat a ngimusabib naajokak daang, na erupunito ngamusabib abunget alomana a apei, tarai emusabib epei ngaropiyae abunget, erupunete ngirega ka ngiikwa tomutonon.

²⁴Eloose ngikerikak inaa etingito ngakawa ka ngimalea. Ee robo, ilelebun akwap daang ngirega ka ngiikwa tomutonon.

²⁵Ngimukur daang lukolong etaeneo, erupunete ngirega ka ngiikwa, kotere ngakiro nguna, emam itwaan elosi inaa. Eliwor ni edakasi ngamesekin ka ngaatuk.”