Read turkana Isaya 8 Bible Online

Isaya 8 - turkana bible

Isaya 8

¹Katolimok Ekapolon Akuj ayong tama, “Tolem ibore nidapal ni igirio sodi kigirak ngagiran naapolok[7] kona, ‘Ademar Atipei, Angatar Atipei.’

²Toriku ngitunga ngiarei lu emunoi tarata ngikaanyunak kon, Uria lo erai emuron, ka Sekaria lokookeng a Yeberekia.”

³Ani ekisidi, topoti aberu kang na arai akadwaran, kidou ikoku nisapat. Katolimok Ekapolon Akuj ayong tama, “Tolimok ekiro be, ‘Ademar Atipei, Angatar Atipei.’

⁴Ani eringa idia nyepolouno, nyeanyuna atamar ‘Ito’ kori ‘Apa’, erotokini ebari a Damasko daang ka ngiboro lungatara a Samaria, kiwoko ekapolon a Asiria.”

⁵Kesuruor Ekapolon Akuj ayong nabo tama,

⁶“Ani aloger angerioto ngitunga lugu ngakipi a ingolol a Chiloa na eleleete akaalimon, sodi tamarana[8] alongaren Resin ka Peka lokookeng a Remalia,

⁷kotere ngakiro nguna, ayong Ekapolon Akuj, ayauni ekapolon a Asiria ka ngajorei keng daang kitijikis Yuda. Eloose kesi ngaren loger a akaale a angolol ana enyaritae Eupurate na ilelebunor kiyesar ngakipi alokwaasea keng.

⁸Epeunete kesi kikisasi Yuda daang loger a ngakipi ana ilelebun tanang losegeta toburichiasi ibore daang.” Ee, kirukit ngoni ka Akuj! Ngabeben keng na epetara, iyokiyete akwap.[9]

⁹Esi ngibukui, tochunakinos iemito. Topupokisi, esi ngakwapea na iloka. Tosubakinos anyoun ejie, nakaneni toema! Ee robo, tonyoutu ejie, nakaneni toema!

¹⁰Totuko aapei, nakaneni eliworosi ngakiro kus daang pas, kainyo kirukit sua ka Akuj.

¹¹Kotere apolou keng naationon, abu Ekapolon Akuj kechikichik ayong atamar nyaasub ngakiro na esubete ngitunga lugu. Katolimok tama,

¹²“Nyiiloma nakiro naaronok na etukosi ngitunga lugu. Nyiiker ngakiro na ekerito kesi kori nyiem.

¹³Toyen atamar ayong Akuj Namerikanyer, ngesi etaleuno. Ayong bon ejoikinit iyong kikeri kitoem.

¹⁴Nikang emotunosi ngitunga toyuunos. Ekoni ayong amoru na elegeununi ngitunga a ngapolosio a Isirael ka Yuda. Ekoni ayong eloit lo esurumi ngitunga lu eyakasi Yerusalem.

¹⁵ Ilegeunio lukaalak, tadakaros tobilas, sodi kirumunae aloloit kangolo tarata ngirikon.”

¹⁶Esi ngirukitos kang, kiyoko ka akirichakin ngakiro nakalimoki Akuj ayong.

¹⁷ Adukaki Ekapolon Akuj ngitunga keng, lu eraakasi ngalesea a Yakobo, nakaneni egienokin ayong ngesi.

¹⁸Ayong logo kirukit ka ngide lukolong kainakini Ekapolon Akuj. Akuj Namerikanyer, na ibooyi alomoru a Sion, ngesi kitiliwo ngoni emachar a ngakiro anakatalarak ani a Ngisirael.

¹⁹Nakilimokineta ngitunga esi tamasi, “Tanyarata ngikelamalamak ka ngimurok lu ingaingaasi ka akirurumare loger ka ta tula”, itachakinete esi kesi atamar ejoikinit enyaraate Akuj kech, meere anyarare ngikaram kotere ngakiro alu eyarete.

²⁰Ejoikinit ngitunga iwapete etal ka ngakitatamet a Ekapolon Akuj. Nyiiwap ngakiro a ngimurok kainyo ngakasalunak.

²¹Eliworosi ngitunga ewowooto anakwap, eriabasi tanyamite akoro. Kotere akoro ka angoit kech, ichienete kesi ekapolon kech ka Akuj kech. Irereorete kesi nadis,

²²kori ekienyiarete kwap, nakaneni emam ibore eanyungarete kesi, pearai ngichan ka aribu. Ee robo, ijukario kesi naribu nakirion chuch.