Read turkana Isaya 9 Bible Online

Isaya 9 - turkana bible

Isaya 9

¹ Emam kesi erot epuunotor anakolongit ana a ngichan kangina. Akwap a ngitela a Sebulun ka Naputal, emenyaritae kolong sek. Nakaneni ngirwa lu moi a ekisidi, eliwor akwap ngina na erimae, napei alo Mediterenian toten kide, tanang nakwap na eyei ekwakaye angolol a Yorudan, tanang tani Galilaya na elomito ngitunga a ngakwapea anache.

²Ngitunga lu aloose anaribu engolikis akicha natiapolon. Alomito kolong nakwap na ngitorubei, nakaneni inwakunit tokona kesi akicha.

³Ekapolon Akuj, italaka iyong kesi,[10] iatak iyong alakara kech. Elakara kesi alongaren kon loger lo elakarotor ngitunga elemete ngamanat, kori ekorete ngibaren lungatara.

⁴Ibil iyong akitoe na aenitere kesi na arai eegos anikech, Ibil aburo na edichere ngisegeta kech. Idwang iyong ebukut lo echiakiarit ngitunga kon, loger lokolong idwangea iyong ngasigerea a Median.

⁵Ngamuk a ngasigerea ana itijikinete kesi, ka ngiworui kech daang lu eyakasi ngaakot, emunyari akim.

⁶Edoun ikoku aniyok! Kiinakin ngoni ikoku nisapat! Eliwor ngesi ekapolon yok. Enyarao ekiro keng, “Ekatukon Loationon,”[11] “Akuj Namerikanyer,” “Apa Lokajik,” “Ekapolon a Ekisil.”

⁷ Apolou keng ka ekisil emam esal. Ilunyokin ngesi nados a Daudi, toliwor ekapolon. Itowei ngesi apolou keng, a ngakiro ana etenooko ka na eriyan, napei tokona jik. Atiaku Akuj Namerikanyer asubakin nguna daang.

⁸Alemu Ekapolon eriras alokapolok a Isirael, alu eraakasi ngalesea a Yakobo.

⁹Eyenunete Ngisirael daang, ngitunga lu elomito lore a Samaria, atamar asubaki ngesi nguna. Inisasi tokona kesi iwogasi, ebalasi,

¹⁰“Aukor ngakais na edukitoe a ngimataparea, nakaneni kilunyokini neni ngakais na ngamoru. Aukor ngikuno, nakaneni kilunyokini ngichekereng luajokak.”

¹¹Etonyou Ekapolon Akuj ngimoe kech,[12] echuchuu sodi kitijikis kesi.

¹²Ngisiria lowae lo alo kide, Ngipilisti lowae lo alo too engaarito ngakituk kech esakete akilikor Isirael. Tani kikoni neni, eringa angoit a Ekapolon Akuj nyedauna, eringa enyoikinit akirirare ngitunga.

¹³Nyelunga Ngisirael akisech kech, tani kirirat kesi Ekapolon Akuj Namerikanyer, nyebonguno kesi nikeng.

¹⁴A akolongit a apei, irirae Ekapolon Akuj Ngisirael ka ngikarikok kech, ee robo, etubori akou ka ekosim, ateni a ekitende ka enyait.

¹⁵Ngikasukou ka ngulu eyenikinitae kesi eraakasi akou ekosim kesi ngikadwarak lukaliokok!

¹⁶Ebatasi ngikarikok kech ngitunga lugu nabo ebukakis ngitamen kech.

¹⁷Kotere ngakiro nguna, nyelakakini Ekapolon ngisorok kech epuun, kori nyisieniyete ngesi ngapuseru ka ngikokiok kech, kainyo eraakasi daang lu nyenupito Akuj, nabo esubete naaronok, torono ekiruor kech. Tani kikoni neni, eringa angoit a Ekapolon Akuj nyedauna, eringa enyoikinit akirirare ngitunga.

¹⁸Erirae aronis a ngitunga loger a akim ana inyasuni ngirega ka ngiikwa. Erirae loger a akim ana erirauni anamoni, todirit apuru na einikina kidiama.

¹⁹Kotere anyunyura a Akuj Namerikanyer, Erirauni eriras keng loger a akim anakwap kadaang. Ikokinete ngitunga ngakito a akim, nyisieni itwaan lokaatokeng.

²⁰Awadaang anakwap, emoriakinosi ngitunga ibore cha daang tanyama, nakaneni nyimwokete. Enyami itwaan daang akiring a ekidunyet keng!

²¹Ejikinosi ngitunga a Epiraim ka lua Manase, ani imorikin kitijikis Yuda. Tani kikok neni, eringa angoit a Ekapolon Akuj nyedauna, eringa enyoikinit akirirare ngitunga.