Read turkana Ngilawi 10 Bible Online

Ngilawi 10 - turkana bible

Ngilawi 10

¹Talokookeng a Aron lu anyaritae Nadab ka Abiu, apot tolemut ipei kech daang asuat na elemere ngatotol anakim, kiwaakis ngatotol na anokete, kiwaakis nabo emitina, sodi tolemikis Ekapolon Akuj. Nakaneni peetaleunitoe akim ngina, kainyo peadungokinit Ekapolon Akuj kesi atamar kikokis neni.

²Abu Ekapolon Akuj tachaku akim atipei tonomia kesi alongaren keng.

³Sodi tolimok Musa Aron tama, “Ngakiro nugu kesi kolong abala Ekapolon Akuj na alimunio ebala, ‘Daang lu esubete etich kang, ejoikinit erimasi akitaleno kang. Edodiuni ayong apolou kang alotunga kang.’ ”[2] Abu Aron kililing chek.

⁴Tanyarau Musa Michael ka Elisapan lu araakasi talokookeng a Usiel alo arai apakeng a Aron loochi. Abu ngesi tolimok kesi tama, “Potu kilepulepoosi talokaatokus aloeam a Akuj tachadasi nikalapatan a adakar.”

⁵Sodi kilepulepoosi kesi a ngiworui kech nikalapatan a adakar loger losek adungokinitor Musa.

⁶Tolimok Musa Aron ka talokookeng a Aron lu anyaritae Eleasar ka Isamar tama, “Nyiimiekis ngitim a ngakies kus nyikiarara kori nyiichila ngiworui kus idodiunito atamar igorosi esi isutonokinete. Ani kikokis esi neni, itoakete, nabo engoikini Ekapolon Akuj ngitunga daang. Nakaneni ngitunga kus luche, Ngisirael daang etia ni etia epedorete akigoro tosutonokis kotere akitu na ayauni akim naga na achakuni Ekapolon Akuj.

⁷Nyiipudosi aloeam a Akuj. Ani kipudosi itoakete, kainyo kitaleun esi ani kiwasakinere akimiet na etal na Ekapolon Akuj.” Tosuba Aron ka talokookeng ngakiro nguna loger lo alimokinitor Musa.

⁸Tolimok Ekapolon Akuj Aron tama,

⁹“Nyiilomut ka talokookon loeam kang erai kimasito emuna lo epuritoe kori kimasito epurot. Ani kilomutu, itoakete esi. Erai ibore en etal lo irichakinete ngalesea kon daang.

¹⁰Ejoikinit esi iyenete akitiak ngakiro na eraakasi ngaka Akuj ka ngakiro na nyeraakasi ngaka Akuj. Ejoikinit nabo iyenete akitiak ibore ni italeunitoe ka ibore ni nyitaleunitoe.

¹¹ Kitatama Ngisirael ngitalio daang lukadungok ayong esi esitoru nia Musa.”

¹²Tolimok Musa Aron ka talokookeng luarei edongito lu anyaritae Eleasar ka Isamar tama, “Tolemutu akipeyos a ngalemet na edongi anakimuj ana apeikinio Ekapolon Akuj, tanyama alo diyete ekeno lo a ngakipeyos emam ekitoe lo itubui iwaakinitae, kainyo erai akipeyos ngina na italeunitoe.

¹³Tanyama ani italeunitoe, kainyo ngesi kitiakakinitae iyong ka talokookon anakipeyos ana epeikinitoe Ekapolon Akuj. Kadungokini kolong ayong Ekapolon Akuj kongina.

¹⁴Nakaneni ani atorobu ka amuro nakitalio na eraakasi ngaka ngakipeyos ana iwakiwakio, tanyama awadaang anicha kijoikinit esi. Tanyama ka ngitunga a awi kon. Eraakasi ngakipeyos nguna na kitiakakinitae iyong ka ngide kon anakipeyos a ekisil ana elemuunete Ngisirael.

¹⁵ Eyaunete amuro nakitalio ka atorobu na erai akipeyos na iwakiwakio, yaunae aapei ka nikataronon ni inomio sodi kiwakawakae erai akipeyos na iwakiwakio alongaren Ekapolon Akuj. Eraakasi nginerin ngulu ngikus ka ngide kus jik, loger lo adungunitor Ekapolon Akuj.”

¹⁶Ani ingita Musa ngakiro a akine ana alemunio erai akipeyos a akisech, abu toyen atamar kepei. Tongoik ngesi Eleasar ka Isamar lu edongete, sodi kingit tama,

¹⁷“Nyo peinyameta esi akipeyos a akisech ani italeunitoe? Erai akipeyos ngina na italeunitoe, nakaneni kiinak esi Ekapolon Akuj sodi tomookere akisech a ngitunga.

¹⁸Kingolikisi a, nyeyauna esi ngaakot nguna loeam a Akuj. Ajoikinit esi inyamete akipeyos ngina alotooma eam loger lo kadungokinitor ayong.”

¹⁹Tatachak Aron Musa tama, “Kingolik a, alemut tokona ngitunga akipeyos akisech ka akipeyos na inomio alemikis Ekapolon Akuj. Tani kikoni neni, aanyu ayong ngakiro naaronok ikote nugu! Tokona, arai atanyam ayong akipeyos na a akisech a, kejoikinito ngakiro nguna Ekapolon Akuj a?”

²⁰Kitemokinos Musa ngakiro nguna na eirarea.