Read turkana Ngilawi 11 Bible Online

Ngilawi 11 - turkana bible

Ngilawi 11

¹Tolimok Ekapolon Akuj Musa ka Aron tama,

²“Tolimokisi Ngisirael ngitalio lugu. Ipedorete esi akinyam etiengit daang lo eyei nakwap,

³lo epakak ngakichiaket, tarai nabo lo iyeruununi nginyia.

⁴Nakaneni eyakasi ngitieng lu eraakasi nginyia make iyeruununete, kori ngakichiaket make epakak, nyiinyam ekaal kainyo tani kiyeruuni nginyia, nyepakak ngakichiaket. Erai ngesi ibarasit ni italeo akinyam.

⁵Nyiinyam adukae kainyo tani kiyeruuni nginyia, nyepakak ngakichiaket. Erai ngesi etiengit lo italeo akinyam.

⁶Nyiinyam apoo kainyo tani kiyeruuni nginyia, nyepakak ngakichiaket. Erai ngesi etiengit lo italeo akinyam.

⁷Nyiinyam ngiputiro. Italeo kesi akinyam kainyo tani kepakak kesi ngakichiaket, nyiyeruunete nginyia. Eraakasi kesi ngitieng lu italeo akinyam.

⁸Nyiinyam akiring kech kori nyiitap tani na etoaketa.

⁹“Ipedorete akinyam ngikolea daang lu eyakasi ngibeben ka ngikabebekwa.

¹⁰Nakaneni ibore ni eyei nakipi daang, ni emam ngibeben ka ngikabebekwa, italeo akinyam.

¹¹Italeo akinyam ngitieng lu ikote ngulu. Nyiinyam akiring kech kori nyiitap tani ngawat kech nakatoak.

¹²Nyiinyam ibore daang ni eyei nakipi, tamam ngibeben ka ngikabebekwa.

¹³Warasi nyiinyam ngikieny lu italeo akinyam, lu imarunitae kanege lugu, lu eraakasi ngigolei ka ngataruk, ka ngataruk nakanyamak ngikolea,

¹⁴ka egole lobe lokidole, ta auk a ngigolei daang,

¹⁵ka ngikuruka, ta auk a ngikuruka daang,

¹⁶ka ngikaleeso, ka tatula na a akwaar, ka ngabaanga ka ngigolei luche, ta auk kech,

¹⁷ka tatula, ka nalumio, ka tatula naachik,

¹⁸ka ngabaanga naakwaak, ka ngaumoi, ka atarukot nabe kotol,

¹⁹ka tanatole ka tanamedot, ta auk kech, talokuto ka talononwa.[3]

²⁰“Ngiborei luuchik daang lu eporito, italeo akinyam,

²¹mati lu eporoporoote analup.

²²Ipedorete akinyam ngimases, ka ngikajekelea, ta talodete.

²³Nakaneni ngiborei luche luuchik daang lu eyakasi ngabeben toliato, italeo akinyam.

²⁴“Kitiliworete ngiborei ngulu esi lu nyitaleuno. Itwaan cha daang ni etapi ibore ni etoanit eliwor ni nyitaleunitoe tanang ebong.

²⁵Ani kelema itwaan akiring a ibore ani katoan, ejoikinit ngesi ilotari ngiworui keng. Eliwor itwaan ngini ni nyitaleunitoe tanang ebong.

²⁶Itwaan cha daang ni etapi ibarasit ni epakak ngakichiaket tarai nyiyeruuni nginyia, eliwor itwaan ngini ni nyitaleunitoe.

²⁷Ngitieng daang lu ichiakito ngalup a ngimaagor, tani keyakasi ngakejen ngoomwon, eraakasi lu italeo akinyam. Itwaan cha daang ni etapi etiengit lokatoan, eliwor ni nyitaleunitoe tanang ebong.

²⁸Itwaan cha daang ni edaki etiengit lokatoan, eliwor ni nyitaleunitoe tanang ebong.

²⁹“Italeo akinyam ngitieng lugu, nacheleru, ka lorunye, ka taata a ngarewa daang,

³⁰ka ayele, ka anakanak ka lokibobo, ta agea.

³¹Itwaan cha daang ni etapi kesi, kori lu atoaka, eliwor ni nyitaleunitoe tanang ebong.

³²Ani kechakakin etiengit lokatoan nibore idio, eliwor ibore ngini ni nyitaleunitoe. Epedori ibore ngini aliwor nikitoe, kori eworu, kori eleu, kori echue, kori ibore cha daang ni esubere ibore idio. Ilumokinio ibore ngini nakipi, nakaneni eliwor ni nyitaleunitoe tanang ebong.

³³Ani kechakakin ibore nikatoan namot nalupe, eliwor ibore daang ni eyei namot ngina ni nyitaleunitoe, nakaneni ejoikinit iyong ibwangi amot ngina.

³⁴Akimuj cha daang napalem epedorio akinyam, nakaneni tarai abukokin ngakipi a amot kangina, eliwor na italeo akinyam. Ani ibore cha daang ni epedorio akimat anamot kangina eliwor ni italeo akimat.

³⁵Ibore cha daang ni echakakin ibore nikatoan, eliwor ni nyitaleunitoe. Kerai lokeno echakakin kori namot, ejoikinit ebwangio. Eliworosi lu nyitaleunitoe, kotere ngakiro nguna, eliworosi lu nyitaleunitoe anikus.

³⁶Tani kikoni neni, ejok akar kori elelea. Nakaneni ibore cha daang ni etapi ibore nikatoan, eliwor ni nyitaleunitoe.

³⁷Ani kechakakin ibore nikatoan lokinyam lu esakio akitakin, nyerokearosi ngikinyam ngulu.

³⁸Nakaneni ani kemur ngikinyam anakipi esakio toruput, sodi tochakakin ibore nikatoan neni, eliworosi ngikinyam ngulu lu nyitaleunitoe.

³⁹“Ani ketoana etiengit lo nyitaleo akinyam, itwaan cha daang ni etapi etiengit lokatoan ngolo, eliwor ni nyitaleuno tanang ebong.

⁴⁰Ani kenyam itwaan idio akiring a ibarasit anikatoan kangini, ilotari ngiworui keng, nakaneni eliwor ngesi ni nyitaleunitoe tanang ebong.

⁴¹“Nyiinyam ngiborei luuchik daang lu eliato analup.

⁴²Keliato kesi, kori keloose a ngakejen a ngoomwon, kori kelalak ngakejen.

⁴³Warasi nyiiliworosi lu nyitaleuno ani inyameta tani ipei kech.

⁴⁴Ayong arai Ekapolon Akuj na arai Akuj kus, nakaneni ejoikinit esi italeunosi, kainyo arai ayong na etaleuno.

⁴⁵ Arai ayong Ekapolon Akuj nakolong kepuduni esi alo Misiri sodi atoliwor Akuj kus. Kotere ngakiro nguna ejoikinit esi iliworosi lu italeuno kainyo arai ayong Akuj kus na etaleuno.

⁴⁶“Eraakasi ngulu ngitalio a ngitieng ka ngikieny, ka ibore daang ni eyei nanam, ta ibore daang ni elosi anakwap.

⁴⁷Ejoikinit esi irichakinete akitiak ibore ni nyitaleo akinyam ka ni italeo akinyam, ka ngitieng lu enyamio ka lu nyenyamio.”