Read turkana Ngilawi 13 Bible Online

Ngilawi 13 - turkana bible

Ngilawi 13

¹Tolimok Ekapolon Akuj Musa ka Aron tama,

²“Ani kemin itwaan ajeme nakwaan, kori elepunait, kori kebu akwaan tasak aliwor enomokere, ejoikinit erikunio nia Aron alo erai emuron, kori ni eyei epei a talokookeng lo erai emuron.

³Iseme emuron ajeme. Ani keliworo ngitim kaneni luakwaak, nabo kichukuliyoro ajeme ngina, erai ibore ngini enomokere. Elimuni emuron atamar erai itwaan ngini ni nyitaleunitoe.

⁴Nakaneni ani kekwang ajeme, tarai nyichukuliyoro, nabo tarai nyekwangak ngitim, echadari emuron itwaan ngini a ngirwa a ngikan-kaarei.

⁵Iseme emuron ngesi nabo akolongit na a ngakan-kaarei. Ani kingolik emuron ngolo atamar ikoni ajeme ngina nikolong sek a ekingaren nyenyeara, ejoikinit echadari ngesi nabo a ngirwa ngikan-kaarei.

⁶Iseme emuron ngesi nabo akolongit na a ngakan-kaarei. Ani kengopiarit ajeme pekenyaara, elimuni emuron atamar erai itwaan ngini ni italeuno, erai ibore ngini ajeme pas.

⁷Nakaneni ani kenyaar ajeme ngina ekisidi a emuron akisemere ngesi tolim atamar italeuno, ejoikinit ngesi elosi nia emuron nabo.

⁸Iseme emuron itwaan ngini nabo, ani kenyaara ajeme, elimuni emuron atamar erai ngesi ni nyitaleuno. Erai edeke ngolo enomokere.

⁹“Ani kedekakin itwaan enomokere, erikunio lomuron a Akuj.

¹⁰Iseme emuron ngesi. Ani kekwang ajeme, taraakas ngitim luakwaak, nabo kileleba ngabulon,

¹¹erai edeke ngolo enomokere lo amin nakwaan nikooyen. Elimuni emuron atamar erai itwaan ngini ni nyitaleunitoe. Nyechadario ngesi kainyo etakani dir atamar erai ngesi ni nyitaleunitoe.

¹²Ani kemin enomokere nakwaan wadaang, tobutakin nakwaan napei anakou tanang nakejen,

¹³iseme emuron ngesi nabo. Ani kingolik ngesi atamar kebutakin akwaan wadaang, elimuni ngesi atamar erai itwaan ngini ni italeuno. Ani kekwangera akwaan wadaang erai ngesi ni italeuno.

¹⁴Nakaneni napei cha etakanuunea ajeme, erai itwaan ngini ni nyitaleunitoe.

¹⁵Iseme emuron ngesi nabo. Ani keanyunga ngesi ajeme, elimuni ngesi atamar erai itwaan ngini ni nyitaleunitoe. Erai ajeme ngina enomokere, nakaneni nyitaleunitoe itwaan ngini.

¹⁶Ani kengaleki ajeme ngina tokwanger nabo, elosi itwaan ngini lomuron a Akuj.

¹⁷Iseme ngesi emuron ngolo nabo. Ani kekwangera ajeme, elimuni emuron atamar erai itwaan ngini ni italeunitoe.

¹⁸“Ani keyei itwaan elepunait lokengaleki,

¹⁹ani ekisidi min abus naakwaan kori nakori-arengan nisek ayei elepunait, elosi itwaan ngini lomuron.

²⁰Iseme ngesi emuron, ani kichukuliyoro neni, tokwangak ngitim, elimuni emuron atamar erai itwaan ngini ni nyitaleunitoe. Enomokere ngesi esiak alolepunait kangolo.

²¹Nakaneni ani kiseme emuron a Akuj itwaan ngini kingolik atamar nyekwangera ngitim keng, nabo nyichukuliyoro ajeme ngina, nabo ekot angopiar, echadari emuron ngesi a ngirwa a ngikan-kaarei.

²²Ani kenyaar ajeme ngina, elimuni emuron atamar nyitaleunitoe itwaan ngini. Edeak itwaan ngini.

²³Nakaneni ani kerupu ajeme awapei towou anyaar, erai aporosit nasek a elepunait. Elimuni emuron atamar italeuno itwaan ngini.

²⁴“Ani kenom itwaan akim, sodi tokwanger anomat ngina, kori toliwor nakori-akwaan,

²⁵iseme emuron ngesi. Ani kekwangera ngitim lua ajeme, kichukuliyor ajeme, erai enomokere esiak ananomat a akim kangina. Elimuni emuron atamar erai itwaan ngini ni nyitaleunitoe.

²⁶Ani pekekwangera ngitim kaneni, nabo pekichukuliyoro tani ajeme, tarai ekot ajeme ngina angopiar, echadari emuron ngesi a ngirwa a ngikan-kaarei.

²⁷Iseme emuron ngesi nabo akolongit na a ngakan-kaarei. Ani kenyaara ajeme ngina, erai enomokere. Elimuni emuron atamar erai itwaan ngini ni nyitaleunitoe.

²⁸Ani pekilochokin ajeme ngina towou anyaar, nabo tokote angopiar, nyerai edeke ngolo enomokere. Elimuni emuron atamar italeuno itwaan ngini kainyo erai aporosit ngina aka anomat a akim.

²⁹“Ani kemin ekile kori aberu ajeme nakou kori nabokony,

³⁰iseme emuron. Ani kichukuliyoro ajeme ngina tonyangaaniyarito ngitim keng todiseak, erai enomokere. Elimuni emuron atamar nyitaleunitoe itwaan ngini.

³¹Ani kiseme emuron ngesi, kingolik atamar nyichukuliyoro ajeme, nakaneni eringa ngitim nyiriokera, echadari ngesi a ngirwa a ngikan-kaarei.

³²Iseme emuron ajeme nabo akolongit na a ngakan-kaarei. Ani keringa nyenyaara, tamam ngitim lunyangayek, nabo nyiichukuliyoro,

³³ebanyi itwaan ngini akou kimiek ewae lo eyakasi ngitim. Echadari emuron ngesi nabo a ngirwa a ngiche a ngikan-kaarei.

³⁴Iseme emuron ajeme akolongit na a ngakan-kaarei. Ani pekenyaara nabo nyiichukuliyoro, elimuni emuron atamar italeuno itwaan ngini. Ilotari itwaan ngini ngiworui keng, sodi toseger ngesi.

³⁵Ani kenyaar ajeme erai kelimu emuron atamar italeuno itwaan ngini kerumor

³⁶iseme emuron itwaan ngini nabo. Ani kenyaara ajeme, nyeesak nabo emuron aanyungar ngitim lunyangayek, etakani atamar erai itwaan ngini ni nyitaleunitoe.

³⁷Ani kingolik emuron atamar nyenyaara ajeme nabo keruput ngitim lukirionok kaneni, kengaleki ajeme ngina. Elimuni emuron atamar italeuno itwaan ngini.

³⁸“Ani kepean ekile kori aberu ngakemera naakwaak nakwaan,

³⁹iseme emuron itwaan ngini. Ani kingolik emuron atamar ekwangikinit cha ngakemera nguna, erai ibore ngini loper. Italeuno itwaan ngini.

⁴⁰“Ekile lo edaunosi ngitim tapaloror, italeuno.

⁴¹Ani kedaunosi itwaan ngitim a akou lua ereet kori lua alokiding akou, kori min angole namedo, epalor itwaan ngini nakaneni italeuno.

⁴²Ani kemin ajeme nakori-akwaan napalore, erai enomokere.

⁴³Iseme emuron itwaan ngini ani keyei ajeme nakori-akwaan,

⁴⁴elimuni emuron atamar nyitaleunitoe itwaan ngini, kotere enomokere lo eyei nakou keng.

⁴⁵“Itwaan ni edeak enomokere, enapi ngiworui lu edaudauna, nyikiarari ngitim keng, nabo erapi ewae loa lokwap a ereet keng, toliwor ebala, ‘Nyitaleunitoe, nyitaleunitoe!’

⁴⁶Erubakini itwaan ngini erai ni nyitaleunitoe ngirwa daang lu eringaakar edeaka edeke ngolo. Iboikin ngesi nikalapatan a adakar tachadar ani eyakasi ngitunga luche.

⁴⁷“Ani kemin erukopus[4] loworui, keraakasi lua ngajul a ngamesekin, kori lua ngawarui,

⁴⁸kori kemin nawaru cha daang, kori nawaru a ngajul a ngamesekin, kori loleu, kori nibore cha daang ni esubunitae aloleu.

⁴⁹Ani kepusianikinit kori kerengikinit erukopus lo eyei nibore ninapat ngini, erai erukopus ngolo lo iata, ejoikinit idodikinio emuron.

⁵⁰Iseme emuron tachada iborosit ngini a ngirwa a ngikan-kaarei.

⁵¹Iseme emuron nabo akolongit na a ngakan-kaarei. Ani kiatakin erukopus, eliwor iborosit ni nyitaleunitoe.

⁵²Inomi emuron iborosit ngini kainyo epetarit erukopus lo ejoikinit inomio a akim.

⁵³“Nakaneni ani kiseme emuron iborosit ngini, torukau erukopus nyiatakina anibore kangini,

⁵⁴elimuni ngesi atamar kilotarae iborosit ngini, kikacharae a ngirwa a ngiche a ngikan-kaarei.

⁵⁵Ani erumor kiseme ngesi, ani pekilochokino eger a erukopus kangolo, tani pekepetara erukopus ngolo, eringa iborosit ngini erai ni nyitaleuno. Ejoikinit iborosit ngini inomio, tani keyei erukopus ngolo ngaren ibore kangini kori naabor.

⁵⁶Nakaneni ani kiseme emuron nabo torukau erukopus kengopia, ikisari ngesi erukopus ngolo aloworui kori aloleu.

⁵⁷Ani ketakanuu erukopus kiatakin nabo, ejoikinit ilope inomi iborosit ninapat ngini.

⁵⁸Ani kilota ngesi iborosit ngini tongopia erukopus, ilotari ngesi nabo iborosit ngini. Eliwor iborosit ninapat ngini ni italeuno.

⁵⁹“Erai ngolo etal a erukopus alo eyei loworui, keraakasi lua ngajul a ngamesekin, kori lua ngawarui, kori kemin nawaru cha daang, kori nawaru a ngajul a ngamesekin, kori nibore cha daang ni esubunitae aloleu. Ikokinio eyenio neni kerai iborosit ni italeuno kori ni nyitaleuno.”